Examinada a solicitude de conciliación formulada polos representantes dos MVMC de Tourón e Serra do Faro, no concello de Melón, resultan os seguintes

Feitos:

Primeiro. Con data do 19 de febreiro de 2019 o presidente da CMVMC de Tourón presentou un escrito no Rexistro Electrónico da Xunta de Galicia (nº 2019/rx 350763) en que solicita a aprobación dun deslindamento entre o MVMC de Tourón e o MVMC Serra do Faro, no concello de Melón.

Coa citada solicitude achegou as certificacións de aprobación das respectivas comunidades, a acta de conciliación levantada no Xulgado de Paz de Melón, acta de deslindamento e memoria descritiva con planos topográficos.

Segundo. O informe do Servizo de Montes da Xefatura Territorial de Ourense do 7 de outubro de 2019 indica que a solicitude foi realizada de acordo co artigo 53 da Lei 7/2012, do 28 de xuño, de montes de Galicia.

O perímetro estremeiro acordado queda ben definido mediante a documentación achegada e afecta unicamente os dous montes veciñais citados, se ten un punto (nº 38) no que conflúen co MVMC Monte do Ceo e Cotos, pertencente á CMVMC das Mestas. Este punto localízase no río Cerves, de xeito coincidente coas descricións que figuran nas carpetas-fichas dos expedientes de clasificación, aínda que nestas figura coa denominación río das Mestas.

O punto nº 1 do perímetro estremeiro localízase no camiño da Cabana tamén de xeito coincidente coas descricións que figuran nas carpetas-fichas dos expedientes de clasificación, aínda que nestas figura coa denominación de camiño da Garda.

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento para seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, o Xurado Provincial de Clasificación de Montes Veciñais en Man Común acordou por unanimidade o día 4 de febreiro de 2020:

Aprobar o acto de conciliación acadado polas xuntas reitoras dos MVMC de Tourón e Serra do Faro, no concello de Melón, de acordo co informe do Servizo de Montes do 7 de outubro de 2019.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 10 de setembro de 2020

Yago Borrajo Sánchez
Presidente do Xurado Provincial de Clasificación
de Montes Veciñais en Man Común de Ourense