Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáse publicidade do acordo acadado polo Xurado Provincial de Clasificación de Montes Veciñais en Man Común de Pontevedra na sesión que tivo lugar o 28 de febreiro de 2024 respecto á revisión do esbozo e elaboración da cartografía actualizada do monte veciñal denominado Farelo e Costa da Pena, da Comunidade de Montes Veciñais en Man Común de Aián, Val e Trascastro, no concello de Agolada (expediente RE22050).
O 15.12.2023 o Servizo de Montes desta xefatura territorial emite o seguinte informe:
«Feitos:
Primeiro. O 27.9.2022, número 2022/2373646, a Comunidade de Montes Veciñais en Man Común (en diante, CMVMC) de Aián, Val e Trascastro (Agolada) solicita a revisión do esbozo do monte Farelo e Costa da Pena (Resolución de clasificación do 23 de setembro de 1984). A dita solicitude deu lugar á apertura do expediente RE22050. Constan no expediente logo de varias achegas de documentación:
– Informe técnico da revisión do esbozo do monte veciñal en man común (en diante, MVMC) Farelo e Costa da Pena, parroquia de Trabancas, concello de Agolada, de setembro de 2022, asinada polo enxeñeiro de montes colexiado número 5039.
– Certificado do secretario coa conformidade do presidente da CMVMC de Aián, Val e Trascastro do 4 de setembro de 2022, da aprobación en asemblea xeral do 4.9.2022.
– Cartografía en formato dixital ETRS 89 UTM Zone 29N.
Segundo. O obxecto da revisión do esbozo é parte do perímetro do MVMC Farelo e Costa da Pena, con Resolución de clasificación do 23 de febreiro de 1984 e unha superficie de 286 ha. Proponse a modificación do perímetro cos propietarios particulares axustado ao Catastro. A CMVMC de Aián, Val e Trascastro, con NIF V-36255164, posúe a titularidade das parcelas anexas. Estas parcelas foron obxecto dunha concentración parcelaria con data do 7 de setembro de 1989. Tendo en conta esta concentración parcelaria, as parcelas resultantes adxudicadas á CMVMC de Aián, Val e Trascastro e que antes non eran propiedade dela pasan a selo. Esta reorganización da propiedade notifícaselle ao Xurado Provincial de Clasificación de Montes Veciñais en Man Común de Pontevedra, que integrará a superficie concentrada de monte veciñal con plenos efectos xurídicos, con base no punto 6 do artigo 70 da Lei 7/2012, do 28 de xuño, de montes de Galicia.
Segundo os datos do Sistema rexistral forestal, regulado no artigo 126 da Lei 7/2012, de montes de Galicia:
– Non consta contrato de xestión coa Consellería do Medio Rural.
– A CMVMC de Aián, Val e Trascastro dispón dun documento de ordenación forestal inscrito no Rexistro de Montes Ordenados de Galicia co número 360101 e vixente ata 2031.
– Non constan actos de disposición que modifican o perímetro e superficie do MVMC.
– O esbozo respecta o deslindamento coa CMVMC de Farelo, do concello de Antas de Ulla (Lugo).
Terceiro. A superficie e perímetro da revisión do esbozo proposto total é de 247,93 ha e 17,10 qm e, segundo o indicado na memoria técnica, queda definido do seguinte xeito:
Monte: Farelo e Costa da Pena.
Superficie: 247,93 ha.
Norte: montes da parroquia de Borraxeiros.
Leste: monte do termo de Antas de Ulla (Lugo).
Sur: montes da parroquia de Ventosa.
Oeste: predios particulares de Aián, Val e Trascastro e montes de Couso, Lamas, Romariz e Trabancas.
Cuarto. O 30.11.2022, o Xurado Provincial de Clasificación de Montes Veciñais en Man Común de Pontevedra acorda solicitarlle ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Aián, Val e Trascastro (Agolada), expediente RE22050, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en adiante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, e axustaranse e completaranse con aqueles datos e documentos que se consideren necesarios, en particular os requiridos para a súa inmatriculación no rexistro da propiedade.
2. Para estes efectos, o Xurado Provincial de Clasificación de Montes Veciñais en Man Común, de oficio ou por instancia de parte, poderá solicitarlle á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no rexistro da propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo Xurado, porase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase realizar marcaxe dos montes veciñais, que en todo caso se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, porase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade das persoas interesadas de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo do monte Farelo e Costa da Pena proposta polo Servizo de Montes é a presentada pola CMVMC de Aián, Val e Trascastro, e queda definido consonte os datos reflectidos no feito terceiro e a documentación achegada».
Vista a proposta de revisión presentada polo Servizo de Montes sobre a adaptación do esbozo do monte veciñal denominado Farelo e Costa da Pena, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo do monte veciñal denominado Farelo e Costa da Pena, clasificado a prol da CMVMC de Aián, Val e Trascastro (Agolada), segundo a proposta do Servizo de Montes e a planimetría elaborada por el.
Pontevedra, 24 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra