O 25 de abril de 2008 asinouse un convenio de colaboración entre a Vicepresidencia da Igualdade e do Benestar, o Instituto Galego da Vivenda e Solo da Xunta de Galicia e o Concello de Maside para a erradicación do chabolismo neste concello.
O ámbito destinado a levar a cabo a actuación sitúase próximo ao actual poboado chabolista, próximo aos núcleos urbanos de Fonteboa-Dacón e da Fontela, no concello de Maside.
O ámbito que se vai ordenar foi cualificado pola modificación puntual das NN.SS.MM do concello de Maside como solo urbanizable delimitado residencial S.UR-R6.
Foi redactado un plan parcial polos servizos técnicos do IGVS en Ourense que foi aprobado definitivamente o 10 de novembro de 2011.
A maior parte dos terreos foi adquirida polo IGVS e na actualidade faltan un total de seis parcelas por adquirir, por non se ter localizado aos seus propietarios.
O plan parcial desenvolve a área en que a modificación puntual das NN.SS.MM aprobada definitivamente o 21 de outubro de 2008 clasificaba como solo urbanizable delimitado o sector en que se desenvolve a actuación, e como solo rústico de protección de infraestruturas os terreos lindantes co ramal de enlace AP-53 coa estrada autonómica A-53 Santiago-Ourense.
Segundo dispón o artigo 98.1 da Lei 9/2002, do 30 de decembro, de ordenación urbanística e protección do medio rural de Galicia (LOUGA), a aprobación dos instrumentos de ordenación urbanística comportará a declaración de utilidade pública e a necesidade de ocupación dos bens e dereitos afectados aos fins de expropiación ou imposición de servidumes.
Trátase dunha expropiación urbanística e, como tal, regulada na LOUGA, no Real decreto lexislativo 2/2008, do 20 de xuño, polo que se aproba o texto refundido da Lei do solo (TRLS) e no Real decreto 3288/1978, do 25 de agosto, que aproba o Regulamento de xestión urbanística (RXU).
Para os efectos da fixación do prezo xusto, para o seu pagamento aos propietarios afectados e ocupación dos predios afectados o IGVS formulou o proxecto de expropiación que se vai tramitar polo procedemento de taxación conxunta, de acordo co disposto nos artigos 142 e 143 da LOUGA, 29 e seguintes do TRLS e 201 e 202 do RXU.
De conformidade co previsto nos artigos 142 e 143 da Lei 9/2002, do 30 de decembro, acórdase:
– Iniciar o expediente de expropiación por taxación conxunta para a execución do S.UR-R6 na Fontela, concello de Maside, destinado á construción de vivendas de promoción pública para a erradicación do chabolismo.
– Someter a información pública polo prazo de un mes, mediante inserción de anuncios no Diario Oficial de Galicia e nun xornal dos de maior circulación na provincia, o expediente expropiatorio dos bens e dereitos que se precisan ocupar para a execución do S.UR-R6 na Fontela, concello de Maside, destinado á construción de vivendas de promoción pública para a erradicación do chabolismo, para que quen poida resultar interesado formule as observacións e reclamacións que xulgue convenientes, en particular no que concerne á titularidade ou valoración dos seus respectivos bens ou dereitos.
Para os efectos do recoñecemento da titularidade dos bens e dereitos afectados e ao pagamento, no seu momento, do prezo xusto aprobado, os propietarios e titulares de dereitos deberán achegar os documentos ou títulos xustificativos completados con certificación rexistral destes ou, se é o caso, certificación negativa referida ao mesmo predio descrito nos títulos.
Darase audiencia ao Concello de Maside e notificarase ao Ministerio Fiscal e á Delegación Provincial do Ministerio de Economía e Facenda e publicaranse os edictos para os efectos do previsto no artigo 59 da Lei 30/1992, do 26 de novembro, de réxime xurídico das administracións públicas e do procedemento administrativo común.
– Expoñer o expediente á disposición dos interesados no concello de Maside, na Área Provincial do Instituto Galego da Vivenda e Solo, sita na rúa Sáenz Díez nº 1 de Ourense CP 32071 e nas oficinas do IGVS, sitas en Área Central s/n, polígono das Fontiñas, Santiago de Compostela. Durante o dito prazo todas aquelas persoas ou entidades que se consideren afectadas poderán presentar as alegacións que consideren oportunas na Área Provincial do Instituto Galego da Vivenda e Solo, sita na rúa Sáenz Díez nº 1 de Ourense CP 32071, ou en calquera das formas previstas no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
Incorpórase como anexo á presente a relación inicial de bens, dereitos e titulares.
Santiago de Compostela, 5 de novembro de 2012
Antonio José Boné Pina
Director xeral do Instituto Galego da Vivenda e Solo
ANEXO
Relación inicial de bens, dereitos e titulares
Nº predio |
Polígono |
Titular |
Superficie que se vai expropiar (m2) |
957 |
31 |
Descoñecido |
1.575,00 |
965 |
31 |
Descoñecido |
496,00 |
966 |
31 |
Descoñecido |
493,00 |
968 |
31 |
Descoñecido |
676,00 |
969 |
31 |
Descoñecido |
952,00 |
971 |
31 |
Descoñecido |
379,00 |