En cumprimento do disposto no artigo 5 do Decreto 442/1990, do 13 de setembro, de avaliación de impacto ambiental para Galicia, así como o disposto no Real decreto lexislativo 1/2008, do 11 de xaneiro, polo que se aproba o texto refundido da Lei de avaliación de impacto ambiental de proxecto, faise pública a declaración de impacto ambiental, formulada pola Secretaría Xeral de Calidade e Avaliación ambiental o 16 de abril de 2015, relativa ao proxecto de trazado e estudo de impacto ambiental da obra de conexión CG 1.5 en San Paio-Portobravo, nos concellos de Lousame e Noia (A Coruña).
Santiago de Compostela, 23 de xuño de 2015
Francisco Menéndez Iglesias
Director da Axencia Galega de Infraestruturas
Declaración de impacto ambiental formulada pola Secretaría Xeral de Calidade
e Avaliación Ambiental no 16 de abril de 2015, relativa ao proxecto de trazado
e estudo de impacto ambiental da obra de conexión CG 1.5 en San Paio-Portobravo, AC/12/031.01, nos concellos de Lousame e Noia (A Coruña), promovido pola Axencia Galega de Infraestruturas (antiga Dirección Xeral de Infraestruturas) (2013/0014)
De conformidade coa proposta do Servizo de Prevención e Xestión Ambiental da Subdirección Xeral de Avaliación Ambiental que a seguir se transcribe:
O Real decreto lexislativo 1/2008, do 11 de xaneiro, polo que se aproba o texto refundido da Lei de avaliación de impacto ambiental de proxectos establece no seu artigo 3 que os proxectos públicos ou privados consistentes na realización de obras, instalacións ou calquera outra actividade comprendida no anexo I deberán someterse a unha avaliación de impacto ambiental, na forma prevista na antedita lei cando así o decida o órgano ambiental.
A conexión CG 1.5 en San Paio-Portobravo atópase incluída no anexo I, grupo 6.a.1 (construción de estradas e autovías, vías rápidas e estradas convencionais de novo trazado) polo que, procedendo o seu sometemento a avaliación de impacto ambiental na forma prevista na sección 1ª do capítulo II da citada lei, por decisión do secretario xeral de Calidade e Avaliación Ambiental, procede formular a súa declaración de impacto ambiental, de acordo co artigo 12.1 da citada lei.
1. Promotor e órgano substantivo. Obxecto. Descrición e localización da actuación.
1.1. Promotor e órgano substantivo.
O promotor e o órgano substantivo da actuación é a Axencia Galega de Infraestruturas (AXI).
1.2. Obxecto.
O presente proxecto de trazado ten por obxecto mellorar a conexión do corredor CG 1.5 Brión-Noia en San Paio co núcleo de Portobravo, no concello de Lousame. Para isto formúlase unha nova vía cunha lonxitude aproximada de 800 m con enlace ás estradas autonómicas AC-543, AC-311 e AC-308, que proporcionan unha conexión máis corta e segura ao evitar o treito en travesía; tamén mellorarán as interseccións existentes coa construción de tres novas rotondas. Esta conexión, ademais, dotará de maior accesibilidade o núcleo de Noia e o seu polígono industrial.
1.3. Descrición e localización da actuación.
A documentación presentada propón 3 alternativas e a alternativa seleccionada é a alternativa 1.
Na actualidade, a conexión de Lousame coa CG1.5 realízase ao través da AC-543 e a AC-311, que conecta esta con Noia.
O trazado da AC-311 é sinuoso e practicamente en toda a súa lonxitude pode asimilarse a unha travesía, tendo en conta as incontables edificacións que existen en ambas as marxes. Isto fai que a conexión de Lousame e o corredor CG 1.5 non sexa cómoda nin rápida para os usuarios nin segura para os peóns. O proxecto ten por obxectivo, entre outros, eliminar este problema e habilitar unha nova vía para mellorar as condicións de seguranza viaria do itinerario.
A nova actuación proxectada permitirá reducir en máis dun kilómetro de lonxitude o traxecto que na actualidade deben realizar os vehículos que se desprazan cara a Lousame a través da estradas AC-311 e AC-308.
Por outra banda, as actuacións propostas van supoñer unha mellora na seguranza viaria por canto se resolven dúas interseccións que na actualidade non dispoñen da suficiente visibilidade para garantir plenamente a seguranza viaria.
Trazado.
O trazado presenta tres eixes e tres rotondas.
En primeiro lugar, resólvese a conexión entre as estradas AC-543 e CP-570. Na actualidade a citada intersección realízase de xeito directo, sen que exista carril central de espera para facilitar os movementos á esquerda e por outra banda, as condicións de visibilidade son adversas. Tendo en conta que se opta no presente proxecto polo acondicionamento do treito de baixada da CP-5702 cara a AC-311, o que sen dúbida incrementará o número de vehículos que utilicen a citada intersección, proponse unha restruturación desta de xeito que se consiga unha mellora na súa seguranza viaria. Para isto, proponse a construción dunha rotonda de 27 m de diámetro, denominada no proxecto rotonda 1. Paralelamente, é necesario rectificar o trazado da CP-5702 na zona da rotonda, que dá lugar aos eixes 1 (treito da marxe dereita) e 2.
Para resolver o treito de baixada cara á AC-311 aprovéitase na súa práctica totalidade o eixe da propia CP-5702 e proponse unicamente un lixeiro aumento na súa sección transversal. Próximo ao entroncamento coa referida vía, proxéctase unha pequena rectificación do trazado actual, co obxecto de lograr un entroncamento axeitado coa nova rotonda da AC-311.
A intersección da AC-311 co treito da CP-5702 e a nova vía de conexión a Lousame resólvese mediante unha rotonda de 24 m de diámetro. O eixe que define esta nova actuación denomínase rotonda 2. Esta actuación resolve, ademais, o actual problema de seguranza viaria existente, debido a que a configuración actual da intersección non dispón da suficiente visibilidade como para garantir a seguranza e os xiros á esquerda.
No citado punto, tendo en conta a natureza eminentemente urbana do contorno, optouse por proxectar a urbanización da nova rotonda. Para isto, proponse a construción de beirarrúas e a implantación dun sistema de iluminación viaria na rotonda, así como a instalación dun sistema de rega automática para a vexetación localizada no illota interior.
Desde este punto, proxéctase unha nova vía, cunha lonxitude aproximada de 800 m, que serve para dar a conexión coa zona de Lousame. O trazado proxéctase cunha velocidade de proxecto de 60 km/h e consta de catro aliñacións, unha delas recta. Tendo en conta o alzado, mantense un descenso en todo o treito cunha pendente lonxitudinal media do 6 %. Analizouse a necesidade de dispor do carril especial para vehículos lentos, que deu por resultado que este non é necesario. O eixe que define a nova vía denomínase no proxecto eixe 3.
O trazado finaliza na estrada AC-308, p.q. 15+000, onde se proxecta na última rotonda, denominada rotonda nº 3. O diámetro exterior da rotonda é de 28 m.
A sección transversal proposta para os 3 eixes proxectados queda definida por dous carrís de 3,50 m cada un e dúas beirarrúas exteriores de 1,00 m.
As rotondas proxéctanse con dous carrís de 4,00 m e beirarrúas exterior e interior de 1,00 m.
Co obxecto de garantir o acceso a todas as leiras da zona do proxecto cuxa accesibilidade vaia ser diminuída como consecuencia da execución da nova vía, proxectáronse un total de 4 camiños de servizo, cun largo de plataforma de 3,00 m.
Alternativa seleccionada_Alternativa 1
2. Tramitación.
2.1. Antecedentes.
Como se comentou anteriormente, a actuación encóntrase comprendida no grupo 6, punto a.1 do anexo I do Real decreto lexislativo 1/2008, do 11 de xaneiro, de avaliación de impacto ambiental, e dentro do procedemento de aprobación substantiva sométese ao trámite de avaliación de impacto ambiental.
En cumprimento do establecido regulamentariamente, con data do 22 de maio de 2014 publícase no DOG nº 97 a Resolución do 15 de maio de 2014, da Axencia Galega de Infraestruturas (antiga Dirección Xeral de Infraestruturas), pola que se somete a información pública o proxecto de trazado e o estudo de impacto ambiental da conexión CG 1.5 en San Paio-Portobravo, de clave AC/12/031.01, nos concellos de Noia e Lousame, así como a relación individual de bens e dereitos e propietarios afectados.
Durante este período foron presentadas alegacións por parte de particulares e administracións locais e provinciais, tendo en conta o condicionado desta declaración de impacto ambiental e, no que procede, as que teñen carácter ambiental.
Con data do 21 de outubro de 2014, ten entrada o expediente ambiental, remitido pola Axencia Galega de Infraestruturas, no cal se inclúen certificados de exposición, copia das alegacións presentadas no dito período e os informes do Instituto de Estudos do Territorio, a Secretaría Xeral de Calidade e Avaliación Ambiental, a Dirección Xeral de Innovación e Xestión da Saúde Pública, a Dirección Xeral do Patrimonio Cultural e a Deputación Provincial da Coruña.
Posteriormente, nas datas 12 de novembro de 2014 e 18 de novembro de 2014 a Axencia Galega de Infraestruturas remite o informe da Dirección Xeral de Conservación da Natureza e de Augas de Galicia, recibidos con posterioridade ao período de información pública da referida actuación.
