Visto o texto do acordo da Comisión Paritaria de Vixilancia e Interpretación do Convenio para o persoal de administración e servizos laboral fixo da Universidade de Santiago de Compostela (USC), que se subscribiu o 12 de abril de 2024 entre a representación de USC e a representación legal dos traballadores e traballadoras das centrais sindicais CIG, CC.OO. e CSIF, e de conformidade co disposto no artigo 90, puntos 2 e 3, do Real decreto lexislativo 2/2015, do 23 de outubro, polo que se aproba o texto refundido da Lei do Estatuto dos traballadores, e no Real decreto 713/2010, do 28 de maio, sobre rexistro e depósito de convenios colectivos, acordos colectivos de traballo e plans de igualdade.

A Secretaría Xeral de Emprego e Relacións Laborais,

RESOLVE:

Primeiro. Ordenar o seu rexistro e depósito no Rexistro de Convenios e Acordos Colectivos de Traballo da Comunidade Autónoma de Galicia (Rexcon), creado mediante a Orde do 29 de outubro de 2010 (DOG núm. 222, do 18 de novembro).

Segundo. Dispoñer a súa publicación no Diario Oficial de Galicia.

Santiago de Compostela, 25 de xuño de 2024

Pablo Fernández López
Secretario xeral de Emprego e Relacións Laborais

Acordo da Comisión Paritaria de Vixilancia e Interpretación do Convenio
para o persoal de administración e servizos laboral fixo da Universidade
de Santiago de Compostela

O artigo 7 do Convenio colectivo para o persoal laboral da administración e servizos da USC, establece que se constituirá unha Comisión Paritaria de Vixilancia e Interpretación do Convenio, para o exame e resolución de cantas cuestións deriven da súa interpretación, vixilancia e aplicación.

Entre as competencias da dita comisión está a interpretación da totalidade do articulado e cláusulas do convenio.

A idade obrigatoria e xubilación foi obxecto de varias modificacións nos últimos anos. Actualmente, a redacción do Real decreto lexislativo 8/2015, do 30 de outubro, polo que se aproba o texto refundido da Lei xeral de Seguridade Social, é a seguinte:

«Artigo 205. Beneficiarios

1. Terán dereito á pensión de xubilación regulada neste capítulo, as persoas incluídas no réxime xeral que, ademais da xeral exixida no artigo 165.1, reúnan as seguintes condicións:

a) Ter cumprido sesenta e sete anos de idade, ou sesenta e cinco anos cando se acrediten trinta e oito anos e seis meses de cotización, sen que se teña en conta a parte proporcional correspondente ás pagas extraordinarias».

Así mesmo, a disposición transitoria sétima do devandito texto normativo, fai referencia á aplicación paulatina da idade de xubilación e dos anos de cotización:

«As idades de xubilación e o período de cotización a que se refire o artigo 205.1.a), así como as referencias á idade que se conteñen nos artigos 152.1, 207.1.a) e 2, 208.1.a) e 2, 214.1.a) e 311.1 aplicaranse de xeito gradual, nos termos que resultan do seguinte cadro».

Ano	Períodos cotizados	Idade de xubilación
2024	38 anos ou máis	65 anos
	Menos de 38 anos	66 anos e 6 meses
2025	38 anos e 3 meses ou máis	65 anos
	Menos de 38 anos e 3 meses	66 anos e 8 meses
2026	38 anos e 3 meses ou máis	65 anos
	Menos de 38 anos e 3 meses	66 anos e 10 meses
A partir do 2027	38 anos e 6 meses ou máis	65 anos
	Menos de 38 anos e 3 meses	67 anos

A Comisión Paritaria de Vixilancia e Interpretación do Convenio acordou o seguinte:

Primeiro. A Comisión Paritaria de Vixilancia e Interpretación do Convenio, interpretou, por acordo do 18 de xullo de 2023, o artigo 83 nestes termos:

A xubilación anticipada. O persoal fixo afectado por este convenio poderá xubilarse anticipadamente nos termos legais establecidos. Ao persoal que se xubile a partir dos sesenta e tres anos concederáselle unha gratificación, por unha soa vez e polo referido feito, de acordo coa seguinte escala:

Idade	Mensualidades
60, 61 e 62 (soamente discapacidade >65 %)	24 mensualidades
63 anos	20 mensualidades
64 anos	16 mensualidades
65 anos	12 mensualidades
66 anos	8 mensualidades

Desde a entrada en vigor do dito acordo, púxose de manifesto a diferencia que se está a producir no importe do premio de xubilación para percibir polo persoal cuxa idade de xubilación ordinaria é os 65 anos respecto do que a ten aos 66 anos, independente do número de meses en que adiante a xubilación.

Visto o anterior, cómpre adaptar a interpretación do artigo 83 de cara a implantar un sistema máis equitativo e que se adapte, ao mesmo tempo, ao marco normativo actual. Polo tanto, a Comisión Paritaria de Vixilancia e Interpretación do Convenio, interpreta, por acordo do 12 de abril de 2024, o artigo 83 nestes termos:

A xubilación anticipada. O persoal fixo afectado por este convenio poderá xubilarse anticipadamente nos termos legais establecidos. Ao persoal que se xubile anticipadamente con, como mínimo, dous anos de antigüidade na USC, concederáselle unha gratificación, en función do número de meses que lle resten para acadar a xubilación ordinaria que non poderá ser inferior a 12, por unha soa vez e polo referido feito, de acordo coa seguinte escala:

Número de meses en que anticipa a xubilación	Importe
24 meses	20 mensualidades
18 meses	16 mensualidades
16 meses	14 mensualidades
12 meses	12 mensualidades

Segundo. Polo que se refire á redacción do artigo 86, parágrafo cuarto do citado convenio, por acordo da Comisión Paritaria de Vixilancia e Interpretación do Convenio do 18 de xullo de 2023 interpretou o dito artigo nos seguintes termos:

Xubilación. Ao producirse a xubilación dun traballador que teña como mínimo 15 anos de antigüidade recoñecida, percibirá o importe íntegro de tres mensualidades e unha máis por cada cinco anos ou fracción que exceda dos quince de referencia. A percepción desta cantidade será incompatible coas establecidas no artigo 83.

Acórdase modificar a redacción para incrementar nunha mensualidade o premio á idade de xubilación ordinaria, e a redacción queda nos seguintes termos:

Xubilación. Ao producirse a xubilación dun traballador que teña como mínimo 15 anos de antigüidade na USC, percibirá o importe íntegro de catro mensualidades e unha máis por cada cinco anos ou fracción que exceda dos quince de referencia. A percepción desta cantidade será incompatible coas establecidas no artigo 83.

En mostra de conformidade, asinan o presente acordo en Santiago de Compostela o 12 de abril de 2024.