A Xunta de Goberno Local, na sesión ordinaria realizada o 12 de maio de 2014, adoptou o acordo que se transcribe a continuación:
«4.1. Modificación puntual do artigo 69 do Plan parcial do sector residencial deportivo Perbes-San Xoán de Vilanova.
Visto o expediente tramitado para levar a cabo a modificación puntual do artigo 69 do Plan parcial do sector residencial deportivo Perbes-San Xoán de Vilanova, e considerando que consta no expediente a decisión de non sometemento a avaliación ambiental estratéxica, a Xunta de Goberno Local acorda por maioría absoluta e unanimidade dos concelleiros asistentes (cinco dun total de cinco):
1º. Aprobar inicialmente a modificación do artigo 69 do Plan parcial do sector residencial deportivo Perbes-San Xoán de Vilanova, que terá a seguinte redacción:
“Art. 69. Recuamentos e separación a lindeiros.
Para cada ordenanza particular estableceranse os recuamentos necesarios, que se fixarán ben pola distancia á aliñación da parcela ou ben ao eixe da vía. No caso das vivendas en ringleira, os garaxes poderán acaroarse aos lindeiros e, como é evidente, só se terán en conta os recuamentos á aliñación e ao lindeiro de fondo.
Nas ordenanzas 2 e 3 autorízase a construción de piscinas descubertas dentro das parcelas privadas, que non computarán para efectos de ocupación, e con recuamentos inferiores aos sinalados nas ordenanzas particulares para o resto das edificacións. Deberán cumprir as seguintes condicións:
– O bordo do vaso estará separado 1,00 metro dos lindeiros da parcela e aliñación da rúa.
– A caseta de depuración recuarase respecto dos lindeiros da parcela 0,50 metros se está soterrada e 2,00 metros se sobresae respecto da rasante do terreo”.
2º. Someter o expediente a información pública, polo prazo dun mes, mediante o correspondente anuncio no DOG e en dous xornais dos de maior difusión da provincia.
3º. Notificar individualmente este acordo aos propietarios afectados que consten no Catastro».
O que se notifica a todas as persoas interesadas, significándolles que o presente acordo non esgota a vía administrativa por tratarse dun acto de trámite e que contra este non procede interpoñer ningún recurso, sen prexuízo do disposto no artigo 107.1 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 7/1999, do 13 de xaneiro.
Miño, 28 de maio de 2014
Jesús Veiga Sabín
Alcalde