Examinada a solicitude de deslindamento formulada polos representantes do monte veciñal en man común (MVMC) de Puxedo, Guende e Cela, pertencente á Comunidade de Montes Veciñais en Man Común (CMVMC) do Puxedo, Guende e Cela, co MVMC de Bouzas, pertencente á CMVMC de Bouzas, Briñidelo, Esperanzo e San Paio, e o MVMC Serra de Lobios e Nichos, pertencente á CMVMC das parroquias de Araúxo (San Martiño), Lobios (San Miguel) e San Paio de Araúxo (agás O Puxedo e Guende), no concello de Lobios, resultan os seguintes:
Feitos:
Primeiro. O 29.9.2022, a CMVMC do Puxedo, Guende e Cela presentou un escrito (Rexel 2022/2398017) en que solicitan a aprobación dun deslindamento coa CMVMC de Bouzas, Briñidelo, Esperanzo e San Paio.
Coa solicitude achegou a seguinte documentación:
– Acta de conciliación levantada no Xulgado de Paz de Lobios.
– Informe de deslindamento e planos.
– Acta de deslindamento.
– Certificacións das respectivas asembleas xerais.
Segundo. Ese mesmo día, a dita comunidade presentou outro escrito (Rexel 2022/2399473) relativo a un segundo deslindamento, neste caso coa CMVMC das parroquias de Araúxo, Lobios e San Paio de Araúxo, xuntando a seguinte documentación:
– Acta de conciliación levantada no Xulgado de Paz de Lobios.
– Informe de deslindamento e planos.
– Acta de deslindamento.
– Certificacións das respectivas asembleas xerais.
Terceiro. O 30.9.2022 foi a CMVMC de Bouzas, Briñidelo, Esperanzo e San Paio quen presentou un escrito (Rexel 2022/2410507), en que solicitaban a aprobación dun deslindamento coa CMVMC das parroquias de Araúxo, Lobios e San Paio de Araúxo. Coa solicitude achegaban a seguinte documentación:
– Acta de conciliación levantada no Xulgado de Paz de Lobios.
– Memoria e planos.
– Acta de deslindamento.
– Certificacións das respectivas asembleas xerais.
Cuarto. O informe do Servizo de Montes da Xefatura Territorial de Ourense, do 31 de maio de 2023, fai constar que a documentación achegada corresponde ao deslindamento do perímetro estremeiro entre o MVMC do Puxedo, Guende e Cela, pertencente á CMVMC do Puxedo, Guende e Cela, e mais o MVMC de Bouzas, pertencente á CMVMC de Bouzas, Briñidelo, Esperanzo e San Paio, desde o vértice 1 (o situado máis ao O) ata o vértice 16 (o situado máis ao E); doutro lado, revísase a estrema entre o propio MVMC do Puxedo, Guende e Cela e mais o MVMC Serra de Lobios e Nichos, pertencente á CMVMC das parroquias de Araúxo (San Martiño), Lobios (San Miguel) e San Paio de Araúxo (agás O Puxedo e Guende), dende o vértice 1 (o situado máis ao O) ata o vértice 13 (o situado máis ao E); e, finalmente, revísase a estrema entre o MVMC de Bouzas e mais o MVMC Serra de Lobios e Nichos, desde o punto 1 (o situado máis ao E) ata o punto 9 (o situado máis ao O).
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.
Consideracións legais e técnicas:
Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Montes Veciñais en Man Común, logo do exame da documentación presentada, ditará resolución, que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 31 de maio de 2023, o Xurado Provincial de Montes Veciñais en Man Común acordou, por unanimidade, o día 9 de abril de 2024:
Aprobar o acto de conciliación acadado polas xuntas reitoras dos MVMC do Puxedo, Guende e Cela, pertencente á CMVMC do Puxedo, Guende e Cela, o MVMC de Bouzas, pertencente á CMVMC de Bouzas, Briñidelo, Esperanzo e San Paio, e o MVMC Serra de Lobios e Nichos, pertencente á CMVMC das parroquias de Araúxo (San Martiño), Lobios (San Miguel) e San Paio de Araúxo (agás O Puxedo e Guende), no concello de Lobios.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 26 de abril de 2024
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense