En maio de 2010 Augas de Galicia elaborou o proxecto de actuacións de reposición de servizos na ribeira do río Sar en Estramundi, concello de Padrón (OH.915.994) e presentou o 30 de novembro de 2010 á Secretaría Xeral de Calidade e Avaliación Ambiental da Consellería de Medio Ambiente, Territorio e Infraestruturas a solicitude de cualificación ambiental.
O proxecto ten como obxectivo actuacións de reposición das estruturas viarias e de saneamento na marxe esquerda do río Sar na zona de Estramundi, para frear a erosión do río e dar servizo ás parcelas adxacentes, garantindo o acceso a estas e á ponte de Estramundi. Parte dos terreos afectados polas obras pertencen á zona de especial protección dos valores naturais ZEPVN-LIC ES 1140001, Sistema fluvial Ulla-Deza, e os que non pertencen á dita zona están anexos a ela.
Tendo en conta o anterior, o órgano ambiental determinou que o documento técnico debe someterse ao procedemento de impacto ambiental ao estar incluído no grupo 9, alínea c, epígrafe 7 do anexo I do Real decreto lexislativo 1/2008, do 11 de xaneiro, polo que se aproba o texto refundido da Lei de impacto ambiental de proxectos, comunicándoo o 22 de decembro de 2010.
Na mesma data e co obxecto de determinar a amplitude e nivel de detalle do estudo de impacto ambiental a elaborar, o órgano ambiental inicia o período de consultas previas establecido no mencionado Real decreto lexislativo 1/2008.
Finalizado o prazo legalmente establecido para o período de consultas previas, a Secretaría Xeral de Calidade e Avaliación Ambiental emite, con data do 4 de marzo de 2011, informe en que se define o alcance do estudo de impacto ambiental e se dá traslado a Augas de Galicia das contestacións recibidas no período de consultas previas.
Tendo en consideración o alcance para a redacción do estudo de impacto ambiental definido pola dita Secretaría Xeral de Calidade e Avaliación Ambiental, Augas de Galicia en marzo de 2012 elabora o estudo de impacto ambiental.
Augas de Galicia, como órgano substantivo, debe someter a información pública o mencionado estudo de impacto ambiental de referencia, de conformidade co disposto no dito Real decreto lexislativo 1/2008, na Lei 1/1995, do 2 de xaneiro, de protección ambiental de Galicia, e no Decreto 442/1990, do 13 de setembro, de avaliación do impacto ambiental para Galicia.
O órgano ambiental competente para resolver o procedemento de avaliación de impacto ambiental é a Secretaría Xeral de Calidade e Avaliación Ambiental da Consellería de Medio Ambiente, Territorio e Infraestruturas; así mesmo, o órgano competente para resolver a aprobación do proxecto de actuacións de reposición de servizos na ribeira do río Sar en Estramundi é Augas de Galicia.
As decisións serán adoptadas pola Secretaría Xeral de Calidade e Avaliación Ambiental da Consellería de Medio Ambiente, Territorio e Infraestruturas da Xunta de Galicia respecto da formulación da declaración de impacto ambiental preceptiva.
Considerando o exposto anteriormente, a Dirección de Augas de Galicia, ao abeiro das facultades que lle confire a Lei 9/2010, do 4 de novembro, de augas de Galicia, e o Decreto 32/2012, do 12 de xaneiro, polo que se aproba o Estatuto da entidade pública empresarial Augas de Galicia,
RESOLVE:
Primeiro. Someter ao trámite de información pública o estudo de impacto ambiental do proxecto de actuacións de reposición de servizos na ribeira do río Sar en Estramundi, concello de Padrón (A Coruña), clave do expediente 2010/0225.
Segundo. Que o período de información pública será de 30 días hábiles, contados a partir do día seguinte ao da publicación desta resolución no Diario Oficial de Galicia, prazo en que as persoas e/ou entidades que o consideren oportuno poderán presentar cantas alegacións ou observacións consideren oportunas, por escrito dirixido á Dirección de Augas de Galicia no rexistro da entidade na rúa Doutor Maceira 18, baixo, 15706, en Santiago de Compostela.
Terceiro. Que o estudo de impacto ambiental estará á disposición do público interesado e en días hábiles na Área Técnica (rúa Doutor Maceira 18, baixo, 15706 Santiago de Compostela) e na zona hidrográfica Galicia-Centro de Augas de Galicia (rúa Tomiño, 16, 15781 Santiago de Compostela); na Subdirección Xeral de Avaliación Ambiental da Secretaría Xeral de Calidade e Avaliación Ambiental (San Lázaro, s/n, 15781 Santiago de Compostela); no Servizo de Calidade e Avaliación Ambiental da Xefatura Territorial da Coruña da Consellería de Medio Ambiente, Territorio e Infraestruturas (praza Luís Seoane, s/n, 15008 A Coruña) e no Concello de Padrón (rúa Longa, 27, 15900 Padrón). Ademais, poderá consultarse no enderezo http://augasdegalicia.xunta.es/
Así mesmo, considérase oportuno someter a información pública na forma e prazo sinalados o proxecto técnico, documento que estará á disposición dos interesados na Área Técnica de Augas de Galicia.
O que se fai público para todos os efectos legais e regulamentarios de aplicación na materia e para o seu coñecemento xeral.
Santiago de Compostela, 12 de xuño de 2012
Francisco Menéndez Iglesias
Director de Augas de Galicia