Examinada a solicitude de deslindamento formulada polos representantes do monte veciñal en man común (MVMC) Chaira e Lomba, pertencente á Comunidade de Montes Veciñais en Man Común (CMVMC) de Vilela, e mais o MVMC Ouzal, Meixeira e outros, pertencente á CMVMC de Pumares e O Souto, no concello de Bande, resultan os seguintes

Feitos:

Primeiro. O 29.9.2022, a CMVMC de Vilela presentou un escrito (Rexel 2022/2400103) en que solicitaban a aprobación dun deslindamento coa CMVMC de Pumares e O Souto.

Coa solicitude achegou a seguinte documentación:

– Acta de conciliación levantada no Xulgado de Paz de Bande.

– Memoria e planos.

– Acta de deslindamento.

Segundo. A mesma comunidade presentou con datas do 24.4.2023 (Rexel 2023/1232442) e do 19.5.2023 (Rexel 2023/1486808) sendos escritos complementarios con que achegou as certificacións dos acordos das respectivas asembleas xerais do 6.8.2022.

Terceiro. O informe do Servizo de Montes da Xefatura Territorial de Ourense do 23 de maio de 2023 fai constar que a documentación achegada corresponde ao deslindamento do perímetro estremeiro entre o MVMC Chaira e Lomba pertencente á CMVMC de Vilela, e o MVMC Ouzal, Meixeira e outros, pertencente á CMVMC de Pumares e O Souto, desde o vértice 1 (o situado máis ao O) ata o vértice 6 (o situado máis ao L).

Logo de analizar toda a documentación achegada, obsérvase que, tal e como se recoñece na acta do deslindamento, os vértices 1 e 6 definen tamén, respectivamente, a confluencia cos MVMC Mixto de Penamaior e Fieiro e Fonte do Foxo, Pontón, cuxas comunidades propietarias non participan da avinza; e considerando que os ditos puntos se sitúan dentro das poligonais procedentes da dixitalización dos esbozos dos ditos montes, conclúese que os vértices 1 e 6 deben ter a consideración de puntos auxiliares que permiten definir a dirección da liña nos tramos inicial e final do deslindamento.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación entre os puntos 2 e 5 conciliados, tendo os vértices 1 e 6 a consideración de puntos auxiliares que permiten definir a dirección da liña nos tramos inicial e final do deslindamento.

Consideracións legais e técnicas:

Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e cos fundamentos de dereito expostos, e tendo en conta o informe favorable do Servizo de Montes do día 23 de maio de 2023, o Xurado Provincial de Montes Veciñais en Man Común acordou por unanimidade o día 9 de abril de 2024:

Aprobar o acto de conciliación acadado polas xuntas reitoras dos MVMC Chaira e Lomba, pertencente á CMVMC de Vilela, e o MVMC Ouzal, Meixeira e outros, pertencente á CMVMC de Pumares e O Souto, no concello de Bande.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 25 de abril de 2024

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense