A Orde do 28 de maio de 2013 pola que se regulan os cartóns de bingo autorizados na Comunidade Autónoma de Galicia, a súa subministración electrónica e a presentación e o pagamento electrónico dos tributos sobre o xogo do bingo, establece, por un lado, as características, o formato e o contido dos cartóns de bingo autorizados pola consellería competente en materia de xogo para o seu uso nas salas de bingo situadas en Galicia; por outro lado, as condicións xerais e o procedemento para a súa expedición e distribución e, por último, a creación do Censo electrónico de salas de bingo de Galicia e os aspectos relativos ao pagamento dos tributos que gravan o xogo do bingo e á presentación das autoliquidacións correspondentes. Na dita orde establécese a obrigatoriedade da solicitude electrónica dos cartóns e a obrigatoriedade de subministración electrónica destes por parte da Axencia Tributaria de Galicia (Atriga). Non obstante, a orde prevé un período transitorio no cal seguirán subministrando cartóns da Fábrica Nacional de Moeda e Timbre-Real Casa da Moeda (FNMT-RCM) as delegacións da Atriga. Así, o parágrafo primeiro da disposición transitoria única da orde establece que a Dirección da Atriga determinará, mediante resolución publicada no Diario Oficial de Galicia, a data a partir da cal non se subministrarán cartóns de bingo da FNMT-RCM a través das delegacións da Atriga.
Por outra parte, a Orde do 28 de maio de 2013, no punto 2 da disposición transitoria única, establece que, mediante resolución da Dirección Xeral da Atriga, se determinará a data a partir da cal comezará a subministración electrónica dos cartóns para o xogo do bingo.
Tendo en conta as existencias de cartóns da FNMT-RCM nas delegacións da Atriga na data da sinatura desta resolución e, en uso da facultade atribuída á Dirección da Atriga pola disposición transitoria única, parágrafos 1 e 2 da Orde do 28 de maio de 2013,
RESOLVO:
Primeiro. Os cartóns para o desenvolvemento do xogo do bingo expedidos pola Fábrica Nacional de Moeda e Timbre-Real Casa da Moeda (FNMT-RCM) seguirán subministrándoos as delegacións da Axencia Tributaria de Galicia (Atriga) ata a fin das súas existencias, terán como data límite para a súa subministración o 3 de novembro de 2013, data a partir da cal eses cartóns físicos deixarán de subministrarse.
Segundo. Os cartóns para o desenvolvemento do bingo regulados na Orde do 28 de maio de 2013 comezará a subministralos electronicamente a Atriga o día 4 de novembro de 2013.
Terceiro. Durante a última semana de outubro subministraránselles electronicamente en modo proba cartóns aos titulares das salas que así o demanden a través da Oficina Virtual Tributaria. Estes cartóns virán identificados informaticamente e non poderán ser utilizados para o desenvolvemento do xogo do bingo.
Santiago de Compostela, 18 de outubro de 2013
Ulpiano L. Villanueva Rodríguez
Director da Axencia Tributaria de Galicia