O Pleno da Corporación, na sesión que tivo lugar o día 23 de febreiro de 2012, adoptou o seguiente acordo:
a) Resolver as alegacións formuladas no período de información pública a que se someteu o acordo de aprobación inicial do Plan parcial do solo urbanizable delimitado número 14, Monte do Seixo, de conformidade co informe emitido polo equipo redactor e presentado o do 1 de xuño de 2011 (tomo V, epígrafe 2, denominado «resposta ás alegacións presentadas»).
b) Aprobar definitivamente o Plan parcial do solo urbanizable delimitado número 14 (SUD-14) Monte do Seixo, coas seguintes modificacións, respecto do inicialmente aprobado:
– Actualízase a relación de propietarios afectados, de acordo coa actual información catastral.
– Inclúense en distintos puntos da normativa os condicionantes resultantes dos informes sectoriais emitidos, e refórmanse os planos correspondentes segundo as indicacións realizadas, todo isto segundo se explica na páxina 10 e seguintes do tomo IV do Plan.
– Inclúese no tomo III do Plan a documentación acreditativa da titularidade dos terreos pertencentes aos propietarios integrantes da Comisión Xestora, que representan máis do 50% da superficie obxecto de ordenación.
– Refórmase o Plan de etapas co obxecto de ampliar os prazos de execución das distintas actuacións, de conformidade coa alegación presentada pola Comisión Xestora de Propietarios, representada por Donatila Roca García.
– Nas parcelas con edificación preexistente que se mantén, establécese expresamente a aplicación do réxime de fóra de ordenación consonte o disposto polos artigos 219 e seguintes do Plan Xeral de Ordenación Municipal (PXOM). Por outra parte, axústase a edificabilidade real que pode materializarse nas ditas parcelas co obxecto de reducir a diferenza entre o aproveitamento de feito e o que de dereito corresponde aos respectivos propietarios afectados, diminuíndo así a carga que para estes vai supoñer a aprobación do futuro proxecto de equidistribución.
– Ao abeiro do que establecen os artigos 74.a) e 110.6 da LOUG, inclúese na normativa do Plan unha nova epígrafe (4.6) sobre o deber de conservación da urbanización, coa seguinte redacción:
«Os propietarios das parcelas resultantes con aproveitamento lucrativo deberán constituírse en entidade urbanística de conservación, asumindo a obriga de conservar a urbanización resultante, nos termos que para tal efecto se precisarán no correspondente proxecto de urbanización. O deber de conservación, por un prazo de trinta anos, incluirá como mínimo os espazos libres EL-04, EL-06, EL-07, EL-08 e EL-09.
c) Requirir da agrupación promotora a presentación da documentación que incorpore á normativa a epígrafe 4.6 relativa á conservación da urbanización, coa redacción indicada no anterior alínea b).
O presente acordo notificaráselles aos interesados e publicarase no Diario Oficial de Galicia e no Boletín Oficial da provincia, en que se inserirá a normativa urbanística aprobada.
Así mesmo, remitirase á Consellería de Medio Ambiente, Territorio e Infraestruturas comunicación deste acordo de aprobación definitiva, xunto con dous exemplares dilixenciados do proxecto definitivamente aprobado».
Con data do 23 de marzo de 2012, a agrupación promotora do SUD-14 presentou a correspondente documentación para incorporar á normativa do documento aprobado definitivamente, consistente na inclusión da epígrafe 4.6, relativa á conservación da urbanización.
O acto de aprobación definitiva do citado plan parcial foi comunicado á Consellería de Medio Ambiente, Territorio e Infraestruturas o 26 de marzo de 2012, en cumprimento do disposto polo artigo 92.3 da Lei 9/2002, do 30 de decembro, de ordenación urbanística e protección do medio rural de Galicia (LOUG).
O anuncio da aprobación definitiva, xunto coa normativa publicouse no Boletín Oficial da provincia da Coruña n.º 72, o día 17 de abril de 2012.
Contra o acordo de aprobación definitiva do citado plan parcial, poderase interpoñer directamente recurso contencioso-administrativo ante o Tribunal Superior de Xustiza de Galicia no prazo de dous meses, contado a partir do día seguinte ao da publicación deste anuncio.
Santiago de Compostela, 18 de abril de 2012.
Ángel Currás Fernández
Alcalde