Para os efectos previstos no artigo 53 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 2 de outubro de 2023, en relación co deslindamento parcial entre as comunidades de montes veciñais en man común de Mos e Louredo (concello de Mos), ao respecto da estrema común dos seus montes (expediente DC22014).

Feitos:

Primeiro. O 18.9.2022, o presidente da comunidade de montes veciñais en man común (en diante, CMVMC) de Mos presentou no rexistro electrónico da Xunta de Galicia, co núm. de entrada 2022/2292143, a solicitude de deslindamento entre a CMVMC de Mos e a CMVMC de Louredo (concello de Mos).

Os montes veciñais en man común (en diante, MVMC) afectados por este deslindamento son:

– MVMC de Salgueirón e Baloutas (ID monte: 2901) da CMVMC de Mos.

– MVMC de Louredo (ID monte: 2900) da CMVMC de Louredo.

Segundo. Consta no expediente a seguinte documentación do deslindamento consonte o artigo 53 da Lei 7/2012:

– Acta do apeo do deslindamento o 25.1.2022.

– Acta de conciliación nº 6/2022 entre as comunidades no Xulgado de Paz de Soutomaior o 29.6.2022.

– Certificados da aprobación do deslindamento nas asembleas xerais de ambas as CMVMC: CMVMC de Mos o 3.4.2022 e CMVMC de Louredo o 15.5.2022.

– Memoria descritiva co plano de deslindamento e cartografía en formato dixital no Datum ETRS89/UTM zona 29N EPSG: 25829. Asinado en xullo de 2022 polo técnico colexiado núm. 1227 do COETF de Galicia.

– Informes de validación gráfica catastral cos CSV: QAQPF5PM5CXVN98Y e 4PB6VB1JAX75HPZK (para a comunicación da alteración catastral consonte o artigo 55.3 da Lei 7/2012), que polo principio de colaboración entre administracións deberá verificar a Xerencia Territorial de Catastro.

Terceiro. A liña de deslindamento proposta ten unha lonxitude de 286 metros e está composta polos seguintes puntos:

Punto D13-	x: 535.136,8358	y: 4.673.183,4017
Punto D14-	x: 535.215,8143	y: 4.673.135,7101
Punto D15-	x: 535.379,5128	y: 4.673.032,7539

Revisada a cartografía das resolucións de clasificación de ambos os MVMC, detéctase que existe estrema entre ambos e non afecta terceiros propietarios.

O punto D13 non invade a parcela de referencia catastral 36033A00800031 de titularidade particular, sitúase no marco de pedra granítica colocada no seu día pola CMVMC de Mos. A cartografía catastral non se axusta exactamente á realidade.

O punto D15 é o punto no cal converxen a CMVMC de Mos, a CMVMC de Louredo, a CMVMC de Ribadetea e a CMVMC de Xinzo. É coincidente coa Avinza 4/2012 (expediente actual DC23002) Mos-Xinzo e coa Avinza 5/2012 (expediente actual DC23003) Xinzo-Ribadetea e o punto 0 do expediente DC22015 (deslindamento entre a CMVMC de Ribadetea, no concello de Ponteareas, e CMVMC Louredo, no concello de Mos).

A liña non respecta exactamente a liña de deslindamento do Instituto Xeográfico Nacional entre os concellos de Mos e Ponteareas. O deslindamento establécese mediante acordo das comunidades implicadas nel.

A liña de deslindamento produce modificacións na cartografía dos esbozos de clasificación das seguintes comunidades:

– CMVMC de Mos: o expediente de revisión de esbozo RE22031 xa recolle o actual deslindamento. Ten en conta a mellora da Avinza 4/2012 (expediente actual DC23002) Mos e Xinzo e o expediente DC22011 (deslindamento entre a CMVMC de Mos e a CMVMC de Cans)

– CMVMC de Louredo: achega un pequeno axuste para pechar o punto D13 do deslindamento co resto do esbozo do seu MVMC. No punto D15 pecha o esbozo tendo en conta o expediente DC22015.

O Servizo de Montes considera que a solicitude se axusta ao establecido no artigo 53, polo que propón a aprobación do deslindamento segundo a liña presentada.

Consideracións legais e técnicas:

Primeira. A presente resolución dítase de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e consideracións legais e técnicas expostos, o Xurado, por unanimidade dos seus membros,

ACORDA:

Aprobar o deslindamento parcial realizado entre a CMVMC de Mos e a CMVMC de Louredo, ambas no concello de Mos, respecto da súa estrema común, nos termos indicados no feito terceiro.

Contra a presente resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ao da súa publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas e cos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 22 de decembro de 2023

Antonio Crespo Iglesias
Presidente do Xurado Provincial de Clasificación de Montes
Veciñais en Man Común de Pontevedra