Examinada a solicitude de deslindamento formulada polos representantes do monte veciñal en man común (MVMC) Monte de San Mamede de Riobó e Ferradura, pertencente á Comunidade de Montes Veciñais en Man Común (CMVMC) de Riobó, e Lomba, Candás e Rebordiña, pertencente á CMVMC de Arruás, no concello de Vilar de Barrio, resultan os seguintes
Feitos:
Primeiro. O 29.9.2022, a CMVMC de Riobó presentou un escrito (Rexel 2022/2348628) en que solicita a aprobación dun deslindamento coa CMVMC de Arruás.
Coa solicitude achegaron a seguinte documentación:
– Acta de deslindamento.
– Certificacións dos acordos das respectivas asembleas xerais.
– Memoria e planos.
– Solicitude de conciliación.
Segundo. Posteriormente, o 7.10.2022, a dita comunidade presentou un escrito de mellora voluntaria (Rexel 2022/2474504) co que achegaba a correspondente acta de conciliación elaborada o 7.10.2022 no Xulgado de Paz de Vilar de Barrio.
Terceiro. O informe do Servizo de Montes da Xefatura Territorial de Ourense, do 30 de marzo de 2023, fai constar que a documentación achegada corresponde ao deslindamento do perímetro estremeiro entre o MVMC Monte de San Mamede de Riobó e Ferradura, pertencente á CMVMC de Riobó, e o MVMC Lomba, Candás e Rebordiña, pertencente á CMVMC de Arruás, desde o vértice 1 (o situado máis ao O, e identificado como Tapadiña Nova) ata o vértice 6 (o situado máis ao E, e identificado como Presa de Reza).
Logo de analizar os vértices e a súa localización, conclúese que o punto inicial 1 debe ter a consideración de punto auxiliar; isto débese a que o dito vértice non se sitúa sobre a liña intermunicipal actualmente vixente no MTN do IGN, nin tampouco sobre un punto singular ou que conte coa avinza das outras comunidades citadas e que permita concluír inequivocamente que non se está a invadir o termo municipal de Laza nin o de Sarreaus. Pola contra, a adopción do dito punto implicaría crear unha nova raia ou referencia no plano, distinta tanto da liña de termo do IGN coma da liña perimetral procedente da dixitalización das carpetas-ficha, e que achegaría máis dúbidas e inseguridade no relativo á definición, nesa estrema común, dos montes obxecto de deslindamento e mais os xa indicados de Laza e Sarreaus.
Xa que logo, fíxase o punto 1 como referencia para determinar a dirección da liña antes de chegar ao primeiro punto do deslindamento como tal, que sería o 2.
Por outra banda, o punto final da liña, situado na chamada Presa de Reza, marca tamén a confluencia de Riobó e de Arruás coa comunidade de Prado. A este respecto, a dita presa xa fora anteriormente avinzada polas comunidades de Prado e Riobó para precisar o extremo meridional da súa veciñanza, ben que se utilizara como referencia un punto situado uns 13 m ao O do vértice 6 conciliado agora polas comunidades de Riobó e Arruás. En consecuencia, por razóns de coherencia e seguridade xurídica, considérase lóxico e procedente fixar como vértice final do deslindamento Riobó-Arruás o punto 13 (Presa de Reza) da avinza Prado-Riobó, situado nas coordenadas UTM (ETRS89) X: 620956,28; Y: 4666489,01.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación entre o punto 2 e mais a Presa de Reza, definida esta última polo punto de coordenadas X: 620956,28; Y: 4666489,01, e tendo o vértice 1 a consideración de punto auxiliar que permite definir a dirección da liña no tramo inicial.
Consideracións legais e técnicas:
Primeira. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se deberá seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do 30 de marzo de 2023, o Xurado Provincial de Clasificación de Montes Veciñais en Man Común acordou, por unanimidade, o día 11 de decembro de 2023:
Aprobar o acto de conciliación acadado polas xuntas reitoras dos MVMC Monte de San Mamede de Riobó e Ferradura, pertencente á CMVMC de Riobó, e o MVMC Lomba, Candás e Rebordiña, pertencente á CMVMC de Arruás, no concello de Vilar de Barrio.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, de 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 21 de decembro de 2023
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense