Examinada a solicitude de deslindamento formulada polos representantes do monte veciñal en man común (MVMC) San Xusto, Da Ferreira, Da Costa e Feixa, pertencente á Comunidade de Montes Veciñais en Man Común (CMVMC) da parroquia do Condado, e o San Xusto, Pedrosa e Devesa, pertencente á CMVMC de Trado, nos concellos de Padrenda e Pontedeva, resultan os seguintes

Feitos:

Primeiro. O 29.9.2022, a CMVMC da parroquia do Condado presentou un escrito (Rexel 2022/2391982) en que solicitan a aprobación dun deslindamento coa CMVMC de Trado.

Coa solicitude presentaron a seguinte documentación:

– Acta de deslindamento.

– Certificacións dos acordos das respectivas asembleas xerais.

– Informe técnico e planos.

– Acta de conciliación elaborada no Xulgado de Paz de Padrenda.

Segundo. O informe do Servizo de Montes da Xefatura Territorial de Ourense, do 23 de marzo de 2023, fai constar que a documentación achegada corresponde ao deslindamento do perímetro estremeiro entre o MVMC San Xusto, Da Ferreira, Da Costa e Feixa, pertencente á CMVMC da parroquia do Condado, no termo de Padrenda, e mais o MVMC San Xusto, Pedrosa e Devesa, pertencente á CMVMC de Trado, no termo de Pontedeva, desde o vértice 1 (o situado máis ao S) ata o vértice 17 (o situado máis ao NO).

Logo de analizar os antecedentes xurídico-administrativos, conclúese que, de conformidade co indicado no propio informe técnico do deslindamento, se pretende corrixir un presunto erro material existente na representación da liña de termo Padrenda-Pontedeva no tramo en cuestión, a cal deslinda ambos os montes, segundo establecen os respectivos acordos de clasificación; deste xeito, produciríase unha rectificación da dita liña que a desprazaría cara ao N, de forma lixeira entre os vértices 6 e 10 aproximadamente, e de forma xa acusada entre os vértices 10 e 17, chegando a situala a uns 400 m do seu trazado oficial á altura da beira do Miño (vértice 17).

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.

Consideracións legais e técnicas:

Primeira. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, dite resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do 23 de marzo de 2023, o Xurado Provincial de Clasificación de Montes Veciñais en Man Común acordou, por unanimidade, o día 11 de decembro de 2023:

Aprobar o acto de conciliación acadado polas xuntas reitoras dos MVMC San Xusto, Da Ferreira, Da Costa e Feixa, pertencente á CMVMC da parroquia do Condado, no termo de Padrenda, e mais o MVMC San Xusto, Pedrosa e Devesa, pertencente á CMVMC de Trado, no termo de Pontedeva.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 21 de decembro de 2023

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense