O Consello da Xunta de Galicia, na súa reunión do 12 de decembro de 2013, adoptou o acordo polo que se aproba o Plan de ordenación de recursos humanos dos laboratorios de saúde pública da Consellería de Sanidade.

Para coñecemento xeral, esta secretaría xeral técnica, resolveu dispor a publicación no Diario Oficial de Galicia do citado acordo, como anexo á presente resolución.

Santiago de Compostela, 13 de decembro de 2013

Antonio Fernández-Campa García-Bernardo
Secretario xeral técnico da Consellería de Sanidade

ANEXO
Acordo do Consello da Xunta de Galicia polo que se aproba o Plan
de ordenación de recursos humanos dos laboratorios de saúde pública dependentes da Consellería de Sanidade

I. Para a consecución da eficacia na prestación dos servizos sanitarios no ámbito da Consellería de Sanidade e da eficiencia na utilización dos recursos económicos de que dispón, resulta necesario que se dote dos instrumentos básicos que permitan a planificación eficiente das necesidades de recursos humanos, a súa axeitada dimensión e a mellor distribución en función das necesidades.

Nesta liña, o artigo 69 da Lei 7/2007, do 12 de abril, do Estatuto básico do empregado público, establece que a planificación dos recursos humanos nas administracións públicas terá como obxectivo contribuír á consecución da eficacia na prestación dos servizos e da eficiencia na utilización dos recursos económicos dispoñibles mediante, entre outras, a dimensión adecuada dos seus efectivos, a súa mellor distribución e mobilidade.

A importancia deste tipo de instrumentos de planificación global resulta notoria na medida en que responden ao principio de eficacia que debe presidir a actuación das administracións públicas. Importancia que se revela, se cabe, particularmente acentuada nun momento como o presente, en que a Administración sanitaria debe desenvolver a súa función no marco da austeridade e a eficiencia que require a difícil situación económica e orzamentaria.

Así mesmo, o Decreto lexislativo 1/2008, do 13 de marzo, polo que se aproba o texto refundido da Lei da función pública de Galicia, no seu artigo 30 bis.1), prevé que no marco da planificación xeral dos seus recursos humanos se poderá trasladar motivadamente e con carácter voluntario ao persoal funcionario de carreira a consellerías, unidades, organismos, axencias ou entidades distintas ás do seu destino, cando considere que existen sectores prioritarios da actividade pública con necesidades específicas de efectivos, e no número 3) do mesmo artigo prevese que cando as necesidades do servizo ou funcionais xustifiquen a modificación da adscrición dos postos de traballo a unha consellería, unidade, organismo, axencia ou entidade distinta da que figure na relación de postos de traballo, o Consello da Xunta de Galicia aprobará un plan de ordenación de recursos humanos, oída a comisión de persoal e logo de negociación sindical e informe da consellería competente en materia de función pública e de orzamentos.

II. Os laboratorios de saúde pública desenvolven un servizo complementario e imprescindible aos programas de saúde pública no proceso de vixilancia e protección da saúde, mediante a realización dos ensaios establecidos polos programas de control alimentario e ambiental, así como os exixidos na normativa sectorial correspondente.

Desde o ano 1981 existen catro laboratorios de saúde pública situados nas dependencias das xefaturas territoriais da Consellería de Sanidade situados nas cidades da Coruña, Lugo, Ourense e Pontevedra. Estes laboratorios foron dotados dos mesmos medios materiais (equipamentos) e recursos adecuados ás funcións encomendadas, baixo o criterio de que todos puideran facer as mesmas determinacións, creándose dentro de cada laboratorio dúas áreas de traballo definidas, microbioloxía e fisicoquímica, ademais da correspondente área auxiliar para os procesos de apoio.

A entrada en vigor do Real decreto 1397/1995, do 4 de agosto, polo que se aproban as medidas adicionais sobre o control de produtos alimenticios, supuxo a necesaria acreditación dos laboratorios, tanto públicos coma privados, para poder participar validamente no control oficial de produtos alimenticios.

Así mesmo, as novas directivas europeas requiren que os laboratorios dispoñan de equipamentos cunha maior sensibilidade, maior resolución e cuns límites de detección axeitados ás novas exixencias, o que supón a necesidade de realizar un plan de renovación progresivo dos equipamentos antigos dos laboratorios, e a adquisición dos que resulten necesarios para a posta en marcha de novas técnicas analíticas. Exixencias que representan dificultades para o mantemento en Galicia de catro laboratorios de saúde pública coa dotación axeitada para o cumprimento dos requisitos legais.

Particularmente, o Laboratorio de Saúde Pública de Galicia en Lugo foi asumindo progresivamente a especialización en determinadas técnicas como a realización das análises derivadas do Plan nacional de investigación de residuos en produtos de orixe animal (PNIR) sendo referencia tanto en Galicia como noutras comunidades autónomas que carecen dos medios adecuados para a realización destas analíticas. Así mesmo, colabora co daquela denominado Ministerio de Sanidade e Consumo na realización de determinadas analíticas aos produtos que entran no territorio nos diferentes postos de inspección fronteirizos, especialmente residuos de substancias prohibidas na Unión Europea, e conta coa acreditación na técnica da triquina, o que o converte no laboratorio central de diagnóstico da triquina da Comunidade Autónoma de Galicia.

Así mesmo, este laboratorio conta co sistema de cromatografía líquida con detector de masas para determinar residuos de medicamentos veterinarios prohibidos (pertencentes ao grupo A da lexislación de residuos) exixido pola Decisión da Comisión Europea, do 12 de agosto de 2002 (2002/657/CE); con dous auditores de ENAC para a ISO 17.020 de laboratorios de ensaio e, desde o ano 2008, ten implantada a NT-18 de acreditación para categorías de ensaio, e alcance flexible (LEBA) de ENAC, para residuos zoosanitarios; o que lle dá unha gran flexibilidade á hora de incorporar ao catálogo de servizos tanto novos alimentos coma novos parámetros analíticos. Esta experiencia en acreditación de alcance flexible (LEBA) é importante para poñer a punto a de praguicidas (NT 19) e doutras substancias.

O adecuado desenvolvemento de todas as funcións asignadas determinou unha maior dotación de recursos humanos no Laboratorio de Saúde Pública con sede en Lugo respecto dos outros tres laboratorios.

Xa que logo, a especialización nas técnicas descritas e a maior dotación de recursos con que conta na actualidade, determina que a centralización dos laboratorios de saúde pública deba producirse no laboratorio de Lugo, ao ser, a partir do 1 de xaneiro de 2014, o único laboratorio de Galicia acreditado para realizar as referidas análises.

III. Neste contexto e desde unha perspectiva orgánica, o recente Decreto 41/2013, do 21 de febreiro, polo que se establece a estrutura orgánica da Consellería de Sanidade, reorganiza os servizos de laboratorio de saúde pública da Consellería de Sanidade, coa amortización dos diversos servizos de laboratorio e a creación do Servizo de Laboratorio de Saúde Central de Galicia en Lugo.

Esta nova reestruturación fai necesaria, a través do presente plan, unha reordenación dos recursos humanos e dos postos de traballo, coa adopción das medidas e previsións necesarias para axustar as situacións dos postos de traballo dos extintos servizos de laboratorio de saúde pública territoriais á nova estrutura, conforme os seguintes obxectivos:

– Optimizar a xestión e utilización dos recursos humanos.

– Adaptar as directrices da política de persoal ás necesidades detectadas.

– Manter a taxa de emprego na Comunidade Autónoma de Galicia como medida de estímulo ao crecemento económico.

– Aproveitar os coñecementos e a experiencia do persoal que xa ocupa actualmente os postos de traballo.

Neste marco, a Administración autonómica manterá todos os postos de traballo actuais existentes nos diferentes laboratorios, así como as persoas que os ocupan, independentemente do seu vínculo xurídico (funcionario de carreira, funcionario interino, persoal laboral fixo, persoal laboral temporal e persoal laboral indefinido non fixo), situando estes postos de traballo nas unidades en que agora son máis necesarios, en aplicación do principio de eficacia e eficiencia na xestión dos recursos públicos.

As necesidades de persoal constatadas noutros departamentos da Xunta de Galicia, que están a demandar profesionais da mesma especialización que os existentes nos laboratorios de saúde pública, a garantía de estabilidade dos funcionarios de carreira e persoal laboral fixo, determinan a procedencia de efectuar unha nova distribución dos efectivos existentes en centros próximos doutras consellerías, onde as funcións que realizarán son análogas ás desempeñadas e propias da súa especialización.

A dita redistribución materializarase a través dun traspaso das prazas afectadas a outras consellerías da Xunta de Galicia, e sempre baixo o principio de voluntariedade deste persoal.

Respecto dos postos ocupados por funcionario interino, persoal laboral temporal e persoal laboral indefinido non fixo por sentenza, debe terse en conta que este persoal foi especificamente contratado nunha praza para o desempeño dunhas funcións que, como consecuencia da centralización de toda a actividade no Laboratorio de Saúde Pública de Galicia, agora van ser desenvolvidas exclusivamente nel.

Por tal motivo, estes postos e o persoal que os ocupa deben ser traspasados ao citado Laboratorio de Saúde Pública de Galicia, de tal xeito que se manteña invariable o obxecto en virtude do cal o persoal foi contratado.

Non obstante, respecto aos postos de persoal laboral indefinido non fixo recollidos na disposición transitoria décimo primeira parte do convenio colectivo único e de conformidade co previsto nela, respecto dos mesmos dereitos que o persoal laboral fixo, permanecerán nas súas condicións actuais mentres non se leve a cabo o proceso selectivo previsto na antedita disposición.

Na súa virtude, consultadas as organizacións sindicais presentes na Mesa Xeral de Empregados Públicos, logo do informe da Dirección Xeral de Función Pública e da Dirección Xeral de Planificación e Orzamentos da Consellería de Facenda, e aprobado por unanimidade das organizacións sindicais presentes na Comisión de Persoal que tivo lugar o día 11 de decembro de 2013, e por proposta da Consellería de Sanidade, apróbase o Plan de ordenación de recursos humanos dos laboratorios de saúde pública dependentes da Consellería de Sanidade, que determina as seguintes accións:

I. Obxecto.

O presente plan de ordenación de recursos humanos ten por obxecto con base no artigo 69 da Lei 7/2007, do 12 de abril, do Estatuto básico do empregado público, e no artigo 30.bis do Decreto lexislativo 1/2008, do 13 de marzo, polo que se aproba o texto refundido da Lei da función pública de Galicia, introducido polo artigo 22 da Lei 15/2010, do 28 de decembro, de medidas fiscais e administrativas, a reordenación dos postos de traballo dos extintos laboratorios de saúde pública da Coruña, Lugo, Ourense e Pontevedra cuxas xefaturas de servizo foron amortizadas polo Decreto 41/2013, do 21 de febreiro, polo que se establece a estrutura orgánica da Consellería de Sanidade, que pola súa vez pasa a crear o posto de Servizo de Laboratorio de Saúde de Galicia en Lugo.

Para tal efecto, recóllense as accións pertinentes que se deben desenvolver para estruturar de xeito eficaz e eficiente as funcións do Servizo de Laboratorio de Saúde Pública de Galicia en Lugo, e determinar o sistema de racionalización dos postos de traballo e do persoal afectado.

II. Necesidades de recursos humanos do servizo de Laboratorio de Saúde Pública de Galicia (Lugo).

O Laboratorio de Saúde Pública de Lugo dispón na actualidade dos seguintes recursos humanos para cubrir as necesidades da actividade que ven desenvolvendo ata agora.

Denominación do posto	Postos actuais do Laboratorio Saúde Pública de Lugo
Xefatura do Servizo Laboratorio Saúde Pública de Galicia en Lugo	1
Responsables de área	2
Titulado/a superior de laboratorio	2
Outros titulados/as superiores	3
Inspector/a veterinario/a de saúde pública de laboratorio	3
Titulado/a medio de laboratorio	1
Analista de laboratorio	10
Auxiliar de laboratorio	5
Auxiliar sanitario	2
Auxiliar administrativo	1
Total de postos	30

Como consecuencia da centralización da actividade dos extintos laboratorios de saúde pública da Coruña, Lugo, Ourense e Pontevedra, nun único laboratorio, prodúcese un significativo incremento das tarefas que hai que realizar, particularmente do número de mostras de alimentos, augas e praias para analizar, estimado arredor dun 67 % máis de análises.

Xa que logo, requírese unha adaptación dos recursos humanos ás novas necesidades, coa dotación no Laboratorio de Saúde Pública de Galicia con sede en Lugo dos seguintes postos:

Denominación do posto	Necesidades
Responsables de área	2
Titulado/a superior de laboratorio	1
Titulado/a medio de laboratorio	3
Analista de laboratorio	4
Auxiliar de laboratorio	5
Total de necesidades	15

De tal xeito que a dotación total deste laboratorio de Saúde Pública de Galicia en Lugo resulta a seguinte:

Denominación do posto	Dotación de postos do Laboratorio de Saúde Pública de Galicia en Lugo
Xefatura do Servizo Laboratorio Saúde Pública de Galicia en Lugo	1
Responsables de área	4
Titulado/a superior de laboratorio	3
Outros titulados/as superiores	3
Inspector/a veterinario/a de saúde pública de laboratorio	3
Titulado/a medio de laboratorio	4
Analista de laboratorio	14
Auxiliar de laboratorio	10
Auxiliar sanitario	2
Auxiliar administrativo	1
Total dotación de postos	45

III. Ordenación dos recursos humanos dos laboratorios de saúde pública.

No marco das liñas anteriormente expostas, adóptanse as seguintes medidas:

– Postos de traballo ocupados por persoal funcionario de carreira e persoal laboral fixo:

1. O persoal funcionario de carreira e persoal laboral fixo poderá solicitar pasar a prestar servizos con carácter voluntario no Laboratorio de Saúde Pública de Galicia sito na cidade de Lugo.

2. Sen prexuízo do anterior, as necesidades de persoal constatadas na Consellería de Sanidade e noutros departamentos da Xunta de Galicia, que están a demandar profesionais da mesma especialización, e a garantía de estabilidade dos funcionarios de carreira e persoal laboral fixo, determinan a procedencia de efectuarlle a este persoal oferta para o desempeño, sempre con carácter voluntario, de postos en unidades da Consellería de Sanidade e doutras consellerías da Xunta de Galicia recollidas no anexo I.

Cando este persoal acepte unha oferta que implique cambio de localidade respecto ao destino de orixe, concederáselle un permiso retribuído de 15 días hábiles que se desfrutará do 23 de decembro de 2013 ao 17 de xaneiro de 2014. Así mesmo, sempre que as necesidades do servizo o permitan, as vacacións que este persoal teña pendentes de desfrutar poderán ser aproveitadas ata o 31 de marzo de 2014.

Doutra banda, en execución da sentenza do Xulgado do Social número 3 de Ourense, ditada nos autos 389/2009, do 15 de xuño de 2009, e da Sentenza da Sala do Social do Tribunal Superior de Xustiza de Galicia (recurso de suplicación número 4489/2009) do 11 de xullo de 2012, de recolocación por razóns de saúde, o posto de traballo auxiliar de laboratorio, de código SAC991000632001020 no Servizo de Laboratorio de Saúde Pública (Ourense), grupo IV, categoría 11, por pedimento do traballador que vén ocupando o referido posto, ofértaselle posto de traballo con carácter definitivo noutras unidades da Consellería do Medio Rural e do Mar na provincia de Pontevedra conforme se recolle no anexo I. O seu posto traspasarase á antedita consellería, con carácter definitivo unha vez que o interesado exerza a súa opción voluntariamente.

Criterios para pasar a prestar servizos noutras consellerías da Xunta de Galicia.

Os criterios para pasar a prestar servizos, con carácter voluntario, nos departamentos doutras consellerías da Xunta de Galicia serán os seguintes e pola seguinte orde:

a) Para o suposto de existir varios/as funcionarios/as ou laborais interesados/as, designarase o de maior antigüidade de servizos no corpo ou escala, ou no grupo e categoría.

b) Para o caso de que os/as funcionarios/as ou laborais que se van designar teñan a mesma antigüidade no corpo ou escala ou no grupo e categoría, resolverase o empate atendendo á antigüidade de servizos na Administración.

c) De persistir o empate na puntuación tras a aplicación dos criterios sinalados nas alíneas anteriores, designaranse aqueles/as funcionarios/as ou laborais con maiores cargas familiares, de acordo co establecido pola Lei 39/1999, do 9 de novembro, de conciliación de vida familiar e laboral das persoas traballadoras.

