Examinada a solicitude de deslindamento formulada polos representantes do MVMC O Castro, pertencente á CMMVVMC de Lamas de Outeiro e Sabucedo; e do MVMC de Pereira, pertencente á CMMVVMC de Pereira, nos concellos de Cartelle e A Merca resultan os seguintes

Feitos:

Primeiro. O 25.9.2022, a CMMVVMC de Lamas de Outeiro e Sabucedo presentou un escrito (rexel 2022/2348628) en que solicitan a aprobación dun deslindamento coa CMMVVMC de Pereira.

Posteriormente, a dita comunidade presentou outro escrito o día 28.9.2022 (rexel 2022/2386355), co cal achegou a seguinte documentación:

– Acta de deslindamento do 5.8.2022.

– Memoria e planos, incluídos arquivos dixitais vectoriais en formato shape, que conteñen a información xeográfica do deslindamento.

– Acta de conciliación levantada no Xulgado de Paz da Merca.

– Certificacións de aprobación das respectivas asembleas xerais.

– Informe de validación gráfica emitido pola Dirección Xeral do Catastro.

Segundo. O informe do Servizo de Montes da Xefatura Territorial de Ourense do 21 de novembro de 2022 fai constar que a documentación achegada corresponde ao deslindamento do perímetro estremeiro entre o MVMC O Castro, pertencente á CMMVVMC de Lamas de Outeiro e Sabucedo, e o MVMC de Pereira, pertencente á CMMVVMC de Pereira, desde o vértice 1 (o situado máis ao N) ata o vértice 3 (o situado máis ao S).

Consideracións legais e técnicas:

Primeiro. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se vai seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 21 de novembro de 2022, o Xurado Provincial de Montes Veciñais en Man Común acordou por unanimidade o día 13 de decembro de 2022:

Aprobar o acto de conciliación acadado polas xuntas reitoras dos MVMC O Castro, pertencente á CMMVVMC de Lamas de Outeiro e Sabucedo; e do MVMC de Pereira, pertencente á CMMVVMC de Pereira, nos concellos de Cartelle e A Merca

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 26 de xaneiro de 2023

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense