O 8 de febreiro de 2019 publicouse no Diario Oficial de Galicia a Resolución do 28 de decembro de 2018 pola que se establecen as bases reguladoras para a concesión, en réxime de concorrencia competitiva, das axudas para o programa Industrias do futuro 4.0 (terceira convocatoria), orientado a proxectos de investigación industrial, desenvolvemento experimental e innovación centrados en tecnoloxías industriais innovadoras dentro da iniciativa Industrias 4.0-captación de investimentos, cofinanciadas polo Fondo Europeo de Desenvolvemento Rexional (Feder) no marco do programa operativo Feder Galicia 2014-2020, e se procede á súa convocatoria para o ano 2019 (código de procedemento IN854A).
A dita resolución no artigo 41.2 establecía os seguintes prazos de xustificación para as axudas concedidas na 2ª edición:
Períodos de emisión de facturas (realización de gastos) e realización de pagamentos dos gastos executados:
Primeira anualidade:
– Axudas concedidas na resolución da segunda edición: desde a data de presentación da solicitude ata o 20 de decembro de 2019. No caso de solicitudes denegadas na primeira edición que fosen presentadas tamén á segunda sen modificación ningunha, o período de emisión de facturas poderá remontarse a data de solicitude presentada á primeira edición.
Prazos de presentación de documentación:
Primeira anualidade:
– Axudas concedidas na resolución da segunda edición: ata o 27 de decembro de 2019.
Tendo en conta a demora na resolución da segunda edición das devanditas axudas, motivado pola complexidade das solicitudes presentadas e polo seu proceso de avaliación, e co fin de viabilizar os procesos de execución e xustificación das axudas concedidas na segunda edición por parte dos beneficiarios resultantes, e dado que non causa prexuízo a terceiros, considérase necesario ampliar o prazo de xustificación para o ano 2019, establecido no artigo 41.2 da convocatoria. Asimesmo, a xustificación da axuda debe realizarse a través de informe de auditor inscrito no Rexistro Oficial de Auditores de Contas, conforme o indicado no artigo 20. O contido deste informe ten que responder á revisión pormenorizada dos aspectos recollidos no anexo XIII da convocatoria. A complexidade da elaboración deste informe, unido á demora na resolución de concesión, fan necesaria esa ampliación de prazos para a primeira anualidade (2019), segunda edición.
En consecuencia, no exercicio das facultades que lle confire o artigo 17.3 do Decreto 50/2012, do 12 de xaneiro, polo que se crea a Axencia Galega de Innovación,
RESOLVO:
Artigo único. Modificación do artigo 41.2 da Resolución do 28 de decembro de 2018 pola que se establecen as bases reguladoras para a concesión, en réxime de concorrencia competitiva, das axudas para o programa Industrias do futuro 4.0 (terceira convocatoria), orientado a proxectos de investigación industrial, desenvolvemento experimental e innovación centrados en tecnoloxías industriais innovadoras dentro da iniciativa Industrias 4.0-captación de investimentos, cofinanciadas polo Fondo Europeo de Desenvolvemento Rexional (Feder) no marco do programa operativo Feder Galicia 2014-2020, e se procede á súa convocatoria para o ano 2019 (código de procedemento IN854A)
O artigo 41.2 da citada resolución queda redactado do seguinte xeito:
2. Prazos de xustificación:
Períodos de emisión das facturas (realización de gastos) e realización de pagamentos dos gastos executados:
Primeira anualidade:
– Axudas concedidas na resolución da primeira edición: desde a data de presentación da solicitude ata o 31 de outubro de 2019.
– Axudas concedidas na resolución da segunda edición: desde a data de presentación da solicitude ata o 31 de decembro de 2019. No caso de solicitudes denegadas na primeira edición que fosen presentadas tamén á segunda sen modificación ningunha, o período de emisión de facturas poderá remontarse a data da solicitude presentada á primeira edición.
Segunda anualidade:
– Axudas concedidas na resolución da primeira edición: desde o 1 de novembro de 2019 ata o 31 de outubro de 2020.
– Axudas concedidas na resolución da segunda edición: desde o 1 de xaneiro de 2020 ata o 31 de outubro de 2020.
Terceira anualidade: para as dúas edicións, desde o 1 de novembro de 2020 ata o 31 de outubro de 2021.
Cuarta anualidade: para as dúas edicións, desde o 1 de novembro de 2021 ata o 30 de xuño de 2022.
Prazos de presentación da documentación:
Primeira anualidade:
– Axudas concedidas na resolución da primeira edición: ata o 15 de novembro de 2019.
– Axudas concedidas na resolución da segunda edición: ata o 24 de xaneiro de 2020.
Segunda anualidade: para as dúas edicións, ata o 15 de novembro de 2020.
Terceira anualidade: para as dúas edicións, ata o 15 de novembro de 2021.
Cuarta anualidade: para as dúas edicións, ata o 15 de xullo de 2022.
Estes prazos poderán axustarse en función da data en que se resolva a convocatoria, tras a tramitación do procedemento correspondente e cos informes preceptivos.
Disposición derradeira única. Entrada en vigor
Esta resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 13 de decembro de 2019
Patricia Argerey Vilar
Directora da Axencia Galega de Innovación