Na sesión realizada polo Xurado Provincial o día 4 de xuño de 2024 figura o seguinte acordo:

Monte Bustelo, pertencente aos veciños de Bustelo, da parroquia de Negueira, no concello de Negueira de Muñiz. Expediente: Negueira/39_73/2020_66.

O 20 de decembro de 2021 o Xurado ditou a resolución de aprobar a revisión do esbozo do monte veciñal de Bustelo. O acordo foi publicado no Diario Oficial de Galicia do 4 de febreiro de 2022.

O 11 de febreiro de 2022, ante o Rexistro da Oficina Comarcal de Sarria, Manuel Cancio López e Luís Río Muíña, no seu nome e en representación doutros copropietarios, presentaron un recurso de reposición contra o acordo de revisión de esbozo no cal argumentan que afecta o monte privado de Negueira de Muñiz. O recurso foille remitido á comunidade de Bustelo para que alegasen o que considerasen conveniente.

O 22 de setembro de 2022 o Xurado ditou unha resolución pola cal se estimou o recurso presentado pero, involuntariamente, non se tiveron en conta as alegacións presentadas o 21 de xuño de 2022 pola comunidade do MVMC Bustelo. Isto deu lugar a unha solicitude de revisión de oficio por parte da dita comunidade.

O 17 de marzo de 2023 o Xurado acordou o inicio da revisión de oficio da Resolución do 22 de setembro de 2022, ao darse a causa de nulidade recollida no artigo 47.1.e) da Lei 39/2015, do 1 de outubro, do procedemento administrativo común das administracións públicas.

Mediante a Resolución do conselleiro do Medio Rural, do 11 de outubro de 2023, quedou anulada a Resolución do 22 de setembro de 2022 ditada polo Xurado Provincial de Clasificación de Montes Veciñais en Man Común pola que se estimaba o recurso de reposición presentado o 11 de febreiro de 2022. Así mesmo, ordenou retrotraer as actuacións ao momento anterior á dita resolución, para os efectos de que se continúe coa instrución do procedemento de revisión de esbozo e se resolva sobre o recurso de reposición presentado.

En cumprimento da Resolución do 11 de outubro de 2023, retrotraese o expediente e procede ditar resolución do recurso de reposición contra a revisión do esbozo aprobada polo Acordo do Xurado do 20 de decembro de 2021.

Unha vez examinado o recurso de reposición, o Xurado, por unanimidade, acorda desestimalo, de conformidade cos fundamentos que se recollen na correspondente resolución.

Contra esta resolución poderá interporse recurso contencioso-administrativo ante o Xulgado do Contencioso-Administrativo de Lugo no prazo de dous meses, contados desde o día seguinte á súa notificación ou publicación no Diario Oficial de Galicia, de conformidade co artigo 46 da Lei 29/1998, do 13 de xullo, da xurisdición contencioso-administrativa.

Lugo, 11 de xuño de 2024

María Olga Iglesias Fontal
Presidenta do Xurado Provincial de Clasificación de Montes
Veciñais en Man Común de Lugo