Cumprida a tramitación, a Secretaría Xeral de Calidade e Avaliación Ambiental, no exercicio das competencias que lle concede o Decreto 44/2012, do 19 de xaneiro, formula a declaración de impacto ambiental (DIA) do proxecto de trazado e o estudo de impacto ambiental da conexión CG 1.5 en San Paio-Portobravo, de clave AC/12/031.01.
3. Ámbito da DIA e condicións ambientais.
3.1. Ámbito da DIA.
A presente declaración refírese ás obras definidas no documento do proxecto de trazado e estudo de impacto ambiental da conexión CG 1.5 en San Paio-Portobravo, de clave AC/12/031.01, nos concellos de Noia e Lousame, na provincia de A Coruña, na configuración relativa á alternativa 1, recollida no documento nº 2 (planos), no documento nº 3 (planta xeral), clave AC/12/031.01.
3.2. Análise técnica.
O ámbito de actuación atópase dentro do sistema de explotación nº 06 (río Tambre e ría de Muros), e vese afectado un leito fluvial sen denominación no PHGC e dunha lonxitude aproximada de 1.177 m, afluente do río Vilacova ou Manlle IDRío PH 208.
Con base nos requirimentos da Directiva 2007/60/CE, relativa á avaliación e xestión dos riscos de inundación, no ámbito do estudo non está delimitada ningunha área con risco potencial significativo de inundación no ámbito directo de execución da obra sometida a informe.
No ámbito da actuación non se observa ningunha zona protexida dentro do Rexistro de Zonas Protexidas do Plan hidrolóxico Galicia-Costa.
Analizada a zona de actuación, obsérvase que o desenvolvemento da actuación non afecta ningún espazo natural protexido.
Por outra banda, revisado o Inventario de humidais de Galicia (IHG), obsérvase que a alternativa proposta non afecta ningunha das zonas húmidas recollidas no dito inventario.
En canto ás augas superficiais, hai que sinalar que os traballos de execución da nova infraestrutura non afectarán directamente ningún curso permanente, aínda que intercepta dúas liñas de escorremento de escasa importancia, que serán resoltas mediante obras de drenaxe transversal, unha da cales será empregada como paso da fauna.
En atención ao punto 3 do artigo 45 da Lei 42/2007, do 13 de decembro, do patrimonio natural e da biodiversidade, relativo ás medidas necesarias para evitar a deterioración ou a contaminación dos hábitats situados fóra da rede Natura 2000, comprobouse, segundo a información do Atlas dos hábitats naturais e seminaturais de España (2005) do Ministerio de Agricultura, Alimentación e Medio Ambiente que no ámbito das actuacións non existen máis representacións de hábitats naturais de interese comunitario nin prioritario que os recollidos no anexo I da Lei 42/2007, do 13 de decembro.
Non é presumible a afección sobre ningunha árbore senlleira ou formación deste tipo incluída no Catálogo galego de árbores senlleiras.
No que se refire á flora de interese inventariada na zona, débese sinalar que no ámbito da actuación se encontran especies que están incluídas no Catálogo galego de especies ameazadas (Decreto 88/2007, do 19 de abril, polo que se regula o Catálogo galego de especies amezadas, modificado polo Decreto 164/2011, do 4 de agosto).
Non entanto, información máis detallada, como a proporcionada polo Atlas da flora vascular ameazada en España, non localiza ningunha especie de flora ameazada no ámbito de actuación.
En canto á fauna vertebrada, hai que sinalar que segundo a información proporcionada polo Sistema de información territorial da biodiversidade, o proxecto atópase dentro do ámbito de especies incluídas no citado Catálogo galego de especies ameazadas.
Respecto dos plans de conservación e/ou recuperación de especies ameazadas vixentes, o ámbito das actuacións está afectado polo Plan de recuperación da subespecie lusitana da escribenta das canaveiras (Emberiza schoeniclus L. subsp. lusitanica Steinbacher) en Galicia, aprobado mediante o Decreto 75/2013, do 10 de maio.
3.3. Condicións ambientais.
3.3.1. Atmosfera.
Levaranse a cabo as medidas recollidas no estudo de impacto ambiental para a protección da atmosfera, incluíndo nelas limpeza ou lavado das rodas da totalidade dos camións á saída da zona de obras.
Cumprirase co disposto na Lei 37/2003, do 13 de novembro, do ruído, no referente á zonificación acústica, obxectivos de calidade e emisións acústicas, desenvolvida nos reais decretos 1367/2007, do 19 de outubro, e 1513/2005, do 16 de decembro, e modificada polo Real decreto lei do 1 de xullo, de medidas de apoio aos debedores hipotecarios, de control do gasto público e cancelación de débedas con empresas e autónomos contraídas polas entidades locais, de fomento da actividade empresarial e impulso da rehabilitación e de simplificación administrativa; asemade, cumprirase coas ordenanzas municipais dos concellos afectados pola actuación.
Calquera actividade puntual programable que poida supor un incremento nos niveis de presión sonora realizarase sempre que sexa posible en período diúrno.
3.3.2. Augas.
No caso de que existan outros cursos fluviais ademais dos indicados no número 3.2 (análise técnica) da presente declaración, seralles de aplicación a normativa da lexislación de augas e terán plena vixencia as prescricións establecidas para o dominio público hidráulico.
Calquera actuación que se desenvolva na zona de policía ou de servidume de leitos fluviais precisará autorización de Augas de Galicia seguindo os artigos 9.4, 78 e 126 do Regulamento do dominio público hidráulico.
Para minimizar os riscos por inundacións, na normativa do Plan hidrolóxico Galicia-Costa establécese unha serie de prescricións, especialmente nos artigos 42 e 43, que será preciso ter en conta no proxecto construtivo.
Coas obras de drenaxe preténdese minimizar o efecto barreira ante as augas que poidan ser recollidas tanto na propia obra como na bacía de recolla augas arriba, de maneira que se manteñan os réximes da auga.
Como característica fundamental do sistema de drenaxe lonxitudinal débese indicar que, dadas as dificultades de escavación adicional unha vez efectuada a escavación da caixa da estrada, e coas grandes dimensións das cunetas de bordo, preténdese evitar a introdución de colectores baixo as ditas cunetas, que se desaugarán ás obras de drenaxe transversal ou saídas específicas ao terreo onde as condicións topográficas o permitan.
Para minimizar a afección ao medio hídrico, as obras executaranse de xeito que a incidencia sobre o medio hídrico sexa mínima. En todo caso, no referido a obras de drenaxe lonxitudinal, estas non poderán engadir a unha valgada áreas vertentes superiores en máis dun 10 % á superficie da bacía propia.
En calquera caso, seguiranse as prescricións establecidas nos artigo 42 e 43 da Normativa do Plan hidrolóxico Galicia-Costa. Deberanse xustificar ante Augas de Galicia os períodos de retorno utilizados, atendendo ás peculiaridades da zona e ás características das infraestruturas, así como á súa afección a DPH.
A execución das obras relativas ao proxecto leva unidos traballos en dominio público e zona de policía e a empresa adxudicataria das obras deberá solicitar a correspondente autorización de obras.
Para a realización de verteduras a calquera curso fluvial deberá contarse coa preceptiva autorización de vertedura de Augas de Galicia.
3.3.3. Protección dos solos.
Balizaranse e sinalizaranse as zonas de obra e todas as infraestruturas e instalacións proxectadas, estando prohibido ocupar terreos fóra do previsto. Este balizamento e sinalización deberán manterse en perfecto estado durante o transcurso das obras e serán retirados cando estas finalicen.
Tamén se procederá a balizar ou, se for o caso, a sinalizar todos aqueles elementos de interese situados no contorno do proxecto (basicamente todas aquelas masas e formacións vexetais de interese ambiental e elementos do patrimonio cultural) co obxecto de evitar afeccións innecesarias sobre eles. Se é tecnicamente posible, os cepos non se eliminarán, sobre todo se están na ribeira dos cursos fluviais.
No caso de que sexa necesario crear vías alternativas temporais para a circulación dos veciños, estas estarán perfectamente indicadas e sinalizadas.
Estableceranse medidas encamiñadas ao mantemento das infraestruturas locais existentes que sexan empregadas na execución do proxecto e procederase á reparación das deterioracións ou danos ocasionados nelas, de ser o caso.
Localizaranse as zonas destinadas ás instalacións auxiliares (parque de maquinaria, zonas de almacenamento de materiais e residuos, vestiarios, etc.), primando o uso dos espazos ocupados pola traza fronte a calquera outro, procurando que se sitúen en espazos con contornos carentes de valores ambientais relevantes.
Ademais de nas zonas para a realización de actividades de mantemento, reparación e lavado de maquinaria, habilitarase nas formigonaxes un sistema de recolla, condución e sedimentación de auga mesturada co formigón procedente da zona de obra, evitando que se produza algunha vertedura desta mestura a correntes de auga. Así mesmo, nas zonas onde se realicen actividades de mantemento, reparación e lavado da maquinaria, protexerase o solo con materiais impermeables.
Non estando prevista a instalación de plantas de formigón nin de aglomerado asfáltico, estes procederán de planta ou plantas externas que conten coas súas correspondentes autorizacións. No caso de ser necesario implantar unha planta propia, someterase ao informe da Secretaría Xeral de Calidade e Avaliación Ambiental.
A xestión da terra vexetal que se empregue na restauración das zonas degradadas retirada previamente ao movemento de terras realizarase do xeito indicado no estudo de impacto ambiental, coidando que non se produza un movemento en masa ou escorremento do material almacenado, para o que se adoptarán as medidas técnicas axeitadas (colocación de barreiras físicas na cara inferior do amoreamento, etc.).
No caso de que o período de almacenamento sexa prolongado e non apareza vexetación espontánea nas moreas, realizaranse sementeiras de herbáceas (gramíneas e leguminosas) con aportes de mulch suficiente para manter entre un 5 % e un 6 % de materia orgánica.
Para a realización de cortas das especies arbóreas debe terse en conta o disposto na normativa de montes, tendo que facer a correspondente comunicación de corta ou solicitude de autorización, segundo o caso.
Na documentación avaliada faise referencia á existencia dun volume de 45.566 m3 de préstamos dos movementos de terras. Respecto disto, recorrerase sempre a actividades autorizadas para este fin, evitándose, na medida do tecnicamente posible, a apertura de novas canteiras ou zonas de préstamo. Neste último caso deberá atenderse á normativa vixente respecto disto.
Así mesmo, estudarase a posibilidade de que parte dos materiais que se empreguen para a construción da vía (para bases ou subbases, para a fabricación de formigonaxes, para pavimentar as vías auxiliares, para recheos pouco exixentes xeotecnicamente, etc.) procedan de plantas de reciclaxe de residuos de construción e demolición.
Cumprirase o establecido na Lei 22/2011, do 28 de xullo, de residuos e solos contaminados, non sendo de aplicación para os solos contaminados escavados e outros materiais naturais escavados durante as actividades de construción, cando se teña a certeza de que estes materiais se utilizarán con fins de construción no seu estado natural no lugar ou obra onde foron extraídos.
Naquelas zonas afectadas por movementos de terra, escavacións e, en xeral, todas aquelas operacións de obra que supoñan a aparición de superficies núas, procederase á súa revexetación o máis axiña posible, co obxecto de evitar a aparición de fenómenos erosivos. No caso de seren necesarias, adoptaranse medidas correctoras adicionais para corrixir a erosión, como pode ser estender mantas de fibras naturais.
Así mesmo, ao finalizar as obras, todas as instalacións auxiliares, zonas de almacenamento de materiais e residuos, etc. deberán ser desmanteladas e, no caso de que estas non se atopen sobre a propia traza, os espazos ocupados por elas deben ser restaurados á súa situación preoperacional. O mesmo é aplicable para o caso de vías de obra que non vaian ser empregadas posteriormente ao remate daquelas.
Na execución do proxecto se utilizaranse prioritariamente betumes, modificados con caucho e/o betumes mellorados con caucho procedentes de pneumáticos fóra de uso. Estas indicacións realizaranse de acordo coa disposición adicional segunda do Real decreto 1619/2005, do 30 de decembro, sobre a xestión de pneumáticos fóra de uso, que establece que as administracións públicas promoverán a utilización de materiais reciclados de pneumáticos fóra de uso e a de produtos fabricados con materiais reciclados procedentes dos ditos residuos, sempre que cumpran as especificacións técnicas requiridas, as cales se establecen na Orde circular 21/2007 da Dirección General de Estradas, sobre o uso e especificacións que deben cumprir os ligantes e mesturas bituminosas que incorporen caucho procedente de pneumáticos fóra de uso, no Manual de emprego de pneumáticos fóra de uso en mesturas bituminosas do CEDEX, así como na Orde Ministerial 891/2004, do 1 de marzo, que aprobaba modificacións do prego de prescricións técnicas xerais para obras de estrada e pontes (PG-3).
3.3.4. Residuos.
Os restos vexetais que se produzan deberán ser xestionados axeitadamente e prevalecerá sempre a súa valorización. No caso de depositalos no terreo, deberán ser triturados e espallados homoxeneamente para permitir unha rápida incorporación ao solo.
Os residuos xerados recolleranse e xestionaranse conforme a súa natureza e a lexislación vixente, primando a reutilización e a reciclaxe fronte á vertedura.
Ao finalizar as obras, e antes do inicio da fase de explotación, deberase ter retirado e xestionado a totalidade dos residuos de obra.
Non se queimarán residuos, material excedente e/ou calquera tipo de resto procedente da execución das obras.
Xestionaranse todos os residuos que se xeren en función da súa natureza e conforme a lexislación vixente, primando a reciclaxe ou reutilización fronte á vertedura.
3.3.5. Fauna, vexetación e hábitats naturais.
Evitarase calquera tipo de afección sobre a posible presenza de especies protexidas e hábitats de interese comunitario durante a execución das obras. No caso de que durante a obra se teña constancia da súa existencia, informarase a Dirección Xeral de Conservación da Natureza, que decidirá sobre a solución que se adoptará ou as medidas que se aplicarán para garantir a conservación, protección e recuperación das ditas especies e/ou hábitats naturais de interese comunitario.
En relación coa época para realizar as operacións de despexe e roza da vexetación para as obras previstas, é conveniente que a súa execución sexa fóra da época de cría das aves, por ser esta a máis representativa e delicada para a maioría dos vertebrados. Non obstante, no caso da imposibilidade, farase unha prospección previa aos traballos de despexe e roza para o control da fauna.
De atoparse ou demostrarse a existencia de especies incluídas no catálogo galego de especies ameazadas, prohíbese calquera actuación que as afecte. Neste suposto, comunicarase á Dirección Xeral de Conservación da Natureza para tomar as medidas oportunas.
En todo momento as augas susceptibles de ser afectadas polas obras cumprirán o preceptuado no artigo 80 sobre a calidade mínima exixible ás augas continentais (Decreto 130/1997, do 14 de maio, polo que se aproba o Regulamento de ordenación da pesca fluvial e dos ecosistemas acuáticos continentais).
Preveranse zonas de provisión e préstamos. Os vertedoiros permanentes e temporais de terras e as instalacións auxiliares situaranse en zonas de mínima afección ecolóxica e paisaxística e de pouco interese natural.
Evitarase o deposito de residuos ou produtos sólidos en zonas onde os escoamentos produzan arrastres aos cursos fluviais coa conseguinte contaminación de augas continentais.
A planificación da obra preverá o desenvolvemento dos labores de estabilización de noiros de maneira inmediata, para evitar que os procesos erosivos provoquen desprendementos.
O proxecto construtivo deberá integrar o correspondente Plan de xestión de residuos perfectamente definido e desenvolvido.
Definirase a delimitación do terreo que ocuparán os labores do proxecto co fin de diminuír a perda innecesaria e a alteración de formacións vexetais polo tráfico de maquinaria.
Unha vez redactado o proxecto construtivo, someterase a informe da Dirección Xeral de Conservación da Natureza. Neste sentido, se se demostrar calquera afección sobre os valores naturais da zona, tomaranse inmediatamente as medidas adecuadas para paliar a dita afección e será a Dirección Xeral de Conservación da Natureza quen decidirá sobre a conveniencia da solución que se adopte, así como as actuacións precisas ou as medidas compensatorias adecuadas para corrixir os efectos producidos.
3.3.6. Patrimonio cultural.
Na fase de redacción do proxecto de trazado debe realizarse un estudo específico co fin de avaliar o impacto que a construción da alternativa seleccionada pode xerar sobre o patrimonio cultural.
Establecerase como medida xenérica a realización dun control e seguimento arqueolóxico das fases de implantación, execución da obra e restitución do terreo.
Todas as actuacións deberán ser realizadas por técnicos arqueólogos segundo o proxecto presentado polo promotor da obra, que debe ser autorizado pola Dirección Xeral do Patrimonio Cultural.
Con base nos resultados das actuacións arqueolóxicas en cada fase da obra, a Dirección Xeral de Patrimonio Cultural decidirá sobre a conveniencia de establecer outras medidas de protección.
Todos os elementos patrimoniais e os seus contornos de protección deben figurar nos planos de obra.
Deberá informarse o equipo de control do seguimento arqueolóxico calquera cambio no lugar ou características das zonas de préstamo, canteiras, parques de maquinaria, etc.
Calquera modificación no proxecto de trazado debe comunicarse á Dirección Xeral do Patrimonio.
3.3.7. Integración paisaxística.
Recoméndase que as especies vexetais que se sementen nos noiros dos terrapléns e das trincheiras deberán ser as variedades propias da zona para evitar así a incorporación de especies alleas que introducen texturas e cores distintas na paisaxe.
3.3.8. Programa de vixilancia ambiental.
– Aspectos xerais.
O obxecto deste programa será o de garantir ao longo do tempo o cumprimento das medidas protectoras e correctoras contidas no estudo de impacto ambiental e no condicionado da presente declaración, así como incorporar procedementos de autocontrol por parte do promotor. O programa debe permitir detectar, cuantificar e corrixir diferentes alteracións que non se puideron prever no estudo ou no condicionado desta DIA e levar a cabo novas medidas correctoras acordes coas novas problemáticas xurdidas para cada unha das fases do proxecto (obras e explotación).
Para tal fin, e tomando como base o plan de seguimento proposto no estudo ambiental, deberanse incorporar os controis necesarios para adaptalo aos condicionantes xurdidos da presente declaración.
Será responsabilidade do órgano substantivo que o programa que finalmente se desenvolva neste sentido permita acadar os fins sinalados no parágrafo anterior. Asemade, teranse en conta as seguintes consideracións:
• Co obxecto de acadar a máxima coordinación e eficacia no cumprimento da presente declaración, designarase un/s responsable/s desta.
• As tomas de mostras e as medicións deberán ser representativas e, por tanto, deberán realizarse durante os labores con maior incidencia sobre os aspectos obxecto de control.
• Todas as medicións e/ou análises do programa de vixilancia deberán ser realizadas por un organismo de control autorizado ou entidade homologada ou acreditada e os resultados deberán vir asinados por un técnico da dita entidade.
• Tanto os puntos de medición seleccionados como os de tomas de mostras, así como a periodicidade dos controis, poderán ser revisados con base nos resultados obtidos.
• No caso de que se detecten como resultado do seguimento, en calquera das súas fases, impactos imprevistos ou alteracións que superen os limiares establecidos na lexislación aplicable ou nesta declaración, comunicarase inmediatamente ao órgano substantivo propondo as medidas correctoras precisas para corrixilas. Se se pon de manifesto a existencia de impactos ambientais severos ou críticos, o órgano substantivo porá este feito en coñecemento da Secretaría Xeral de Calidade e Avaliación Ambiental.
– Aspectos específicos.
Ademais do indicado no punto 3.3.8, o programa de vixilancia ambiental deberá incluír especificamente o seguinte:
• Plan de control da calidade da auga dos cursos fluviais afectados polas obras, indicando a metodoloxía, a periocidade e os límites que se impoñerán aos diferentes parámetros, seleccionando puntos de toma de mostras augas arriba e augas abaixo da zona dos cursos fluviais afectados. Considérase que, como mínimo, os parámetros que se analizarán son os seguintes: temperatura, materias en suspensión, pH, oxíxeno disolto, condutividade, aceites e produtos lubricantes.
Estes controis deberán permitir coñecer o grao de cumprimento dos obxectivos de calidade indicados no Decreto 130/1997, do 14 de maio, polo que se aproba o Regulamento de ordenación de pesca fluvial e dos ecosistemas acuáticos continentais.
• Plan de seguimento dos ruídos. Cumprirase o disposto na Lei 37/2003, do 13 de novembro, do ruído, no referente á zonificación acústica, obxectivos de calidade e emisións acústicas, desenvolvida nos reais decretos 1367/2007, do 19 de outubro, e 1513/2005, do 16 de decembro, e modificada polo Real decreto lei do 1 de xullo, de medidas de apoio aos debedores hipotecarios, de control do gasto público e cancelación de débedas con empresas e autónomos contraídas polas entidades locais, de fomento da actividade empresarial e impulso da rehabilitación e de simplificación administrativa; asemade, cumpriranse as ordenanzas municipais.
• Plan de vixilancia do sistema de drenaxe durante a fase de explotación da vía, comprobando se se levan a cabo os labores de limpeza e conservación de xeito que cumpra a súa función dun xeito efectivo.
• En todos os casos, os puntos de control propostos situaranse nun plano a escala 1:5.000 ou con maior detalle.
– Informes do programa de vixilancia.
Os informes do programa de vixilancia e seguimento ambiental serán elaborados pola Axencia Galega de Infraestruturas, a quen corresponde, ademais, o seguimento e vixilancia do cumprimento do condicionado da declaración conforme o establecido na normativa ambiental. Estes informes deberán estar asinados polo/s técnico/s responsable/s da súa elaboración, coa supervisión, se for o caso, do responsable do control do seguimento ambiental.
Informes que se presentarán na fase de obras.
A Axencia Galega de Infraestruturas levará a cabo o programa de vixilancia ambiental de acordo co indicado no número 3.3.8 desta DIA elaborando os informes do seguimento ambiental que se sinalan a seguir e remitindo unha copia a esta Secretaría Xeral de Calidade e Avaliación Ambiental.
a) Trimestralmente:
• Cronograma actualizado das obras.
• Representación nun plano dos avances dos traballos e porcentaxe de execución das obras respecto do total, referido aos distintos elementos que as conforman.
• Reportaxe fotográfica que mostre con detalle os aspectos ambientais máis salientables da actuación, así como das zonas onde se adoptaron medidas protectoras e correctoras. Nas fotografías indicaranse a data e hora, acompañándoas dun plano de localización.
• Resultados do control da calidade das augas superficiais e do plan de seguimento dos ruídos producidos polas obras, incluíndo no primeiro informe trimestral medicións preoperacionais da presión sonora e da calidade das augas.
• Neste informe indicaranse as variacións producidas con respecto ao proxectado.
b) Antes da emisión da acta de recepción:
• Memoria-resumo sobre o seguimento ambiental realizado, no cal quede constancia das medidas protectoras e correctoras adoptadas en cumprimento do disposto nesta DIA.
• Informe, se é o caso, das variacións introducidas ao longo das obras respecto do proxectado.
• Reportaxe fotográfica que mostre con detalle os aspectos ambientais máis relevantes da actuación, así como das zonas onde se aplicaron medidas protectoras e correctoras. Nas fotografías indicarase a data e hora e deben ir acompañadas dun plano de localización.
• Incidencias producidas e medidas adoptadas para resolvelas.
Informes que se presentarán na fase de explotación.
A Axencia Galega de Infraestruturas levará a cabo o programa de vixilancia ambiental de acordo co indicado no punto 10 desta DIA, elaborando anualmente un informe do seguimento ambiental que incluirá:
• Memoria do seguimento realizado de acordo co programa de vixilancia ambiental.
• Reportaxe fotográfica onde se reflicta a integración paisaxística da actuación, indicando a data, hora e localización dos puntos da toma das fotografías nun plano.
• Resultados do plan de seguimento dos ruídos producidos pola explotación da infraestrutura.
• Resultados do plan de seguimento das obras de drenaxe e estruturas para a fauna, verificando a súa correcta funcionalidade.
• Incidencias producidas e medidas adoptadas para resolvelas.
• A duración da vixilancia ambiental nesta fase establecerase en función dos resultados obtidos ao levar a cabo este programa.
4. Proposta.
Examinada a documentación que constitúe o expediente, o Servizo de Prevención e Xestión Ambiental da Subdirección Xeral de Avaliación Ambiental considera que o proxecto de trazado e o estudo de impacto ambiental da conexión CG 1.5 en San Paio-Portobravo, de clave AC/12/031.01 é ambientalmente viable na configuración descrita na alternativa 1, sempre que se cumpran, ademais das condicións incluídas no estudo de impacto ambiental e restante documentación avaliada, as que se recollen ao longo deste documento, tendo en conta que, no caso de que exista contradición entre o indicado na antedita documentación e o establecido na presente proposta da DIA, prevalecerá o disposto nesta última.
|
Manuel Díaz Cano |
Conforme |
Esta Secretaría Xeral de Calidade e Avaliación Ambiental, como órgano ambiental e no exercicio das competencias que lle atribúe o Decreto 44/2012, do 19 de xaneiro (modificado polo Decreto 115/2014) resolve, en cumprimento do disposto no artigo 12 do Real decreto lexislativo 1/2008, do 1 de xaneiro, polo que se aproba o texto refundido da Lei de avaliación de impacto ambiental de proxectos, formula, só para os efectos ambientais, a declaración de impacto ambiental favorable do proxecto, nos termos propostos polo Servizo de Prevención e Xestión Ambiental da Subdirección Xeral de Avaliación Ambiental.
Ademais do obrigado cumprimento das condicións sinaladas, de manifestarse calquera tipo de impacto non considerado ata o momento, este órgano ambiental poderá ditar, só para os efectos ambientais, condicionados adicionais aos anteriores.
As condicións establecidas poderán ser revisadas de oficio ou por solicitude do promotor, co obxecto de incorporar medidas que fornezan unha maior protección do medio. Ademais disto, o promotor poderá solicitar a súa revisión naqueles supostos que presenten graves dificultades para a súa implantación ou impliquen modificacións importantes, sempre que as novas medidas permitan acadar os obxectivos e fins desta. Neste último caso, o promotor remitirá esta solicitude, achegando a documentación técnica que xustifique estas medidas, no prazo máximo dun (1) mes despois de lle ser notificada a presente declaración e non poden comezar a actividade antes de contar cunha comunicación desta Secretaría Xeral.
Calquera cambio que se pretenda introducir no proxecto respecto do establecido na DIA deberá elaborarse tendo en conta a variable ambiental e, no caso de que poida producir efectos significativos sobre o ambiente, deberá ser notificado previamente a esta Secretaría Xeral de Calidade e Avaliación Ambiental, que avaliará e decidirá sobre a súa aceptación, comunicando, se for o caso, se procede ou non a modificación da declaración ou iniciación dun novo trámite de avaliación ambiental.
Esta declaración farase pública a través da páxina web da Consellería de Medio Ambiente, Territorio e Infraestruturas (www.cmati.es) e será remitida ao promotor para os efectos oportunos.
Santiago de Compostela, 16 de abril de 2015
Justo de Benito Basanta
Secretario xeral de Calidade e Avaliación Ambiental