Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada do monte veciñal denominado «Casa das Minas e San Bernabé» da Comunidade de Montes Veciñais en Man Común de Chamadoira, no concello de Cerdedo-Cotobade (expediente RE22054).
O 6.10.2023, o Servizo de Montes desta xefatura territorial emite o seguinte informe:
«Feitos:
Primeiro. O 29.9.2022 e número 2022/2389404, a Comunidade de Montes Veciñais en Man Común (en diante, CMVMC) de Chamadoira (concello Cerdedo-Cotobade) solicita a revisión do esbozo do monte veciñal en man común (en diante, MVMC) de «Casa das Minas e San Bernabé». A dita solicitude deu lugar á apertura de expediente RE22054. Consta no expediente logo de emenda:
– Memoria valorada xustificativa de todas as accións realizadas. Asinada polo enxeñeiro de montes colexiado núm. 3.117 e modificada en setembro de 2023.
– Certificado da secretaria coa conformidade do presidente da CMVMC de Chamadoira do 31.8.2022 da aprobación en Asemblea Xeral do 26.6.2022.
– Cartografía en formato dixital Datum ETRS-89 Fuso 29.
Realízase a revisión de todo o perímetro lindeiro con propietarios particulares e axústase á base cartográfica da Dirección Xeral do Catastro. O MVMC de «Casa das Minas e San Bernabé» fórmase por 2 coutos redondos.
– No couto redondo do norte á CMVMC de Chamadoira axusta ao linde co MVMC de San Bernabé consonte a sentenza xudicial 41/2008 da Audiencia Provincial da Sección núm. 1 de Pontevedra recaída en apelación contra a sentenza pronunciada en autos no xuízo ordinario 517/07 polo Xulgado de Primeira Instancia e Instrución da Estrada (toma de razón do Xurado do MVMC de Pontevedra do 22.2.2010). Ademais, reduce a superficie do seu esbozo cara ao leste para axustar o límite co MVMC de San Bernabé ao rego do Porto das Cubas que é o límite real que se describe na carpeta-ficha de ambos os montes. Ademais, reduce a superficie do seu esbozo no linde sur co MVMC de Corredoira para axustarse ao límite catastral.
– No couto redondo do sur á CMVMC de Chamadoira reduce a superficie do seu esbozo no linde co MVMC de Viduido xa que existe un pasteiro que pertence á CMVMC de Viduido. Descóntase do MVMC de Chamadoira a superficie de dominio público de estradas.
Non se modifican os límites co MVMC de Caroi nin co MVMC de Seixo e Regaseis (Cabadosa).
Segundo. O obxecto da revisión do esbozo é parte do perímetro do MVMC «Casa das Minas e San Bernabé» da CMVMC de Chamadoira con Resolución de clasificación do Xurado de MVMC de Pontevedra do 21.9.1978 e unha superficie inicial de 139 ha.
Segundo os datos do Sistema rexistral forestal regulado no artigo 126 da Lei 7/2012, de montes de Galicia:
– Existe o contrato de xestión pública coa Consellería do Medio Rural co número de elenco 3615682 pola totalidade da superficie.
– A CMVMC de Chamadoira dispón dun documento de ordenación forestal inscrito no Rexistro de Montes Ordenados de Galicia co núm. 360312 e vixente ata 2031.
– Non constan actos de disposición que modifican o perímetro e superficie do MVMC.
Terceiro. O perímetro da revisión do esbozo proposto total é de 10,03 quilómetros e unha superficie de 97,74 ha. Non se modifican os límites da resolución de clasificación do MVMC de «Casa das Minas e San Bernabé».
Cuarto. O 30.11.2022, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Chamadoira, expediente RE22054, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas.
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, axustándoos e completándoos con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.
2. Para estes efectos, o Xurado Provincial de Montes Veciñais en Man Común, de oficio ou por instancia de parte, poderá solicitar á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no Rexistro da Propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, poñerase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase proceder á marcaxe dos montes veciñais que, en todo caso, se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, poñerase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo do monte «Casa das Minas e San Bernabé» proposta polo Servizo de Montes é a presentada pola CMVMC de Chamadoira (Cerdedo-Cotobade)».
Vista a proposta de revisión presentada polo Servizo de Montes sobre a adaptación do esbozo do monte veciñal denominado «Casa das Minas e San Bernabé» e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo do monte veciñal denominado «Casa das Minas e San Bernabé» clasificado a prol da CMVMC de Chamadoira (Cerdedo-Cotobade), segundo a proposta do Servizo de Montes e a planimetría elaborada por este.
Pontevedra, 24 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra