O Pleno do Concello de Verín, en sesión ordinaria de data 18 de febreiro de 2021, adoptou o seguinte acordo:
Antecedentes de feito:
Primeiro. O Concello de Verín dispoñía de Plan xeral de ordenación municipal aprobado pola Orde da Consellería de Medio Ambiente, Territorio e Infraestruturas, de data 7 de decembro de 2012 (DOG núm. 239, do 17.12.2012, e BOP de Ourense núm. 110, do 14.5.2013, en diante PXOM 2012).
Segundo. O dito instrumento de planeamento xeral foi declarado nulo por Sentenza 278/2017 con data 17 de febreiro de 2017, Sala do Contencioso-Administrativo, Sección Quinta, do Tribunal Supremo (recurso de casación número 1125/2016).
Terceiro. Entre as diferentes consecuencias xurídicas derivadas da dita resolución xudicial recobra vixencia a normativa urbanística municipal precedente, no noso caso as normas subsidiarias de planeamento do Concello de Verín, do 28 de maio de 1986 (BOP de Ourense núm. 233, con data 9.10.1986, en diante NNSS 1986).
Cuarto. Como consecuencia da situación urbanística derivada da citada resolución xudicial, o Concello de Verín encargou un estudo-diagnose da situación urbanística á empresa Otima, S.L., que foi remitido á Consellería de Medio Ambiente e Ordenación do Territorio con data 9.11.2017 para os efectos da emisión dos preceptivos informes urbanístico e ambiental dos órganos competentes da Administración autonómica, de acordo co disposto no artigo 88 da Lei 2/2017, do 8 de febreiro, de medidas fiscais, administrativas e de ordenación (en diante LMFAO).
O Concello de Verín pretende dar resposta a esta situación urbanística mediante a adopción de medidas provisionais de ordenación ao abeiro do disposto na LMFAO.
Quinto. Con data 30 de maio de 2018 ten entrada no Rexistro Xeral deste concello un oficio da Secretaría Xeral Técnica da Consellería de Medio Ambiente e Ordenación do Territorio en que se remite o informe urbanístico da Dirección Xeral de Ordenación do Territorio e Urbanismo, con data 23 de maio de 2018, e o informe ambiental da Dirección Xeral de Calidade Ambiental e Cambio Climático con data 11 de decembro de 2017.
Sexto. Con data 21 de xaneiro de 2019 ten entrada no Rexistro Xeral deste concello a Resolución da Dirección Xeral de Calidade Ambiental e Cambio Climático da Consellería de Medio Ambiente e Ordenación do Territorio, con data 11 de xaneiro de 2019 pola que se formula o informe ambiental estratéxico do Instrumento de ordenación provisional do Concello de Verín (DOG núm. 24, do 4.2.2019).
Sétimo. Con data 13 de febreiro de 2019 ten entrada no Rexistro Xeral deste concello o documento técnico de proposta de Instrumento de ordenación provisional (en diante IOP) para o Concello de Verín redactado por Otima, S.L., para someter, de ser o caso, ao acordo de aprobación inicial por parte do Pleno do Concello de Verín.
Oitavo. Mediante acordo do Pleno do Concello de Verín, con data 22 de abril de 2019 aprobouse inicialmente a proposta de IOP.
Noveno. Mediante anuncio publicado no DOG núm. 127, con data 5 de xullo de 2019 abriuse o trámite de información pública durante 20 días hábiles, para os efectos de que calquera interesado formulase as alegacións que considerase oportunas.
Así mesmo, publicouse o trámite de información pública no xornal La Región con data 5 de xullo de 2019.
Décimo. Solicitáronse das administracións públicas competentes os informes sectoriais e as consultas preceptivas, e constan a súa emisión e recepción tal e como se reflicte no expediente administrativo.
Foron notificadas individualmente as persoas titulares catastrais dos terreos afectados para os efectos de que formulasen as alegacións que considerasen oportunas, e deuse e notificouse a debida resposta a quen presentou alegacións.
Visto os informes técnicos e xurídicos do 22 de xaneiro de 2021 e 4 de febreiro de 2021, respectivamente, e o informe da secretaria municipal, do 5 de febreiro de 2021.
Logo de ver o documento técnico denominado Instrumento de ordenación provisional, redactado por Otima, S.L. e presentado neste concello en decembro de 2020, e de acordo co disposto no artigo 93.seis da Lei 2/2017 do 8 de febreiro, de medidas fiscais, administrativas e de ordenación, en relación co artigo 22.2.c) da Lei 7/1985, do 2 de abril, de bases de réxime local,
ACORDO:
Primeiro. Aprobar definitivamente o Instrumento de ordenación provisional segundo o documento técnico redactado por Otima S.L. e presentado neste concello en decembro de 2020, e que se tramita no expediente administrativo 3921/2017.
Segundo. Unha vez aprobada definitivamente a ordenación provisional, publicarase de acordo co establecido nos números 2, 3 e 4 do artigo 82 da Lei 2/2016, do 10 de febreiro, do solo de Galicia.
Por conseguinte, de acordo co disposto no artigo 82.2 da Lei 2/2016, do 10 de febreiro, do solo de Galicia, indícase que as medidas adoptadas para o seguimento dos efectos no ambiente da aplicación do citado instrumento de ordenación provisional se inclúen na memoria xustificativa do documento técnico aprobado definitivamente, que se pode consultar íntegramente no seguinte enderezo electrónico da páxina web do Concello de Verín:
https://www.verin.gal/fixo/iop2020/iop2020.html#C:/iop2020
Segundo o disposto no artigo 82.3 da Lei 2/2016, do 10 de febreiro, do solo de Galicia, o documento que conteña a normativa e as ordenanzas publicarase no Boletín Oficial da provincia de Ourense.
En todo caso, a eficacia do acto de aprobación definitiva e a entrada en vigor do instrumento aprobado quedan condicionadas á inscripción do Instrumento no Rexistro de Planeamento Urbanístico de Galicia, de conformidade co disposto no artigo 88 da Lei 2/2016, do 10 de febreiro, do solo de Galicia.
Contra este acordo, que aproba unha disposición administrativa de carácter xeral, poderase interpor recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contado desde o día seguinte ao da súa publicación, de conformidade cos artigos 10 e 46 da Lei 29/1998, do 13 de xullo, da xurisdición contencioso-administrativa. Todo iso sen prexuízo de que poida interpor calquera outro recurso que puidese considerar máis conveniente ao seu dereito.
Verín, 2 de marzo de 2021
Gerardo Seoane Fidalgo
Alcalde
