Examinada a solicitude de revisión de esbozo formulada polos representantes do MVMC Oural e Texo, pertencente á CMVMC de Bozqueimado, Casteligo, Celeiros, A Ventosa e Lamas, no concello de Chandrexa de Queixa, resultan os seguintes

Feitos:

Primeiro. O 11.5.2023, a CMVMC de Bozqueimado, Casteligo, Celeiros, A Ventosa e Lamas presentou unha solicitude (Rexel núm. 2023/1412164) de revisión de esbozo do MVMC Oural e Texo, en Chandrexa de Queixa.

Coa solicitude achegaron a seguinte documentación:

– Certificación do acordo da Asemblea Xeral do día 5.3.2023.

– Memoria.

– Arquivos xeográficos en formato vectorial.

Segundo. O Servizo de Montes da Xefatura Territorial de Ourense emitiu un informe favorable o día 13 de setembro de 2023 en relación coa citada solicitude. Nel indícase que o perímetro do MVMC obxecto de revisión inclúe as partes do perímetro lindeiras con particulares, ben que non revisa a totalidade delas.

A superficie do MVMC Oural e Texo, unha vez modificado o esbozo, sería de 212,61 ha fronte ás 266 ha do acordo de clasificación, o que supón unha redución do 20,1 %.

Consideracións legais e técnicas:

Único. A Lei 7/2012, do 28 de xuño, de montes de Galicia, na súa disposición transitoria décimo terceira, establece o procedemento de revisión de esbozos de montes veciñais en man común.

De acordo con ela, os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión axustándoos e completándoos con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 13 de setembro de 2023, o Xurado Provincial de Montes Veciñais en Man Común acordou por unanimidade o día 24 de xuño de 2024:

Aprobar a proposta de revisión de esbozo do MVMC Oural e Texo, pertencente á CMVMC de Bozqueimado, Casteligo, Celeiros, A Ventosa e Lamas, no concello de Chandrexa de Queixa.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto no artigo 12 da citada Lei 13/1989, nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 3 de xullo de 2024

José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense