Para os efectos previstos no artigo 53 da Lei 7/2013, do 28 de xuño, de montes de Galicia, dáse publicidade ao acordo que o Xurado Provincial de Clasificación de Montes Veciñais en Man Común de Pontevedra, en sesión que tivo lugar o día 30 de xuño de 2015, adoptou en relación co deslindamento parcial entre as comunidades de montes veciñais en man común de Cerdeira e a comunidade de San Cibrán de Ribarteme, no concello das Neves respecto do linde común dos seus montes.

Antecedentes de feito:

Primeiro. A Lei 7/2012, do 28 de xuño, de montes de Galicia (DOG núm. 140, do 23 de xullo), na súa disposición derradeira segunda modifica o artigo 25 da Lei 13/1989, do 10 de outubro, de montes veciñais en man común, e elimina a obriga da Administración forestal de proceder ao deslindamento e sinalamento dos montes veciñais. Polo tanto, esta competencia corresponde ás comunidades propietarias, consonte os artigos 53 e 54 da Lei de montes de Galicia.

Segundo. Con data do 18.5.2015 a CMVMC de San Cibrán de Ribarteme comunica ao Xurado de MVMC de Pontevedra o acordo coa CMVMC de Cerdeira de deslindamento entre ambas as comunidades. Xunta a seguinte documentación, consonte o artigo 53 da Lei 7/2012: acta de apeo, acto de conciliación no Xulgado de Paz das Neves, certificados de aprobación en asemblea xeral de ambas as comunidades e cartografía dixital.

Terceiro. Con data do 4.6.2015, o xefe da sección de topografía informa: «A CMVMC de Cerdeira clasificou o antigo monte de utilidade pública núm. 327, este monte está deslindado e marcado. A CMVMC de San Cibrán de Ribarteme clasificou o antigo monte de utilidade pública núm. 324, este monte está deslindado e marcado. O deslindamento modifica este marcado desde o marco núm. 1 ata o 44. No suposto caso de aprobación deste deslindamento habería que cambialos. Este deslindamento parte terreos que non son propiedade destas dúas comunidades de montes, incluso coloca un punto dentro do enclave C “Estadullos”».

Cuarto. Descrición da liña poligonal formada por Coto de Viernes-Estadullo ou Freixa-Pedra que Bole de 2.181,48 metros, que determina o deslindamento de mutuo acordo entre os montes veciñais en man común de Cerdeira e San Cibrán de Ribarteme realizado polo enxeñeiro operador Roberto O Campo Cardalda e formada polos seguintes puntos (ED-50 UTM fuso 29):

Punto 1. Coto de Viernes x=551.335,40 y=4.664.494,48

Punto 2. x=551.475,39 y=4.664.457,02

Punto 3. x=551.683,14 y=4.664.401,32

Punto 4. x=551.934,23 y=4.664.334,02

Punto 5. Estadullos x=552.200,88 y=4.664.262,56

Punto 6. x=552.332,78 y=4.664.385,12

Punto 7. x=552.471,07 y=4.664.513,62

Punto 8. x=552.583,97 y=4.664.618,52

Punto 9. x=552.715,06 y=4.664.740,32

Punto 10. x=552.822,04 y=4.664.839,72

Punto 11. x=553.003,01 y=4.665.007,92

Punto 12. x=553.116,47 y=4.665.113,42

Punto 13. Pedra que Bole x=553.142,50 y=4.665.137,61

Por todo o exposto emítese informe de xeito favorable sobre o deslindamento solicitado, sempre que se respecten os enclaves non clasificados a favor destas comunidades, e en especial os enclaves: C «Estadullos», e «Cavada da Xesta» e D «Chan da Ran». Así mesmo, será un reinvestimento no monte prioritario a recolocación dos marcos núm. 1 ao 44, consonte o artigo 125 da Lei 7/2012, do 28 de xuño, de montes de Galicia.

Consideracións xurídicas:

Primeira. A Lei 7/2012, do 28 de xuño, de montes de Galicia, na súa disposición transitoria décimo cuarta establece que, para adecuar as avinzas realizadas con anterioridade á entrada en vigor desta lei ao procedemento de deslindamento entre montes veciñais en man común previsto nos artigos 53 e 54, deberán publicarse no Diario Oficial de Galicia as resolucións do xurado.

Segunda. Da documentación achegada polas comunidades e do informe técnico do Servizo de Montes desta xefatura territorial, conclúese que a avinza entre a CMVMC de Cerdeira e a CMVMC de San Cibrán de Ribarteme (As Neves) son congruentes coas respectivas resolucións de clasificación e cos lindes nelas descritos.

Vista a avinza presentada, a documentación achegada con esta e o informe técnico do Servizo de Montes da Xefatura Territorial da Consellería do Medio Rural e do Mar en Pontevedra, este xurado, en atención ao disposto nos artigos 53, 54 e na disposición transitoria décimo cuarta da Lei 7/2013, de montes de Galicia, por unanimidade, acorda:

Primeiro. Aprobar a avinza realizada entre a CMVMC de Cerdeira e a CMVMC de San Cibrán de Ribarteme respecto do seu linde común nos termos indicados no antecedente de feito cuarto e segundo os planos topográficos achegados e validados mediante informe técnico do Servizo de Montes.

Segundo. Notificar este acordo ás comunidades propietarias afectadas e publicalo no Diario Oficial de Galicia para dar cumprimento ao disposto na Lei 7/2012, do 28 de xuño, de montes de Galicia.

Contra a presente resolución, que pon fin á vía administrativa, poderase interpoñer, con carácter potestativo, recurso de reposición perante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo perante o Xulgado do Contencioso-Administrativo de Pontevedra no prazo de dous meses contados desde o día seguinte ao da presente notificación, de acordo co disposto no artigo 116 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 31 de xullo de 2015

Miguel Ángel Pérez Dubois
Presidente do Xurado Provincial de Clasificación de Montes Vecinais
en Man Común de Pontevedra