Examinada a solicitude de conciliación formulada polos representantes dos MVMC Serra de San Salvador e Serra de Meda e Meda e Montouto, nos concellos de Monterrei e Cualedro, resultan os seguintes

Feitos:

Primeiro. Con data do 15 de decembro de 2017 o presidente da CMVMC de Infesta e Paradiña presentou un escrito no Rexistro da Xefatura Territorial do Medio Rural en Ourense (nº 15077/rx 3065883) relativo a un acto de deslindamento entre os MVMC Serra de San Salvador e Serra de Meda e Meda e Montouto, nos concellos de Monterrei e Cualedro.

Entre outra documentación, achegou a acta de deslindamento, os certificados de aprobación das asembleas, a acta de conciliación ante o Xulgado de Paz de Monterrei e o plano do deslindamento.

Segundo. O 18 de decembro de 2017 presentou no rexistro electrónico da Xunta de Galicia a mesma solicitude.

Terceiro. O informe do Servizo de Montes da Xefatura Territorial de Ourense do 4 de outubro de 2019 indica que a solicitude foi realizada de acordo co artigo 53 da Lei 7/2012, do 28 de xuño, de montes de Galicia. Non obstante, realizou as seguintes consideracións:

A liña que define o perímetro estremeiro invadiría 1,7 m do MVMC Carreiro Ladrón, de acordo cos deslindamentos do MVMC Carreiro Ladrón, co MVMC Meda e Montouto e co MVMC de Rebordondo, aprobados polo xurado provincial o 24 de marzo de 2010. Por este motivo, deberá respectarse esta localización no extremo oeste da liña de deslindamento (punto 1: Tres Cabaleiros). Con esta modificación a liña de deslindamento conciliada apenas varía xa que a distancia máxima coa liña que propón o Servizo de Montes sería duns 0,25 m, no extremo situado máis ao oeste.

O extremo da liña do deslindamento situado máis ao leste (punto 18: Lameiro do Porco) debería ser acordado coa CMVMC de Vences. Non obstante, pódese admitir este punto de xeito que sirva de referencia para definir a dirección da liña do deslindamento do MVMC Meda e Montouto co MVMC Serra de San Salvador e Serra de Meda, sen prexuízo do necesario acordo da CMVMC de Vences para estabelecer mediante outro deslindamento o punto onde finaliza esta liña do deslindamento polo leste.

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se seguirá no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, o Xurado Provincial de Clasificación de Montes Veciñais en Man Común acordou por unanimidade o día 4 de febreiro de 2020:

Aprobar o acto de conciliación acadado polas xuntas reitoras dos MVMC Serra de San Salvador e Serra de Meda e Meda e Montouto, nos concellos de Monterrei e Cualedro, de acordo co informe do Servizo de Montes do 4 de outubro de 2019.

Contra esta resolución, que pon fin á vía administrativa, poderase interpoñer recurso potestativo de reposición ante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 10 de setembro de 2020

Yago Borrajo Sánchez
Presidente do Xurado Provincial de Clasificación
de Montes Veciñais en Man Común de Ourense