Garantías para o persoal que pase a prestar servizos noutras consellerías da Xunta de Galicia.

Ao persoal que pase a prestar servizos, tanto noutras unidades da Consellería de Sanidade como en unidades noutros departamentos das consellerías da Xunta de Galicia respectaráselle o mesmo réxime xurídico e económico que derive da súa situación de orixe, e o mesmo tratamento que poida derivar de tal réxime.

Este persoal pasará a desempeñar o novo posto co mesmo carácter e situación que tiña no de orixe, e computaráselle o tempo de servizos prestados para poder participar en procedementos de provisión de postos, mediante o sistema de concurso, que se iniciará desde a data en que o persoal funcionario ou laboral tivese ocupado con carácter definitivo o posto de traballo de orixe.

O disposto neste punto entenderase de conformidade coa normativa específica que resulte de aplicación en cada ámbito.

Réxime xurídico do persoal funcionario de carreira da Lei 17/1989.

O persoal funcionario de carreira que voluntariamente pase a prestar servizos en departamentos doutras consellerías da Xunta de Galicia e cuxo réxime está regulado na Lei 17/1989, do 23 de outubro, de creación de escalas de persoal sanitario ao servizo da Comunidade Autónoma, e na normativa de desenvolvemento, seguirá rexéndose pola citada normativa aplicable.

Este persoal funcionario de carreira da Lei 17/1989 seguirá conservando todos os seus dereitos como funcionarios da dita lei.

No anexo I reflíctese o traspaso dos postos de traballo a outras consellerías derivado do exercicio da opción polo persoal.

3. Considerando que o exercicio da opción de pasar a prestar servizos noutras consellerías ten carácter voluntario para o persoal, de non optar por ningunha oferta, os postos de traballo ocupados por persoal funcionario de carreira e persoal laboral fixo serán amortizados nos laboratorios de saúde pública de orixe na Coruña, Ourense e Pontevedra.

O persoal funcionario de carreira, de conformidade co artigo 65.4 do Decreto lexislativo 1/2008, do 13 de marzo, polo que se aproba o texto refundido da Lei da función pública de Galicia, quedará á disposición do conselleiro de Sanidade, e «garantiránselle, en todo caso, as retribucións que lle correspondan polo seu grao persoal consolidado e un complemento específico non inferior en máis de dous niveis ao dito grao».

O persoal laboral fixo quedará igualmente á disposición do órgano competente en materia de persoal da Consellería de Sanidade segundo o establecido no artigo 7 do V Convenio colectivo único para o persoal laboral da Xunta de Galicia, respectivamente.

Tanto o persoal funcionario de carreira como o persoal laboral fixo continuarán a prestar servizos na localidade do seu destino actual na Consellería de Sanidade.

4. A Administración procederá, nun prazo de 6 meses, a convocar un concurso de traslados das categorías de persoal funcionario das escalas sanitarias afectado polo presente plan.

O persoal funcionario de carreira e o persoal laboral fixo que pase a prestar servizos voluntariamente en unidades doutras consellerías e aqueloutro que non tivera oferta noutra consellería, así como o que quede a dispor, gozarán dunha puntuación adicional nos concursos de traslados nos termos que estes determinen.

– Postos de traballo ocupados por persoal funcionario interino, persoal laboral temporal e persoal laboral indefinido non fixo:

1. Este persoal funcionario interino, persoal laboral temporal e persoal laboral indefinido non fixo por sentenza, foi especificamente contratado nunha praza para o desempeño dunhas funcións que, como consecuencia da centralización de toda a actividade no Laboratorio de Saúde Pública de Galicia, agora van ser desenvolvidas exclusivamente nel.

Por tal motivo, estes postos e o persoal que os ocupa deben ser traspasados ao citado Laboratorio de Saúde Pública de Galicia, de tal xeito que se manteña invariable o obxecto en virtude do cal o persoal foi contratado e con respecto do réxime xurídico e retributivo del derivado.

Os postos de traballo a que se refire este parágrafo incorporaranse á relación de postos de traballo da Consellería de Sanidade, dependendo do Servizo de Laboratorio de Saúde Pública de Galicia en Lugo, coa conseguinte recodificación dos citados postos.

2. O persoal laboral indefinido non fixo recollido na disposición transitoria décima do convenio colectivo único cuxas prazas figuran nos procesos de consolidación manterán os mesmos dereitos que a normativa de función pública establece para este colectivo.

Non obstante, o persoal laboral indefinido non fixo recollido na primeira parte da disposición transitoria décima do antedito convenio, que figura no anexo II-bis deste plan, permanecerá na mesma localidade, salvo que voluntariamente opten polo traspaso a Lugo, e nas súas condicións actuais mentres non se leve a cabo o proceso selectivo previsto na disposición transitoria citada.

3. Para os efectos de facilitar a conciliación da vida familiar e laboral concederase, ao persoal que pase a prestar servizos no Laboratorio de Saúde Pública de Galicia en Lugo en aplicación do previsto no presente plan, un permiso retribuído de 15 días hábiles que se desfrutará do 23 de decembro de 2013 ao 17 de xaneiro de 2014.

4. Sempre que as necesidades do servizo o permitan, os períodos de vacacións pendentes de desfrutar polos profesionais afectados poderán ser tomados ata o 31 de marzo de 2014.

5. Así mesmo, como compensación dos gastos de desprazamento, para persoal que pase a prestar servizos no laboratorio de saúde pública de Galicia en Lugo percibirá unha contía equivalente a unha mensualidade das súas retribucións fixas e periódicas na súa devindicación.

Os postos de traballo e as persoas que os ocupan están recollidos no anexo II.

– Postos vacantes non cubertos afectados pola reordenación que se incorporan ao Servizo de Laboratorio de Saúde Pública de Galicia en Lugo:

Por razóns de interese económico e de organización e como medida de contención do gasto público, os postos de traballo vacantes puros recollidos no anexo III intégranse no Servizo de Laboratorio de Saúde de Galicia en Lugo para a súa posterior amortización e/ou reconversión, de ser necesaria a mesma.

IV. Entrada en vigor.

O presente plan de ordenación de recursos humanos entrará en vigor o 1 de xaneiro de 2014.

ANEXO I
Postos que se traspasan de funcionarios de carreira e laborais fixos a outras consellerías

Código do posto	Denominación do posto	Local.	Forma ocupación	Vinc.	Titulación	RPT	Proposta traspaso centros de destino *
CSA991000615001011	Responsable área de microbioloxía alimentaria	A Coruña	Definitivo	FC	Licenciado Ciencias Biolóxicas	Lei 17/1989	LMAG (MATI)/CIAM (M.R.)
CSA991000615001012	Responsable área de microbioloxía alimentaria	A Coruña	Definitivo	FC	Licenciado Ciencias Biolóxicas	Lei 17/1989	LMAG (MATI)/CIAM (M.R.)/LCG (IGC)
CSA991000615001014	Titulado superior laboratorio	A Coruña	Definitivo	FC	Licenciado Ciencias Biolóxicas	Lei 17/1989	LMAG (MATI)/CIAM (M.R.)/LCG (IGC)
CSA991000615001025	Titulado medio laboratorio	A Coruña	Definitivo	FC	Diplomado Enfermaría	Lei 17/1989	C. Traballo/LCG (IGC)
CSA991000615001026	Titulado medio laboratorio	A Coruña	Definitivo	FC	Axudante Técnico Sanitario	Lei 17/1989	C. Traballo/LCG (IGC)
SAC991000615001020	Auxiliar sanitario	A Coruña	Definitivo	LF	Bacharelato superior	Laborais	CIAM-LAFIGA (M.R.)
SAC991000615001023	Auxiliar sanitario	A Coruña	Definitivo	LF	Estudos primarios	Laborais	CIAM-LAFIGA (M.R.)
SAC991000615001029	Auxiliar sanitario	A Coruña	Provisional	FC	Estudos primarios	Laborais	C. Sanidade
SAC991000615001031	Auxiliar sanitario	A Coruña	Definitivo	LF	Graduado escolar	Laborais	CIAM-LAFIGA (M.R.)
Código do posto	Denominación do posto	Local.	Forma ocupación	Vinc.	Titulación	RPT	Proposta traspaso centros de destino
CSA991000632001010	Titulado superior laboratorio	Ourense	Definitivo	FC	Licenciado Farmacia	Lei 17/1989	C. Sanidade
CSA991000632001020	Titulado medio laboratorio	Ourense	Definitivo	FC	Diplomado Enfermaría	Lei 17/1989	C. Traballo/EVEGA (M.R.)
SAC991000632001020	Auxiliar de laboratorio	Ourense	Definitivo	LF	FP2-Laboratorio	Laborais	Execución sentenza saúde. Pontevedra: LOURIZÁN SALCEDO (M.R)
SAC991000632001025	Auxiliar sanitario	Ourense	Definitivo	LF	FP2-Laboratorio	Laborais	EVEGA (M.R.)
SAC991000632001030	Auxiliar sanitario	Ourense	Definitivo	LF	FP1-Clínica	Laborais	C. Traballo
Código do posto	Denominación do posto	Local.	Forma ocupación	Vinc.	Titulación	RPT	Proposta traspaso centros de destino
CSA991000636001010	Titulado superior laboratorio	Pontevedra	Definitivo	FC	Licenciado Ciencias Biolóxicas	Lei 17/1989	LMAG (MATI)/CIMA (M.R.)
Código do posto	Denominación do posto	Local.	Forma ocupación	Vinc.	Titulación	RPT	Proposta traspaso centros de destino
CSA991000636001011	Titulado superior laboratorio	Pontevedra	Definitivo	FC	Licenciado Farmacia	Lei 17/1989	C. Sanidade
CSA991000636001012	Responsable área físicoquímica	Pontevedra	Definitivo	FC	Licenciado Farmacia	Lei 17/1989	C. Medio Rural e do Mar
CSA991000636001014	Titulado superior laboratorio	Pontevedra	Definitivo	FC	Licenciado Ciencias Biolóxicas	Lei 17/1989	LMAG (MATI)/CIMA (M.R.)
CSA991000636001015	Responsable área de microbioloxía	Pontevedra	Definitivo	FC	Licenciado Farmacia	Lei 17/1989	LMAG (MATI)
SAC991000636001020	Auxiliar de laboratorio	Pontevedra	Provisional	FC	FP2- Sanitaria	Laborais	LMAG (MATI)/CIMA INTECMAR LOURIZÁN SALCEDO (M.R)
SAC991000636001039	Auxiliar sanitario	Pontevedra	Provisional	FC	FP1-Sanitaria	Laborais	CIMA INTECMAR LOURIZÁN (M.R.)
SAC991000636590005	Auxiliar de laboratorio	Vilagarcía de Arousa	Definitivo	LF	FP1-Sanitaria	Laborais	LMAG (MATI)/CIMA INTECMAR LOURIZÁN (M.R.)
* No caso de que na petición dun posto coincida máis dunha persoa por categoría, aplicaranse para a adxudicación os criterios recollidos no presente plan.
Centros de destino
CIAM -	Centro de Investigacións Agrarias de Mabegondo: estrada Betanzos - Santiago, km 7 Mabegondo, 15318 Abegondo, A Coruña
LAFIGA -	Laboratorio Agrario e Fitopatolóxico de Galicia: estrada Betanzos a Mesón do Vento AC-542, p.q. 7,5. Mabegondo. Abegondo, 15318 A Coruña
LCG -	Laboratorio de Consumo de Galicia: R/ Torres Quevedo, 3-5 A Grela, 15071 A Coruña
EVEGA -	Estación de Viticultura e Enoloxía de Galicia (Leiro): Ponte San Clodio 32427 Leiro, Ourense
INTECMAR -	Instituto Tecnolóxico para o Control do Medio Mariño de Galicia: Peirao de Vilaxoán, s/n, 36611 Vilagarcía de Arousa
LOURIZÁN -	Centro de Investigación Forestal de Lourizán: estrada Pontevedra-Marín km 4, aptdo. 127, 36080 Lourizán
SALCEDO -	Laboratorio de Sanidade Animal de Salcedo: Centro de Apoio Cabanas, s/n, 36143 Salcedo
CIMA -	Centro de Investigacións Mariñas: Pedras de Corón, s/n, aptdo.13, 36620 Vilanova de Arousa
LMAG (A CORUÑA) -	Laboratorio de Medio Ambiente de Galicia: R/ Torres Quevedo, 3-5. A Grela, 15071 A Coruña
LMAG (PONTEVEDRA) -	Laboratorio de Medio Ambiente de Galicia: estrada Pontevedra-Marín km 4, aptdo. 127, 36080 Lourizán

ANEXO II
Relación de postos de traballo ocupados por persoal funcionario interino, persoal laboral temporal e
persoal laboral indefinido non fixo que se traspasan na relación de postos de traballo do
Servizo de Laboratorio de Saúde Pública de Galicia (Lugo)

A Coruña
Código do posto	Denominación do posto	Nivel	Localidade		Forma de ocupación	Grupo	Vinc.	RPT
CSA991000615001013	Responsable área fisicoquímica	22	Coruña, A		Adscrición temporal	A	FI	Lei 17/1989
CSA991000615001027	Titulado medio laboratorio	18	Coruña, A		Adscrición temporal	B	FI	Lei 17/1989
CSA991000615001029	Titulado medio laboratorio	18	Coruña, A		Adscrición temporal	B	FI	Lei 17/1989
CSA991000615001030	Titulado medio laboratorio	18	Coruña, A		Adscrición temporal	B	FI	Lei 17/1989
SAC991000615001018	Analista de laboratorio		Coruña, A		Laboral temporal	III	LI	Laborais
Ourense
CSA991000632001011	Titulado superior laboratorio	22	Ourense	Adscrición temporal		A	FI	Lei 17/1989
Pontevedra
CSA991000636001013	Responsable área de calidade	22	Pontevedra	Adscrición temporal		A	FI	Lei 17/1989
SAC991000636001010	Analista de laboratorio		Pontevedra	Laboral indefinido		III	LI	Laborais
SAC991000636001011	Analista de laboratorio		Pontevedra	Laboral indefinido		III	LI	Laborais
SAC991000636001012	Analista de laboratorio		Pontevedra	Laboral indefinido		III	LI	Laborais
SAC991000636001025	Auxiliar de laboratorio		Pontevedra	Laboral temporal		IV	LT	Laborais
SAC991000636001028	Auxiliar de laboratorio		Pontevedra	Laboral temporal		IV	LT	Laborais
SAC991000636001031	Auxiliar de laboratorio		Pontevedra	Laboral temporal		IV	LT	Laborais
SAC991000636001033	Auxiliar de laboratorio		Pontevedra	Laboral temporal		IV	LT	Laborais
SAC991000636001036	Auxiliar de laboratorio		Pontevedra	Laboral temporal		IV	LT	Laborais

ANEXO II (bis)
Relación de postos de traballo ocupados por persoal laboral indefinido non fixo

A Coruña
Código do posto	Denominación do posto	Localidade	Forma de ocupación	Grupo	Vinc.	RPT	Observacións 2
SAC991000615001050	Analista de laboratorio	Coruña, A	Laboral indefinido	III	LI	Laborais	Disposición transitoria 10.1ª
Ourense
SAC991000632001051	Analista de laboratorio	Ourense	Laboral indefinido	III	LI	Laborais	Disposición transitoria 10.1ª
Pontevedra
SAC991000636001014	Analista de laboratorio	Pontevedra	Laboral indefinido	III	LI	Laborais	Disposición transitoria 10.1ª
SAC991000636001015	Analista de laboratorio	Pontevedra	Laboral indefinido	III	LI	Laborais	Disposición transitoria 10.1ª
SAC991000636001016	Analista de laboratorio	Pontevedra	Laboral indefinido	III	LI	Laborais	Disposición transitoria 10.1ª

ANEXO III
Postos vacantes puros que se trasladan a Lugo

A Coruña
Código do posto	Denominación do posto	Nivel	Localidade	Forma de ocupación	Grupo	Vinc.	Observacións	RPT
SAC991000615001025	Auxiliar de laboratorio		Coruña, A	Vacante	IV	LF	B10 Perigosidade	Laborais
SAC991000615001027	Auxiliar de laboratorio		Coruña, A	Vacante	IV	LF	B10 Perigosidade	Laborais
Pontevedra
Código do posto	Denominación do posto	Nivel	Localidade	Forma de ocupación	Grupo	Vinc.	Observacións	RPT
SAC991000636001013	Analista de laboratorio		Pontevedra	Vacante	III			Laborais