A Lei 8/2008, de 10 de xullo, de saúde de Galicia, establece que o Servizo Galego de Saúde poderá dispor dos bens e dereitos que lle pertenzan en propiedade e que non sexan necesarios para o exercicio das súas funcións. Así mesmo, poderá ceder os bens mobles da súa propiedade a terceiros no marco das relacións de colaboración e para fins de interese sanitario.
A Lei 5/2011, do 30 de setembro, de patrimonio da Comunidade Autónoma de Galicia, permite a cesión de bens mobles para a realización de fins de utilidade pública ou interese social sempre que a súa afectación ou explotación non se considere previsible.
O Decreto 50/1989, do 9 de marzo, que mantén a súa vixencia no que non sexa incompatible co indicado na Lei 5/2011, exixe que a orde de cesión exprese a finalidade concreta á cal a entidade beneficiaria debe destinar os bens, así como as súas condicións.
A Universidade de Santiago de Compostela manifestou o seu interese na cesión do equipamento de braquiterapia de alta taxa para a súa instalación e funcionamento no Laboratorio de Radiofísica, creado como plataforma tecnolóxica da rede de infraestrutura de apoio á investigación. Neste momento, o equipo de braquiterapia atópase en desuso no Hospital Clínico Universitario de Santiago de Compostela.
Na súa virtude, en consideración ás facultades conferidas polos artigos 34 y 38 da Lei 1/1983, do 22 de febreiro, de normas reguladoras da Xunta e a súa Presidencia, e no artigo 83.3 da Lei 5/2011, do 30 de setembro, de patrimonio da Comunidade Autónoma de Galicia,
DISPOÑO:
Artigo 1. Obxecto da cesión
Acórdase a cesión en propiedade a favor da Universidade de Santiago de Compostela dun equipamento de braquiterapia de alta taxa, marca Eleckta, modelo Microselectrón-HDR, formado polos seguintes compoñentes:
a) Unha unidade de tratamento (equipamento automático de carga diferida).
b) Un panel/consola de control.
c) Tubos de transferencia, aplicadores e accesorios.
Dimensións da unidade de tratamento:663/410/885/1285 mm.
Dimensión da unidade de control:430/475/100 mm.
Número de canles: estándar 18 canles.
Artigo 2. Condicións da cesión
A cesión sinalada no artigo anterior queda sometida ás seguintes condicións:
1ª. Os bens que se ceden destinaranse a ampliar e mellorar o alcance dos servizos de calibración do Laboratorio de Radiofísica da Universidade de Santiago de Compostela. A posibilidade de realizar a calibración dos sistemas en braquiterapia permitirá aumentar a exactitude dosimétrica dos tratamentos e mellorar a realización dos programas de garantía de calidade nas técnicas de radioterapia, favorecendo, por tanto os labores de estudo, docencia e investigación que realiza a universidade, conforme o indicado no artigo 82 da Lei 5/2011, do 30 de setembro, de patrimonio de Galicia.
2ª. A cesión outórgalle á universidade a propiedade dos elementos indicados no artigo 1 desta orde realízase a título gratuíto.
3ª. Os bens cedidos destinaranse, exclusivamente, a fins de utilidade pública ou interese social do servizo público que presta a universidade mediante o estudo, a docencia e a investigación.
4ª. A entidade cesionaria é responsable do correcto uso dos bens cedidos e da adopción de todas as medidas necesarias para a súa conservación e custodia.
5ª. Corresponderalle ao cesionario facerse cargo dos gastos derivados do traslado do equipamento, instalación e/ou calquera outro gasto necesario para a súa posta en funcionamento.
6ª. Se o ben cedido non se aplica ao fin sinalado, se se descoida ou utiliza con grave quebranto, ou se incumpren as condicións do presente acordo, considerarase resolta a cesión e o ben reverterá no patrimonio da Comunidade Autónoma, que terá dereito a percibir, logo de taxación pericial, o valor dos detrimentos ou deterioracións que experimente.
Artigo 3. Formalización da cesión
A cesión dos bens indicados no artigo 1 formalizarase mediante unha acta subscrita pola persoa titular da Xerencia do Servizo Galego de Saúde e a persoa titular do órgano competente da Universidade de Santiago de Compostela, e deberá constar nela o acordo de cesión e os bens que se ceden, así como a aceptación do cesionario.
Disposición derradeira primeira. Desenvolvemento
O Servizo Galego de Saúde, a través do seu órgano competente, realizará os trámites necesarios para a efectividade do disposto nesta orde.
Disposición derradeira segunda
Esta orde producirá efectos o día seguinte ao da súa publicación no Diario Oficial de Galicia.
Santiago de Compostela, 17 de marzo de 2015
Rocío Mosquera Álvarez
Conselleira de Sanidade