Unha vez examinada a solicitude de deslindamento formulada polos representantes do monte veciñal en man común (MVMC) Penelas, pertencente á Comunidade de Montes Veciñais en Man Común (CMVMC) do Carballal, e mais da Seara, pertencente á CMVMC da Seara, no concello de Cartelle, resulta o seguinte:
Feitos.
Primeiro. O 31.8.2022 a CMVMC do Carballal presentou un escrito (Rexel 2022/2166664) en que solicitan a aprobación dun deslindamento coa CMVMC da Seara.
Coa solicitude achegouse a seguinte documentación:
– Acta-informe de deslindamento.
– Acta de conciliación levantada no Xulgado de Paz de Cartelle.
– Certificacións dos acordos das respectivas asembleas xerais.
Segundo. O informe do Servizo de Montes da Xefatura Territorial de Ourense do 14 de setembro de 2023 fai constar que o deslindamento comprende o tramo que empeza no vértice 1, Marco do Valiño das Aceas (o situado máis ao NL), e remata no vértice 8, Alto da Serra Pista (o situado máis ao SO).
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que lle propón ao Xurado Provincial a súa aprobación.
Consideracións legais e técnicas.
Primeira. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se deberá seguir no deslindamento entre montes veciñais en man común e establece que o Xurado Provincial de Montes Veciñais en Man Común, logo do exame da documentación presentada, ditará a resolución correspondente, que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 14 de setembro de 2023, o Xurado Provincial de Montes Veciñais en Man Común acordou por unanimidade o día 14 de maio de 2024:
Aprobar o acto de conciliación acadado polas xuntas reitoras dos MVMC Penelas, pertencente á CMVMC do Carballal, e mais do MVMC da Seara, pertencente á CMVMC da Seara, no concello de Cartelle.
Contra esta resolución, que pon fin á vía administrativa, poderase interpor recurso potestativo de reposición ante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo ante o Xulgado do Contencioso Administrativo de Ourense no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 18 de xuño de 2024
José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense