Examinada a solicitude de deslinde formulada polos representantes do MVMC Touza, pertencente á CMMVVMC de Soutelo Verde e Carraxó, e do MVMC Xeixadelo e Carballeiras, pertencente á CMMVVMC de Vilameá, no concello de Laza, resultan os seguintes

Feitos:

Primeiro. O 8.7.2022 a CMVMC de Soutelo Verde e Carraxó (V32181133) presentou unha solicitude (REXEL núm. 2022/1792484) de deslindamento por avinza do MVMC Touza co MVMC Xeixadelo e Carballeiras, no concello de Laza.

Coa solicitude achegou a seguinte documentación:

– Acta de deslindamento do 4.3.2022.

– Memoria e planos.

– Acta de conciliación redactada no Xulgado de Paz de Laza.

– Certificacións de aprobación das respectivas asembleas xerais.

Segundo. O informe do Servizo de Montes da Xefatura Territorial de Ourense, do 9 de novembro de 2022, fai constar que o linde obxecto de revisión e acordo inclúe a extensión completa dos límites entre ambos os MVMC.

A configuración espacial do monte, despois da revisión, non varía practicamente do esbozo da clasificación, mantense o aspecto orixinal do esbozo da clasificación e atense ao disposto nas carpetas fichas:

• Touza de Carraxó e Soutelo Verde: polo río abaixo (Támega) divide primeiro cos termos de Castro e despois cos de Vilameá ata o muíño da Poula, de onde sobe cara ao SO, dividindo co monte de Vilameá polo alto da Pipa e segundo unha lomba que chega á Penediña Alta ou Fontiñas, onde xa entra no Monte de Souteliño (...).

• Xeixadelo e Carballeiras de Vilameá: (...) o monte de Souteliño, co que sobe pola valgada de Val de Cobras, de EO ata Penediña Alta ou Fontiñas. Neste punto concorre tamén o monte Touza de Carraxó e Soutelo Verde, co que baixa cara ao NE segundo unha lomba polo alto da Pipa ata baixar ao río Támega polo muíño da Poula.

A superficie do MVMC Touza, co presente deslinde, sería de 782,4526 ha fronte ás 800 ha do acordo de clasificación, o que supón unha redución do 2,2 %. E a superficie do MVMC Xeixadelo e Carballeiras, co presente deslinde, sería de 428,8342 ha fronte ás 456 ha do acordo de clasificación, o que supón unha redución do 6 %.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial súa aprobación.

Consideracións legais e técnicas:

Primeiro. Esta resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes, do 9 de novembro de 2022, o Xurado Provincial de Montes Veciñais en Man Común acordou por unanimidade o día 13 de decembro de 2022:

Aprobar o acto de conciliación acadado polas xuntas reitoras do MVMC Touza, pertencente á CMMVVMC de Soutelo Verde e Carraxó, e do MVMC Xeixadelo e Carballeiras, pertencente á CMMVVMC de Vilameá, no concello de Laza.

Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 26 de xaneiro de 2023

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense