Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáse publicidade do acordo acadado polo Xurado Provincial de Clasificación de Montes Veciñais en Man Común de Pontevedra na sesión que tivo lugar o 28 de febreiro de 2024 respecto á revisión do esbozo e elaboración da cartografía actualizada do monte veciñal denominado Gargamala, da Comunidade de Montes Veciñais en Man Común de Gargamala, no concello de Mondariz (expediente RE22060).
O 17.10.2023 o Servizo de Montes desta xefatura territorial emite o seguinte informe:
«Feitos:
Primeiro. O 29.9.2022, con número 2022/2395031, a Comunidade de Montes Veciñais en Man Común (en diante, CMVMC) de Gargamala (concello de Mondariz) solicita a revisión parcial do esbozo do monte veciñal en man común (en diante, MVMC) de Gargamala. A dita solicitude deu lugar á apertura do expediente RE22060. Constan no expediente:
– Memoria técnica da revisión parcial do esbozo do MVMC de Gargamala, de maio de 2022, asinada logo de modificación o 11.10.2023 pola enxeñeira técnica forestal colexiada número 482 do COETF de Galicia.
– Certificado do secretario da CMVMC de Gargamala coa conformidade do presidente do 8.9.2023 da aprobación na asemblea do 16.10.2021.
– Cartografía en formato dixital ETRS 29.
A revisión do esbozo establécese a partir de dúas fontes documentais:
– Tramo I, deslindamento co MVMC de Toutón (concello de Mondariz) consonte a Orde do 31 de xaneiro de 2008 pola que se aproba o deslindamento parcial dos montes veciñais en man común das parroquias de Gargamala e Toutón, pertencentes ás comunidades do mesmo nome, no concello de Mondariz (Pontevedra) (DOG núm. 28, do 8 de febreiro).
– Tramo II, deslindamento co MVMC de Sabaxáns (concello de Mondariz) segundo a Sentenza do Xulgado de Primeira Instancia e Instrución número 2 de Ponteareas no procedemento ordinario 123/2002.
Segundo. O obxecto da revisión do esbozo parcial é o MVMC de Gargamala, clasificado como MVMC polo Xurado Provincial de Clasificación de Montes Veciñais en Man Común de Pontevedra o 15.11.1979, cunha superficie inicial de 1.073 ha.
Segundo os datos do Sistema rexistral forestal de Galicia, existe un contrato de xestión pública co número de elenco 3615610 e unha superficie de 853 ha. Existe unha servidume polo paso da liña eléctrica LAT a 220 kV entre Castrelo de Miño e Pazos de Borbén. Así mesmo, dispón dun instrumento de ordenación inscrito no Rexistro Público de Montes Ordenados de Galicia (en diante, RMOG) co número 3600018 e vixente ata o ano 2030.
Os vixentes instrumentos de xestión da CMVMC de Gargamala, da CMVMC de Sabaxáns e da CMVMC de Toutón respectan os límites establecidos.
Terceiro. A superficie e perímetro da revisión do esbozo proposto é de 954,02 ha e 5,98 qm. Non se modifican os límites do MVMC de Gargamala que constan na resolución de clasificación de MVMC do ano 1979.
Cuarto. O 30.11.2022, o Xurado Provincial de Clasificación de Montes Veciñais en Man Común de Pontevedra acorda solicitarlle ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Gargamala (concello de Mondariz), expediente RE22060, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en adiante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, e axustaranse e completaranse con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.
2. Para estes efectos, o Xurado Provincial de Clasificación de Montes Veciñais en Man Común, de oficio ou por instancia de parte, poderá solicitarlle á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no Rexistro da Propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, porase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase realizar marcaxe dos montes veciñais, que en todo caso se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, porase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade das persoas interesadas de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo parcial do monte Gargamala proposta polo Servizo de Montes é a presentada pola CMVMC de Gargamala (Mondariz), e queda definido consonte os datos reflectidos no feito terceiro, e a cartografía que consta no expediente».
Vista a proposta de revisión presentada polo Servizo de Montes sobre a adaptación do esbozo do monte veciñal Gargamala, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo parcial do monte veciñal Gargamala, clasificado a prol da CMVMC de Gargamala (Mondariz), segundo a proposta do Servizo de Montes e a planimetría elaborada por el.
Pontevedra, 24 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra