Esta resolución ten por obxecto eliminar documentos pertencentes ao patrimonio documental de Galicia de acordo coa normativa que establece o procedemento, a Lei 7/2014, do 26 de setembro, de arquivos e documentos de Galicia, e o Decreto 15/2016, do 14 de xaneiro, que regula a composición do Consello de Avaliación Documental de Galicia.

A Lei de arquivos e documentos establece que non se poderá eliminar ningún documento público se antes non foi avaliado e seleccionado de acordo co procedemento que se estableza para tal fin.

No procedemento de avaliación, regulado no título II do Decreto 15/2016, establécese que as propostas de avaliación serán sometidas a ditame do Consello de Avaliación Documental de Galicia, que elaborará as táboas de avaliación documental, que serán aprobadas polo titular da consellería competente en materia de arquivos e patrimonio documental, quen disporá a publicación do seu extracto no Diario Oficial de Galicia.

A serie documental avaliada refírese aos expedientes de liquidación do imposto do incremento do valor dos terreos de natureza urbana no momento da súa transmisión.

O Consello de Avaliación Documental de Galicia, na súa sesión do 7 de novembro de 2017, emitiu o seu ditame a través da táboa de avaliación documental, aprobada polo titular da consellería competente en materia de arquivos e patrimonio documental, publicada no DOG número 23, do 1 de febreiro de 2018.

O Concello de Ferrol presentou a proposta de eliminación dunha fracción desta serie, que foi ditaminada polo Consello de Avaliación Documental de Galicia na reunión do 12 de decembro de 2018.

Para estes efectos, no exercicio das facultades que me confire o artigo 34 da Lei 1/1983, do 22 de febreiro, reguladora da Xunta e da súa Presidencia, modificada parcialmente pola Lei 11/1988, do 20 de outubro, e de conformidade co disposto no Decreto 15/2016, do 14 de xaneiro, que regula o procedemento de avaliación e selección documental,

RESOLVO:

Primeiro

Aprobar a eliminación da fracción da serie documental de expedientes de liquidación do imposto do incremento do valor dos terreos de natureza urbana, que se detalla no anexo e que se custodia no Arquivo Municipal de Ferrol.

Segundo

A eliminación estará suxeita aos prazos, mostraxes e demais formalidades previstas na táboa de avaliación aprobada e no procedemento de eliminación establecido.

Terceiro

A destrución certificada farase de acordo cos estándares vixentes para o cumprimento na normativa de protección de datos e na confidencialidade e seguridade de todo o proceso desde a súa recollida, transporte, almacenamento, destrución e reciclaxe final, en consonancia coa lexislación ambiental.

Cuarto

O titular dos documentos e o/a arquiveiro/a responsable asinarán a acta da eliminación efectuada de acordo co disposto no procedemento de eliminación e a remitiranlles ao órgano superior con competencias en materia de arquivos e patrimonio documental no prazo dos 10 días seguintes á eliminación.

Quinto

Na acta de eliminación farase constar a fracción da serie eliminada, con indicación dos datos identificadores, do produtor, do procedemento, datas extremas, volume, soporte e, de ser o caso, a técnica de mostraxe utilizada.

Coa acta xuntarase unha certificación da empresa que realice a eliminación en que conste a data de destrución e o sistema empregado para facela, de maneira que se garanta a eliminación total dos documentos.

Sexto

Ordenar a publicación desta resolución no Diario Oficial de Galicia.

Sétimo

A autorización non se fará efectiva ata transcorridos tres meses desde a publicación no DOG desta resolución, sempre que nese prazo non haxa constancia da interposición de recurso de calquera natureza contra ela.

Oitavo

Non se levará a cabo a destrución de documentos autorizada ata que a presente resolución, no caso de ser impugnada, adquira firmeza.

Noveno

Esta resolución pon fin á vía administrativa e contra ela poderá interporse, potestativamente, recurso de reposición ante o mesmo órgano que a ditou, no prazo dun mes, ou directamente recurso contencioso-administrativo ante o Tribunal Superior de Xustiza de Galicia, conforme o disposto na Lei 39/2015, do 1 de outubro, do procedemento administrativo común das administracións públicas.

Santiago de Compostela, 20 de decembro de 2018

Román Rodríguez González
Conselleiro de Cultura e Turismo

ANEXO

Relación de series documentais a eliminar

Código da táboa de avaliación	007.
Publicación da resolución	Orde do 10 de xaneiro de 2018, da Consellería de Cultura, Educación e Ordenación Universitaria (DOG núm. 23, do 1 de febreiro de 2018).
Código da serie documental	AL 548.
Denominación da serie documental	Expedientes do imposto sobre o incremento do valor dos terreos de natureza urbana.
Procedencia	Concello de Ferrol.
Datas da fracción de serie que se vai eliminar	1985-2012.
Ditame	Eliminación total da serie documental aos 5 anos da finalización dos expedientes que non foron obxecto de reclamación, recurso, denuncia ou calquera outro acto de calquera tipo que interrompa os prazos legais de prescrición.
Volume	Volume da fracción de serie: 456 unidades de instalación. Mostraxe: un exemplar por ano.