DOG 115 do 14/6/2024 - RESOLUCIÓN do 5 de xuño de 2024 pola que se establecen as bases reguladoras para a concesión, en réxime de concorrencia non competitiva, de subvencións para actuacións de eficiencia enerxética en empresas turísticas, incluídas no Plan de modernización e competitividade do sector turístico do Plan de recuperación, transformación e resiliencia financiado pola Unión Europea-NextGenerationEU, e se procede á súa convocatoria para o ano 2024, con carácter plurianual (código de procedemento TU986B).

III. Outras disposicións

Axencia de Turismo de Galicia

RESOLUCIÓN do 5 de xuño de 2024 pola que se establecen as bases reguladoras para a concesión, en réxime de concorrencia non competitiva, de subvencións para actuacións de eficiencia enerxética en empresas turísticas, incluídas no Plan de modernización e competitividade do sector turístico do Plan de recuperación, transformación e resiliencia financiado pola Unión Europea-NextGenerationEU, e se procede á súa convocatoria para o ano 2024, con carácter plurianual (código de procedemento TU986B).

O Consello Europeo aprobou o 21 de xullo de 2020 a creación do programa NextGenerationEU como instrumento de estímulo económico en resposta á crise causada polo coronavirus.

O 10 de novembro de 2020, o Parlamento Europeo e o Consello alcanzaron o acordo sobre o paquete de medidas que inclúe os fondos NextGenerationEU e o Marco financeiro plurianual 2021-2027, creándose o Mecanismo europeo de recuperación e resiliencia como instrumento de apoio aos Estados membros a través de transferencias directas e préstamos para incrementar os investimentos públicos e acometer reformas para paliar os devastadores danos producidos pola COVID-19.

O Regulamento (UE) nº 2021/241 do Parlamento Europeo e do Consello, do 12 de febreiro de 2021, polo que se establece o Mecanismo de recuperación e resiliencia, sinala que os Estados membros elaborarán plans de recuperación e resiliencia nacionais para acollerse a el e alcanzar os obxectivos establecidos, e serán presentados formalmente polos Estados, como moi tarde, o 30 de abril.

A Resolución do 29 de abril de 2021, da Subsecretaría do Ministerio de Asuntos Económicos e Transformación Dixital, dá publicidade ao Acordo do Consello de Ministros, do 27 de abril de 2021, polo que se aproba o Plan de recuperación, transformación e resiliencia, que define as estratexias a seguir no desenvolvemento dos fondos europeos de recuperación. As medidas que recolle o Plan cumpren cos seis alicerces establecidos polo Regulamento da UE e articúlanse ao redor de catro eixes principais (a transición ecolóxica, a transformación dixital, a cohesión social e territorial e a igualdade de xénero). Estes catro eixes de traballo desenvólvense a través de dez políticas panca, que integran, pola súa vez, 30 compoñentes, para contribuír a alcanzar os obxectivos xerais do plan.

O 23 de xaneiro de 2024 publicouse no Boletín Oficial del Estado o Acordo da Conferencia Sectorial de Turismo do 29 de decembro de 2023, sobre repartición territorial de crédito correspondente ao orzamento de 2023, da liña de financiamento para proxectos de eficiencia enerxética e economía circular de empresas turísticas, do Plan de recuperación, transformación e resiliencia (BOE núm. 20, do 23 de xaneiro).

As actuacións que se van desenvolver neste ámbito teñen como finalidade a execución da submedida 2 «Financiamento de proxectos de eficiencia enerxética e economía circular», incluída no investimento 4 «Actuacións especiais no ámbito da competitividade», no marco do compoñente 14 «Plan de modernización e competitividade do sector turístico», ao tempo que contribúen á consecución do obxectivo CID 227.

Este investimento ten por obxecto a adecuación das empresas do sector turístico aos máis elevados estándares en materia de eficiencia enerxética e economía circular, reducindo a súa pegada de carbono.

O citado Acordo do 29 de decembro de 2023 ten por obxecto ampliar a repartición territorial de crédito, previsto no Acordo da Conferencia Sectorial de Turismo do 29 de marzo de 2022. Así mesmo, os recursos da transferencia de 2022 que non fosen comprometidos ou que, a xuízo da comunidade convocante, en razón do número de solicitudes recibidas, non vaian ser comprometidos, poderán ser destinados ao financiamento das actividades comprendidas neste acordo. Na Comunidade Autónoma de Galicia consta un remanente de fondos non comprometidos con cargo á convocatoria anterior de 4.652.085,62 €, que se acumulan aos 5.496.727,00 € correspondentes á asignación financeira do Acordo do 29 de decembro de 2023, que suman un total de 10.148.812,62 €.

Sinala que o número total de establecementos que percibirán axuda en 31 de decembro de 2024 sexan de aloxamento turístico ou doutros subsectores turísticos, computarán indistintamente para os efectos do cumprimento do fito de execución contido no anexo V do Acordo da Conferencia Sectorial de Turismo do 29 de marzo de 2022, co número de beneficiarios final que figura actualizado na cláusula cuarta, conforme a nova repartición do orzamento obxecto deste acordo.

A execución deste programa contribuirá a alcanzar os obxectivos ambientais e enerxéticos establecidos na normativa da Unión Europea que favorezan a redución do consumo de enerxía final e das emisións de dióxido de carbono, segundo o establecido polo artigo 7 da Directiva 2012/27/UE, do 25 de outubro de 2012, revisada pola Directiva 2018/2002, mediante o aforro enerxético, a mellora da eficiencia enerxética e o aproveitamento das enerxías renovables, de conformidade coas condicións establecidas polas respectivas convocatorias que efectúen as comunidades e cidades autónomas. A Axencia de Turismo de Galicia é o organismo encargado da xestión deste programa na Comunidade Autónoma de Galicia.

Esta resolución tramítase en cumprimento da obriga establecida na base 6ª do citado acordo da conferencia sectorial, no cal se indica que as comunidades autónomas serán as responsables de elaborar as bases reguladoras para a concesión das subvencións, conforme os criterios, requisitos e obrigas segundo o disposto no citado acordo e na normativa europea en materia de axudas de estado.

De conformidade coas facultades atribuídas nas bases 7ª e 9ª, para a configuración de determinados elementos deste programa, a Comunidade Autónoma de Galicia considera, por razóns de eficacia e axilidade na súa xestión, acoutar, por unha banda, as persoas e entidades beneficiarias destas axudas e, por outra, limitar as actuacións.

Tampouco se pode deixar de mencionar que os beneficiarios finais deberán reunir a condición de pequena ou mediana empresa (peme) ou ben grandes empresas, toda vez que as etiquetas climáticas asignadas ao Compoñente 14, medida 4, do Plan de recuperación, transformación e resiliencia, en que se encadran as actuacións que se van desenvolver, son a 024 «Eficiencia enerxética e proxectos de demostración en pemes e medidas de apoio», 024 bis «Eficiencia enerxética e proxectos de demostración en grandes empresas e medidas de apoio», e a 044 «Xestión de residuos comerciais e industriais: medidas de prevención, minimización, separación, reutilización e reciclaxe».

Esta resolución establece como sistema único de presentación das solicitudes a presentación electrónica a través da sede electrónica da Xunta de Galicia, xa que a complexidade do programa e das actuacións subvencionadas exixe a necesaria participación de persoal cualificado que, de conformidade coa lexislación vixente, está obrigado a relacionarse electronicamente coas administracións públicas.

Tendo en conta que o financiamento de proxectos de eficiencia enerxética e economía circular en empresas turísticas do Plan de modernización e competitividade do sector turístico está incluído no Plan de recuperación, transformación e resiliencia, é financiado con fondos do Mecanismo de recuperación e resiliencia, establecido polo Regulamento (UE) nº 2021/241 do Parlamento Europeo e do Consello, do 12 de febreiro de 2021, serán de aplicación as obrigas de control, seguimento da execución e reingreso dos devanditos fondos.

Consonte o establecido sobre medidas de fomento no artigo 94 da Lei 7/2011, do 27 de outubro, do turismo de Galicia, en concordancia co sinalado no artigo 95 da dita lei e tendo en conta o determinado na Lei 9/2007, do 13 de xuño, de subvencións de Galicia, e no Decreto 11/2009, do 8 de xaneiro, polo que se aproba o Regulamento da devandita lei, e de conformidade coa competencia conferida polo artigo 19 dos estatutos da Axencia de Turismo de Galicia, aprobados polo Decreto 196/2012, do 27 de setembro,

RESOLVO:

1. Convocatoria e bases reguladoras.

1º. Esta resolución ten por obxecto aprobar as bases, que se inclúen como anexo I, polas que se rexerá a concesión de subvencións da Axencia de Turismo de Galicia para actuacións de eficiencia enerxética e economía circular, en réxime de concorrencia non competitiva, ás empresas turísticas no marco do Plan de modernización e competitividade do sector turístico do Plan de recuperación, transformación e resiliencia financiado pola Unión Europea-NextGenerationEU (código de procedemento TU986B).

2º. A concesión das subvencións recollidas nesta resolución tramitarase polo procedemento de concorrencia non competitiva ata esgotar o crédito dispoñible previsto na convocatoria, de acordo co sinalado na base 6ª do Acordo da Conferencia Sectorial de Turismo do 29 de decembro de 2023, sobre repartición territorial de crédito correspondente ao orzamento de 2023, da liña de financiamento para proxectos de eficiencia enerxética e economía circular de empresas turísticas, do Plan de recuperación, transformación e resiliencia (en diante, Acordo do 29 de decembro de 2023), e no artigo 19.2 da Lei 9/2007, do 13 de xuño, de subvencións de Galicia. Do citado esgotamento de crédito darase publicidade no Diario Oficial de Galicia (en diante, DOG) e na páxina web da Axencia de Turismo de Galicia, mediante resolución da persoa titular da Dirección da dita axencia.

2. Solicitudes.

2.1. Para poder ser persoa ou entidade beneficiaria das subvencións deberá presentarse unha solicitude axustada ao modelo normalizado que se inclúe como anexo II desta resolución, que irá acompañada dos documentos que se especifican no artigo 10 das bases reguladoras.

2.2. As solicitudes deberán presentarse na forma e no prazo establecidos no artigo 9 das bases reguladoras.

3. Prazo de duración do procedemento de concesión.

Unha vez rematado o prazo para a presentación de solicitudes, estas serán tramitadas e valoradas de acordo co procedemento establecido nas bases reguladoras.

O procedemento de concesión non poderá ter unha duración superior aos 4 meses contados desde a data de presentación da solicitude.

4. Información ás persoas interesadas.

Sobre este procedemento administrativo poderase obter documentación normalizada ou información adicional na Axencia de Turismo de Galicia, a través dos seguintes medios:

a) Páxina web oficial da Axencia de Turismo de Galicia: https://www.turismo.gal/canle-institucional/transparencia/axudas-e-subvencions

b) Páxina web https://sede.xunta.gal/portada, e introducindo no buscador o código de procedemento.

c) Os teléfonos 981 54 74 04 e 981 54 63 60.

d) Enderezo electrónico: fomento.turismo@xunta.gal

5. Réxime de recursos.

Esta resolución pon fin á vía administrativa e contra ela poderán interpoñerse os seguintes recursos, sen prexuízo de que as persoas interesadas poidan exercer calquera outro que consideren procedente:

a) Recurso potestativo de reposición ante a Dirección da Axencia de Turismo de Galicia, no prazo dun mes contado a partir do día seguinte ao da súa publicación no Diario Oficial de Galicia.

b) Recurso contencioso-administrativo ante os xulgados do contencioso-administrativo de Santiago de Compostela, no prazo de dous meses contados desde o día seguinte ao da publicación da resolución.

6. Base de datos nacional de subvencións.

De conformidade co establecido nos artigos 17.3.b) e 20.8.a) da Lei 38/2003, do 17 de novembro, xeral de subvencións, e no Real decreto 130/2019, do 8 de marzo, polo que se regula a Base de datos nacional de subvencións e a publicidade das subvencións e demais axudas, transmitirase á Base de datos nacional de subvencións a información requirida por esta, o texto da convocatoria para a súa publicación na citada base e o seu extracto no Diario Oficial de Galicia.

7. Entrada en vigor.

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 5 de xuño de 2024

José Manuel Merelles Remy
Director da Axencia de Turismo de Galicia

ANEXO I

Bases reguladoras para a concesión, en réxime de concorrencia non competitiva, de subvencións para actuacións de eficiencia enerxética en empresas turísticas, incluídas no Plan de modernización e competitividade do sector turístico do Plan de recuperación, transformación e resiliencia financiado pola Unión Europea- NextGenerationEU, e se procede á súa convocatoria para o ano 2024, con carácter plurianual (código de procedemento TU986B)

Artigo 1. Obxecto e réxime xurídico

1. As subvencións reguladas por estas bases teñen por obxecto a realización de actuacións de eficiencia enerxética que impulsen a economía circular en empresas turísticas, así como proceder á súa convocatoria para o ano 2024, con carácter plurianual.

2. A xestión destas axudas realizarase de acordo cos seguintes principios:

a) Publicidade, concorrencia, obxectividade, transparencia, igualdade e non discriminación.

b) Eficacia no cumprimento dos obxectivos fixados pola Administración outorgante.

c) Eficiencia na asignación de efectivos e na utilización de recursos públicos.

3. Son aplicables as condicións establecidas no Acordo da Conferencia Sectorial de Turismo, do 29 de decembro de 2023, sobre repartición territorial de crédito correspondente ao orzamento de 2023, da liña de financiamento para proxectos de eficiencia enerxética e economía circular de empresas turísticas, do Plan de recuperación, transformación e resiliencia (en diante, Acordo do 29 de decembro de 2023), publicado no Boletín Oficial del Estado núm. 20, do 23 de xaneiro de 2024.

4. Para o non establecido nestas bases, aplicarase o disposto na Lei 38/2003, do 17 de novembro, xeral de subvencións; no seu regulamento, aprobado polo Real decreto 887/2006, do 21 de xullo; na Lei 9/2007, do 13 de xuño, de subvencións de Galicia; no seu regulamento, aprobado polo Decreto 11/2009, do 8 de xaneiro; e na Lei 39/2015, do 1 de outubro, do procedemento administrativo común das administracións públicas. Na falta do previsto nesta normativa, aplicaranse as normas de dereito administrativo. As axudas obxecto desta convocatoria réxense, ademais, polas normas comunitarias aplicables por razón do financiamento pola Unión Europea e polas normas nacionais de desenvolvemento ou transposición destas, en particular, polo Regulamento (UE) nº 2021/241 do Parlamento Europeo e do Consello, do 12 de febreiro de 2021, polo que se establece o Mecanismo de recuperación e resiliencia; Real decreto lei 36/2020, do 30 de decembro, polo que se aproban medidas urxentes para a modernización da Administración pública e para a execución do Plan de recuperación, transformación e resiliencia; Orde HFP/1030/2021, do 29 de setembro, pola que se configura o sistema de xestión do Plan de recuperación, transformación e resiliencia; Orde HFP/1031/2021, do 29 de setembro, pola que se establece o procedemento e formato da información que deben proporcionar as entidades do sector público estatal, autonómico e local para o seguimento do cumprimento de fitos e obxectivos e de execución orzamentaria e contable das medidas dos compoñentes do Plan de recuperación, transformación e resiliencia; Decisión de execución do Consello relativa á aprobación da avaliación do Plan de recuperación e resiliencia de España (Council Implementing Decision-CID), do 13 de xullo de 2021; Lei 9/2021, do 25 de febreiro, de simplificación administrativa e de apoio á reactivación económica de Galicia; Orde HFP/55/2023, do 24 de xaneiro, relativa á análise sistemática do risco de conflito de interese nos procedementos que executan o Plan de recuperación, transformación e resiliencia; Regulamento (UE) nº 2023/2831 da Comisión, do 13 de decembro de 2023, relativo á aplicación dos artigos 107 e 108 do Tratado de funcionamento da Unión Europea ás axudas de minimis (DOUE do 15 de decembro).

Artigo 2. Financiamento e concorrencia

1. As axudas previstas nesta convocatoria financiaranse cun crédito total de 10.148.812,62 euros, imputables á aplicación orzamentaria 04.A2.761A.770.3, proxecto 2022 00004, dos orzamentos xerais da Comunidade Autónoma de Galicia para 2024 e 2025.

2. As subvencións previstas nesta resolución financiaranse co seguinte detalle:

Anualidade 2024	Anualidade 2025	Total
7.000.000,00 €	3.148.812,62 €	10.148.812,62 €

3. Estas axudas están financiadas ao 100 % polos fondos NextGenerationEU a través do Mecanismo de recuperación e resiliencia establecido polo Regulamento (UE) nº 2020/2094 do Consello, do 14 de decembro de 2020, polo que se establece un Instrumento de recuperación da Unión Europea para apoiar a recuperación tras a crise da COVID-19, e regulado segundo o Regulamento (UE) nº 2021/241 do Parlamento Europeo e do Consello, do 12 de febreiro de 2021, polo que se establece o Mecanismo de recuperación e resiliencia, dentro do compoñente 14: Plan de modernización e competitividade do sector turístico, liña de investimento I4. O dito financiamento queda legalmente vinculado á realización das actuacións subvencionadas, medidas integradas no Plan de recuperación, transformación e resiliencia de España.

4. A modificación da distribución inicialmente aprobada rexerase segundo o previsto no artigo 26.3 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia. Así mesmo, de ser o caso, o reaxuste de anualidades farase de acordo co preceptuado no artigo 27 do mesmo corpo legal.

5. De acordo co previsto no artigo 30.2 do Decreto 11/2009, do 8 de xaneiro, excepcionalmente poderase ampliar a contía máxima dos créditos dispoñibles cando o aumento veña derivado dunha xeración, ampliación ou incorporación de crédito ou cando existan remanentes doutras convocatorias financiadas con cargo ao mesmo crédito ou a créditos incluídos no mesmo programa ou en programas do mesmo servizo. O incremento do crédito queda condicionado á declaración de dispoñibilidade como consecuencia das circunstancias sinaladas e, se é o caso, logo da aprobación da modificación orzamentaria que proceda. A ampliación do crédito publicarase nos mesmos medios que a convocatoria sen que implique a apertura de prazo para presentar novas solicitudes nin o inicio de novo cómputo de prazo para resolver.

6. O procedemento de concesión destas subvencións tramitarase en réxime de concorrencia non competitiva, de acordo co artigo 19.1 da Lei 9/2007, do 13 de xuño, de subvencións de Galicia, e quedará suxeito ao Regulamento (UE) nº 2023/2831 da Comisión, do 13 de decembro de 2023, relativo á aplicación dos artigos 107 e 108 do Tratado de funcionamento da Unión Europea ás axudas de minimis (DOUE do 15 de decembro).

A aplicación do réxime de minimis implica que a axuda total de minimis concedida a unha empresa non será superior a 300.000,00 euros durante o período dos tres anos previos. Este límite aplicarase independentemente da forma da axuda de minimis ou do obxectivo perseguido.

En aplicación dos principios de eficacia e eficiencia na asignación e utilización dos recursos públicos establecidos na Lei de subvencións de Galicia, e, ao ser unha convocatoria de subvencións en concorrencia non competitiva, as subvencións resolveranse por orde de rexistro de entrada das solicitudes presentadas ata que se esgote o orzamento da convocatoria. Non obstante, naqueles supostos nos que se lles requira ás persoas solicitantes a emenda dos erros ou omisións na solicitude ou na documentación presentada, ou se presenten documentos posteriores, entenderase por rexistro de entrada a data en que o dito requirimento estea correctamente atendido. Considerarase esgotado o orzamento cando se efectúe o rexistro da última solicitude de axuda que totalice o importe total do crédito desta convocatoria.

Artigo 3. Réxime de compatibilidade das subvencións

A percepción destas axudas non é compatible con outras subvencións, axudas e ingresos ou recursos para a mesma finalidade, procedentes de calquera outra Administración, entes públicos ou privados.

Así mesmo, será incompatible a solicitude de axudas de establecementos turísticos que resultasen beneficiarios de subvención ao abeiro da convocatoria de eficiencia enerxética a empresas turísticas (TU986B) do ano 2022 (DOG núm. 230, do 2 de decembro).

Artigo 4. Persoas beneficiarias

1. Poderán ser persoas beneficiarias das subvencións as persoas físicas e xurídicas que estean dadas de alta no Censo de empresarios, profesionais e retedores da Axencia Estatal de Administración Tributaria e que sexan titulares de establecementos turísticos de aloxamento e de restauración, que reúnan os requisitos establecidos nestas bases e que teñan inscrito e autorizado ou clasificado, conforme estableza a normativa turística no Rexistro de Empresas e Actividades Turísticas da Xunta de Galicia (en diante, REAT), o establecemento turístico para o que se solicita a axuda, con base nos artigos 50 e 51 da Lei 7/2011, do 27 de outubro, do turismo de Galicia.

En concreto, son actuacións subvencionables as que se realicen en calquera dos seguintes tipos de establecementos turísticos:

a) Os establecementos hoteleiros, establecementos de turismo rural, apartamentos turísticos, vivendas turísticas e albergues turísticos, de acordo co artigo 55.1 da Lei 7/2011, do 27 de outubro.

b) As empresas de restauración (restaurantes, cafetarías e bares) que se enmarquen dentro do artigo 77 da Lei 7/2011, do 27 de outubro.

2. Os datos que figuran no REAT relativos ao establecemento, á súa titularidade e á representación teñen que coincidir cos datos achegados pola persoa solicitante da subvención.

No caso de que o representante legal non sexa o mesmo que o que figura no REAT, deberá acreditarse esta condición coa presentación da solicitude.

3. Poderán ser beneficiarias destas axudas as pequenas e medianas empresas (en diante, pemes) e grandes empresas que proxecten levar a cabo un proxecto localizado na Comunidade Autónoma de Galicia, considerado subvencionable ao abeiro do regulado nas presentes bases.

4. Para os efectos das presentes bases, consideraranse pemes as empresas que respondan á definición de peme establecida pola Comisión Europea no anexo I do Regulamento (UE) nº 651/2014.

5. Non poderán obter a condición de beneficiarias:

a) As persoas ou entidades nas cales concorra algunha das circunstancias previstas no artigo 10 da Lei 9/2007, do 13 de xuño, de subvencións de Galicia. A acreditación de non estar incursas nas ditas prohibicións realizarase mediante declaración responsable da persoa ou entidade solicitante.

b) As empresas que se atopen en situación de crise, de acordo coa definición establecida no punto 18 do artigo 2 do Regulamento (UE) nº 651/2014, do 17 de xuño de 2014, e nas directrices comunitarias sobre axudas estatais de salvamento e reestruturación de empresas non financeiras en crise (Comunicación da Comisión, 2014/C 249/1, do 31 de xullo de 2014). A acreditación deste requisito realizarase mediante declaración responsable da entidade solicitante, sen menoscabo das accións de comprobación que poida realizar, para estes efectos, a Axencia de Turismo de Galicia.

c) As empresas que se atopen suxeitas a unha orde de recuperación pendente sobre calquera axuda ou subvención que lles fose outorgada con anterioridade, ben por terse declarado axuda ilegal e incompatible co mercado interior, ben por calquera tipo de incumprimento das obrigas que lle viñesen atribuídas na concesión.

d) No caso de que a subvención supere os 30.000,00 euros e a entidade solicitante estea incluída no ámbito de aplicación subxectivo da Lei 3/2004, do 29 de decembro, pola que se establecen medidas de loita contra a morosidade en operacións comerciais, e cumpra os requisitos establecidos no artigo 258 do Real decreto lexislativo 1/2010, do 2 de xullo, polo que se aproba o texto refundido da Lei de sociedades de capital, para os efectos de presentación de conta de perdas e ganancias abreviada, as empresas que incumpran os prazos de pagamento previstos na mencionada lei.

e) Aquelas entidades que fosen sancionadas con carácter firme por infracción grave ou moi grave en materia de turismo pola Axencia de Turismo de Galicia nos últimos 2 anos.

6. Deberá acreditarse, por calquera título válido en dereito, a propiedade dos inmobles ou predios obxecto da actuación ou calquera outro dereito que autorice a persoa beneficiaria á realización do investimento subvencionado e que permita, igualmente, a explotación do establecemento durante todo o prazo de duración da obriga de manter a actividade prevista no artigo 24 destas bases.

7. Os requisitos para ser persoa beneficiaria deberán cumprirse na data de finalización do prazo de presentación de solicitudes.

8. Unha vez ditada a resolución de concesión, os cambios na persoa beneficiaria da subvención, por cambio na titularidade do establecemento, terán que ser previamente autorizados pola Administración concedente, e darán lugar á modificación da resolución de concesión nos termos previstos no artigo 35 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, subrogándose o/a novo/a titular na posición xurídica da persoa beneficiaria da subvención e nas obrigas dimanantes desta.

Artigo 5. Actuacións subvencionables

1. Con carácter xeral, e de acordo co establecido no artigo 29 da Lei 9/2007, do 13 de xuño, considéranse actuacións subvencionables aquelas que, de forma indubidable, respondan á natureza da actividade subvencionable, nos termos previstos no artigo 1 destas bases, e se realicen no prazo establecido nestas bases.

2. Pódense diferenciar as seguintes tipoloxías de proxectos subvencionables:

A. Mellora da eficiencia enerxética da envolvente térmica.

1. Obxectivo. Reducir a demanda enerxética en calefacción e climatización dos edificios completos, locais ou partes do edificio destinado a establecemento turístico, mediante a mellora da eficiencia enerxética da súa envolvente térmica no seu conxunto ou nalgún dos elementos que a compoñen.

2. Actuacións subvencionables. Serán actuacións subvencionables as que se realicen na envolvente térmica do edificio completo, dun local ou sobre partes dun edificio destinado a establecemento turístico, que separan os recintos habitables do ambiente exterior (aire, terreo ou outro edificio) e as particións interiores que separan os recintos habitables dos non habitables, segundo o definido no Código técnico da edificación. As actuacións enerxéticas consideradas dentro desta medida serán aquelas que consigan unha redución da demanda enerxética de calefacción e refrixeración do edificio completo, dun local ou sobre partes dun edificio destinado a establecementos turístico, mediante actuacións sobre a súa envolvente térmica. As actuacións enerxéticas sobre a envolvente térmica poderán recoller solucións construtivas convencionais e non convencionais.

Enténdense por solucións construtivas convencionais as utilizadas habitualmente nos edificios para reducir a súa demanda enerxética como, por exemplo, as que afectan as fachadas, cubertas, carpintarías exteriores (incluídas as portas ao exterior con sistemas de apertura e peche automático), vidros e proteccións solares.

Enténdense como solucións construtivas non convencionais as coñecidas como medidas de «arquitectura bioclimática», como, por exemplo: muros trombe, muros parietodinámicos, invernadoiros encostados, sistemas de sombreado, ventilación natural etc.

Consideraranse tamén custos elixibles as instalacións auxiliares necesarias para levar a cabo esta actuación, como estadas ou guindastres.

As actuacións deberán cumprir cos seguintes requisitos:

a) Consideraranse subvencionables as actuacións de modificación ou substitución de elementos construtivos da envolvente térmica para adecuar as súas características aos valores límite de transmitancia térmica e de permeabilidade ao aire, cando cumpra, establecidos nas táboas 3.1.1.a-HE1 e 3.1.3.a-HE1, do Documento básico DB HE de aforro de enerxía do Código técnico da edificación. Estes valores deben ser acreditados e/ou xustificados polo/a técnico/a competente no proxecto e/ou a memoria técnica.

Ao tratarse dun edificio completo, local ou parte dun edificio existente destinado a establecemento turístico, será de aplicación o punto IV da súa Parte I, denominado «Criterios de aplicación en edificios existentes». E, en particular, o criterio 2 de flexibilidade, de forma que nos casos en que non sexa posible alcanzar o nivel de prestación establecido con carácter xeral, desde o punto de vista do cumprimento das exixencias básicas de aforro de enerxía, poderán adoptarse solucións que permitan o maior grao de adecuación posible cando, entre outros motivos, as solucións non sexan técnica ou economicamente viables.

b) As actuacións deben cumprir coa normativa vixente que lles sexa de aplicación e contar coas preceptivas licenzas e autorizacións administrativas, no caso de que estas as requiran.

c) Para a verificación do cumprimento dos requisitos establecidos na letra a) será necesario presentar o Certificado de eficiencia enerxética do inmoble no seu estado final, considerando realizadas as actuacións previstas.

d) O custo elixible das actuacións debe ser igual ou superior a 20.000,00 €.

B. Mellora da eficiencia enerxética e de enerxías renovables nas instalacións térmicas, reguladas polo Regulamento de instalacións térmicas nos edificios (RITE).

B.1. Substitución de enerxía convencional por enerxía solar térmica.

1. Obxectivo. Reducir o consumo de enerxía convencional en edificios completos, locais ou parte do edificio destinado a establecemento turístico mediante o uso da enerxía solar térmica para a produción de auga quente sanitaria, calefacción, refrixeración ou climatización de piscinas.

2. Actuacións subvencionables. Serán actuacións subvencionables aquelas en que se substitúa enerxía convencional para produción de auga quente sanitaria, calefacción, refrixeración ou climatización de piscinas en edificios completos, locais ou partes de edificios existentes, por enerxía solar térmica.

Serán subvencionables as instalacións solares novas e rehabilitacións e/ou ampliacións de instalacións existentes sempre que supoñan a substitución e/ou incremento da potencia de xeración solar e que se realicen en edificios completos, locais ou partes de edificios existentes destinados a establecementos turísticos.

As instalacións solares térmicas deberán cumprir cos seguintes requisitos:

a) Responderán á definición de «instalación solar térmica». Enténdese por instalación solar térmica o conxunto de compoñentes encargados de realizar as funcións de captar a radiación solar incidente mediante captadores solares térmicos (captadores de aire, de concentración, captadores planos, híbridos, tubos sen carga etc.), transformala directamente en enerxía térmica útil quentando un fluído, transportar a enerxía térmica captada ao sistema de intercambio ou de acumulación a través dun circuíto para poder utilizala despois de forma directa como calor, ou como frío a través de máquinas de absorción, adsorción etc., nos puntos de consumo.

b) As instalacións e equipamentos cumprirán coa normativa vixente establecida no RITE, así como co documento «Guía técnica da enerxía solar térmica», elaborada polo IDAE e dispoñible na súa páxina web.

As actuacións deben cumprir coa normativa vixente que lles sexa de aplicación e contar coas preceptivas licenzas e autorizacións administrativas, no caso de que estas as requiran.

c) Para a verificación do aforro enerxético esperado será necesario presentar o Certificado de eficiencia enerxética do inmoble no seu estado final, considerando realizadas as actuacións previstas.

d) O custo elixible das actuacións debe ser igual ou superior a 10.000,00 €.

e) Establécese un custo elixible unitario máximo de 1.190,00 €/kW. A potencia de produción térmica calcularase tendo en conta o cociente de 0,7 kW/m2 área total captador. No caso de incorporar sistemas de produción de frío mediante enerxía térmica, como máquinas de absorción, adsorción, etc., o custo subvencionable unitario máximo verase incrementado nun 50 %.

B.2. Substitución de enerxía convencional por enerxía xeotérmica.

1. Obxectivo. Reducir o consumo de enerxía convencional en edificios completos, locais ou partes do edificio destinado a establecemento turístico mediante o uso da enerxía xeotérmica para un ou varios dos seguintes usos: calefacción, climatización, produción de auga quente sanitaria ou climatización de piscinas.

Serán actuacións subvencionables as realizadas nas instalacións de calefacción, refrixeración, produción de auga quente sanitaria ou climatización de piscinas, tanto se o sistema de xeración se sitúa no propio edificio completo, local ou parte de edificio usuario destinado a establecemento turístico, como externo a el, subministrando a un ou varios edificios completos, locais ou partes de edificios existentes destinados a establecementos turísticos, sempre que substitúan instalacións de enerxía convencional, incluíndo a modificación de redes de calefacción/climatización, empregando instalacións que utilicen a enerxía xeotérmica. As instalacións de xeotermia poderán ser de circuíto aberto ou pechado, ou ben sistemas de aproveitamento xeotérmico de uso directo.

No caso das instalacións de xeotermia, consideraranse custos elixibles os seguintes conceptos: o investimento en equipamentos efectuado, os custos de execución da instalación, obra civil asociada e instalacións auxiliares necesarias, así como o custo da realización dos estudos, ensaios, sondaxes e simulacións preliminares previas á realización do deseño da instalación, sondaxes exploratorias e TRT, escavacións, cimentacións, gabias, urbanización e demais elementos necesarios para a súa explotación, así como redes de calor/frío e estacións de intercambio. Adicionalmente, terá consideración de custo elixible a distribución interior e equipamentos terminais en instalacións de bomba de calor sempre que se instalen equipamentos terminais de alta eficiencia como radiadores de baixa temperatura, chan radiante ou ventiloconvectores.

As instalacións xeotérmicas deberán cumprir cos seguintes requisitos:

a) As instalacións realizadas deberán cumprir cos requisitos establecidos no Regulamento de instalacións térmicas nos edificios (RITE), así como coa normativa vixente que lles sexa de aplicación, e contar coas preceptivas licenzas e autorizacións administrativas, no caso de que estas as requiran.

b) As instalacións de xeotermia mediante bomba de calor deberán xustificar un rendemento medio estacional (SPF) superior a 2,5.

c) Para a verificación do aforro enerxético esperado, será necesario presentar o Certificado de eficiencia enerxética do inmoble no seu estado final, considerando realizadas as actuacións previstas.

d) O custo elixible das actuacións debe ser igual ou superior a 20.000,00 €.

e) Establécese un custo elixible unitario máximo de 2.355,00 €/kW no caso de instalacións con circuíto aberto, e de 3.530,00 €/kW para instalacións en circuíto pechado, con captación vertical. Tomarase como potencia Ps da instalación a potencia en calefacción extraída da ficha técnica ou especificacións do fabricante de acordo cos ensaios da norma UNE-EN 14511, é dicir, para as bombas de calor xeotérmicas tomarase o valor da potencia de calefacción B0W35. Naqueles casos onde a potencia Ps non se poida xustificar con base na dita norma, presentarase un informe asinado por técnico/a competente ou empresa instaladora que xustifique a dita potencia.

B.3. Substitución de enerxía convencional por biomasa nas instalacións térmicas.

1. Obxectivo. Reducir o consumo de enerxía convencional en edificios completos, locais ou partes do edificio destinado a establecemento turístico, mediante o uso de biomasa como combustible para calefacción, refrixeración, produción de auga quente sanitaria ou climatización de piscinas.

2. Actuacións subvencionables. Serán actuacións subvencionables as realizadas en instalacións de calefacción, refrixeración, produción de auga quente sanitaria ou climatización de piscinas, que inclúan sistema de intercambio fumes/auga e que substitúan instalacións de enerxía convencional existentes en edificios completos, locais ou partes dun edificio destinados a establecementos turísticos, incluíndo investimentos en redes de calefacción centralizada que dean servizo a máis dun edificio completo, local ou parte de edificio destinados a establecementos turísticos. Considérase que unha instalación pertence á actuación de redes de calor cando, utilizando unha ou varias tecnoloxías renovables, forneza enerxía polo menos a dous centros consumidores mediante as correspondentes estacións de intercambio. Tamén se consideran subvencionables os apararellos de calefacción local, é dicir, dispositivos de calefacción de espazos que emiten calor por transferencia directa soa ou en combinación coa transferencia de calor a un fluído, co fin de alcanzar e manter unha temperatura agradable para os seres humanos no espazo pechado en que o produto está situado, eventualmente combinado coa produción de calor para outros espazos, e equipado cun ou máis xeradores que converten directamente os combustibles sólidos en calor, coa parte frontal pechada.

As instalacións de biomasa deberán cumprir cos seguintes requisitos:

b) As instalacións de biomasa deberán lograr unha redución das emisións de gases de efecto invernadoiro de polo menos un 80 %, co fin de que se alcance un «Coeficiente para o cálculo da axuda aos obxectivos climáticos» do 100 %, de acordo co establecido no anexo VI do Regulamento (UE) nº 2021/241, polo que se establece o Mecanismo de recuperación e resiliencia.

c) O beneficiario manterá un rexistro documental suficiente que permita acreditar que o combustible empregado no equipamento dispón dun certificado outorgado por unha entidade independente acreditada relativo ao cumprimento da clase A1, segundo o establecido na norma UNE-EN-ISO 17225-2, da clase A1 da norma UNE-EN-ISO 17225-3, da clase A1 da norma UNE-EN-ISO 17225-4, da clase A1 da norma UNE-EN-ISO 17225-5, da clase A1 da norma UNE-164003 ou da clase A1 da norma UNE-164004. Tamén se poderán subvencionar actuacións que inclúan equipamentos alimentados con leña de madeira sempre que cumpran a clase de propiedade M20, segundo o establecido na norma UNE-EN-ISO 17225-5 e non se realicen en municipios de máis de 50.000 habitantes ou capitais de provincia. Só se poderán subvencionar os equipamentos que funcionen exclusivamente con estes combustibles. Este rexistro, cos albarás ou facturas de venda do biocombustible, manterase durante un prazo de cinco anos.

d) Con independencia da súa potencia, deberán manterse de acordo cun programa de mantemento preventivo cuxas operacións e periodicidades deberán adecuarse ao previsto na táboa 3.3 Operacións de mantemento preventivo e a súa periodicidade, da IT 3.3 Programa de mantemento preventivo do Real decreto 1027/2007, do 20 de xullo, polo que se aproba o Regulamento de instalacións térmicas nos edificios. Así mesmo, o equipamento disporá dun programa de xestión enerxética, que cumprirá co punto IT.3.4 do Real decreto 1027/2007, do 20 de xullo, polo que se aproba o Regulamento de instalacións térmicas nos edificios.

e) A biomasa cumprirá os criterios de sustentabilidade establecidos nos artigos 29 a 31 da Directiva 2018/2001 do Parlamento Europeo e do Consello, do 11 de decembro de 2018, relativa ao fomento do uso de enerxía procedente de fontes renovables, así como os correspondentes actos delegados e de execución.

f) No caso de que os equipamentos finalmente instalados non sexan os mesmos que se fixeron constar na solicitude, deberá presentarse xunto á documentación requirida para xustificar as actuacións realizadas, para o equipamento definitivamente instalado, unha acreditación por parte do fabricante do equipamento do cumprimento dos requisitos de eficiencia enerxética estacional e emisións para o combustible que se vaia utilizar, que non poderán ser menos exixentes que os definidos no Regulamento de ecodeseño en vigor (Regulamento (UE) nº 2015/1189 da Comisión).

g) Para a verificación do aforro enerxético esperado, será necesario presentar o Certificado de eficiencia enerxética do inmoble no seu estado final, considerando realizadas as actuacións previstas.

h) O custo elixible das actuacións debe ser igual ou superior a 20.000,00 €. No caso de redes de calor, serán subvencionables os proxectos que supoñan un custo elixible superior a 100.000,00 €.

i) Establécese un custo elixible unitario máximo de 560,00 €/kW. Tomarase como potencia Ps da instalación a potencia nominal do/dos equipamento/s de xeración térmica, de acordo coa documentación técnica do fabricante achegada.

B.4. Mellora da eficiencia enerxética dos sistemas de xeración non incluídos nas anteriores.

1. Obxectivo. Reducir o consumo de enerxía das instalacións térmicas de calefacción, refrixeración, ventilación, produción de auga quente sanitaria ou climatización de piscinas de edificios completos, locais ou partes do edificio destinado a establecemento turístico, mediante actuacións no sistema de xeración térmica non incluídas nos puntos B.1 a B.3.

2. Actuacións subvencionables. Considéranse actuacións subvencionables as realizadas en instalacións térmicas de calefacción, refrixeración, ventilación ou produción de auga quente sanitaria destinadas a atender a demanda do benestar térmico e hixiene das persoas nos edificios completos, locais ou parte de edificios destinados a establecementos turísticos, así como a climatización das piscinas, dentro do ámbito de aplicación do Regulamento de instalacións térmicas nos edificios (RITE).

As exixencias mínimas de eficiencia enerxética que debe cumprir a instalación térmica que se renove son as que figuran no Regulamento de instalacións térmicas nos edificios (RITE) vixente.

Terá consideración de custo elixible a distribución interior e equipamentos terminais nas novas instalacións de bomba de calor, sempre que se instalen equipamentos terminais de alta eficiencia como radiadores de baixa temperatura, chan radiante ou ventiloconvectores.

En ningún caso se considerará custo elixible a substitución dun equipamento de xeración térmica por outro que utilice combustible de orixe fósil.

As actuacións enerxéticas subvencionables serán as seguintes:

a) Solucións de aerotermia e hidrotermia de alta eficiencia enerxética que impliquen a substitución total ou parcial de equipamentos de xeración térmica existentes que permitan mellorar a eficiencia enerxética nas instalacións térmicas de calefacción, climatización e produción de auga quente sanitaria.

As instalacións de aerotermia e hidrotermia mediante bomba de calor deberán ter un rendemento medio estacional (SPF) superior a 2,5.

b) Sistemas de ventilación natural e forzada.

c) Sistemas de arrefriado gratuíto por aire exterior.

d) Sistemas de recuperación de calor e do aire de extracción e aproveitamento de enerxías residuais.

e) Sistemas que utilicen técnicas evaporatorias que reduzan o consumo de enerxía da instalación: arrefriado evaporatorio, condensación evaporatoria, pre-arrefriado evaporatorio do aire de condensación, arrefriado evaporatorio directo e indirecto previo á recuperación de calor do aire de extracción, etc.

f) Tamén serán subvencionables os equipamentos para a mellora da calidade e salubridade do aire de ventilación, a condición de que o sistema proposto aforre enerxía respecto a unha solución técnica de referencia, alternativa á proposta que obteña a mesma calidade e salubridade do aire que, a título indicativo e non limitativo, se relacionan a seguir:

– Implantación de sistemas de xestión da calidade do aire.

– Incorporación regulación de ventilación por concentración de CO2.

– Actuacións para mellora da calidade do aire CAI, mediante aumentos de caudais de aire, filtrado de aire de recirculación, uso de purificadores, etc.

g) As actuacións realizadas deberán cumprir cos requisitos establecidos no Regulamento de instalacións térmicas nos edificios (RITE), así como coa normativa vixente que lles sexa de aplicación e contar coas preceptivas licenzas e autorizacións administrativas, no caso de que estas as requiran.

h) Para a verificación do aforro enerxético esperado será necesario presentar o Certificado de eficiencia enerxética do inmoble no seu estado final, considerando realizadas as actuacións previstas.

i) O custo elixible das actuacións debe ser igual ou superior a 20.000,00 €.

C. Instalacións fotovoltaicas para autoconsumo.

1. Obxectivo. Reducir o consumo de enerxía convencional en edificios completos, locais ou partes do edificio destinado a establecemento turístico, mediante o uso da enerxía solar fotovoltaica para a produción de electricidade.

2. Actuacións subvencionables. Serán actuacións subvencionables aquelas destinadas ao desenvolvemento de instalacións solares fotovoltaicas para produción de electricidade de orixe renovable, incluídas as instalacións de almacenamento de enerxía.

Enténdese por instalacións de autoconsumo as establecidas no Real decreto 244/2019, do 5 de abril, polo que se regulan as condicións administrativas, técnicas e económicas do autoconsumo de enerxía eléctrica. Así mesmo, para os efectos desta resolución, tamén se consideran actuacións subvencionables as instalacións illadas da rede non reguladas no citado Real decreto 244/2019.

Enténdese por instalacións de almacenamento aquelas en que se difire o uso final de electricidade a un momento posterior a cando foi xerada, ou que realizan a conversión de enerxía eléctrica nunha forma de enerxía que se poida almacenar para a subseguinte reconversión da dita enerxía en enerxía eléctrica. Para que estas instalacións sexan elixibles, deberase dar a condición de que o almacenamento non estea directamente conectado á rede, senón que será parte da instalación de autoconsumo.

As características que deberán verificar as instalacións para ser consideradas subvencionables serán as seguintes:

a) As instalacións realizadas deberán cumprir cos requisitos establecidos no Regulamento electrotécnico para baixa tensión (REBT), así como coa normativa vixente que lles sexa de aplicación, e contar coas preceptivas licenzas e autorizacións administrativas, no caso de que estas as requiran.

b) Deberase xustificar que, en cómputo anual, a suma da enerxía eléctrica consumida por parte do consumidor á instalación obxecto de axuda sexa igual ou maior ao 80 % da enerxía anual xerada pola instalación (as instalacións deberán inscribirse no Rexistro de instalacións sen excedentes).

c) Só serán consideradas elixibles as instalacións de almacenamento que non superen un cociente de capacidade instalada de almacenamento fronte a potencia de xeración de 2 kWh/kW. Ademais, deberán contar cunha garantía mínima de 5 anos.

As tecnoloxías chumbo-ácido para almacenamento non serán elixibles.

d) Deberán dispoñer dun sistema de xestión, control activo e monitorización tanto da xeración como da acumulación e a demanda de enerxía eléctrica.

e) A xustificación da produción esperada e o autoconsumo proxectado realizarase con base no consumo histórico do inmoble.

f) O custo elixible das actuacións debe ser igual ou superior a 20.000,00 €.

g) Establécese un custo elixible unitario máximo de 1.450,00 €/kW pico instalado, considerando a potencia instalada no campo xerador.

No caso de instalacións de acumulación, consideraranse uns custos elixibles máximos de 850,00 €/kWh de capacidade de acumulación.

D. Mellora da eficiencia enerxética das instalacións de iluminación.

1. Obxectivo. Reducir o consumo de enerxía das instalacións de iluminación de edificios completos, locais ou partes do edificio destinado a establecemento turístico.

2. Actuacións subvencionables. Serán consideradas subvencionables todas aquelas que permitan mellorar a eficiencia enerxética nas instalacións de iluminación interior, dos edificios, locais ou partes dos edificios en uso destinados a establecementos turísticos, así como a iluminación exterior ornamental e aparcadoiros de vehículos ao aire libre anexos ao edificio, regulados polo Regulamento de eficiencia enerxética en instalacións de iluminación exterior, aprobado polo Real decreto 1890/2008, do 14 de novembro. Entre as actuacións subvencionables serán con carácter indicativo e non limitativo as que se relacionan a seguir:

a) Luminarias, lámpadas e equipamento: substitución do conxunto por outro con luminarias de maior rendemento podendo incluír tecnoloxía TIC, lámpadas de maior eficiencia e reactancias electrónicas regulables e que permitan reducir a potencia instalada en iluminación, cumprindo cos requirimentos de calidade e confort visual regulamentados.

b) Sistemas e elementos que permitan o control local, remoto ou automático por medios dixitais de aceso e regulación de nivel de iluminación: incluirán aqueles sistemas de control por presenza, por zona do edificio completo, local ou parte do edificio destinado a establecemento turístico, ou regulación de nivel de iluminación segundo a achega de luz natural.

c) Cambio de sistema de iluminación: recolocación dos puntos de luz con utilización das tecnoloxías anteriores, de forma que se reduza o consumo eléctrico anual respecto ao sistema actual de iluminación.

d) Sistemas e elementos que permitan o control remoto ou o control automático por medios dixitais de instalacións destinadas a controlar:

– Sistemas de iluminación eficientes axustándoa ás necesidades de cada momento.

– Sistemas de control automático de toldos, persianas ou cortinas do edificio completo, local ou parte do edificio destinado a establecemento turístico, que permitan o aproveitamento óptimo da luz solar.

– Sistemas de control automático do acendido, apagado e regulación da iluminación dos edificios completos, locais ou partes de edificios destinados a establecementos turísticos.

As exixencias mínimas de eficiencia enerxética que debe cumprir a instalación de iluminación que se rehabilite son as que figuran no documento HE-3, Eficiencia enerxética das instalacións de iluminación, do Código técnico da edificación.

e) Para a verificación do aforro enerxético esperado será necesario presentar o Certificado de eficiencia enerxética do inmoble no seu estado final, considerando realizadas as actuacións previstas.

f) O custo elixible das actuacións debe ser igual ou superior a 5.000,00 €.

E. Renovación de electrodomésticos.

1. Obxectivo. Reducir o consumo eléctrico debido aos electrodomésticos e armarios de conservación profesionais utilizados nos inmobles de uso turístico.

2. Actuacións subvencionables.

• A substitución de electrodomésticos domésticos existentes por equipamentos novos, con etiquetaxe de alta clase enerxética A, B ou C, segundo a clasificación vixente a partir de marzo de 2021 (Regulamento (UE) nº 2017/1369 do Parlamento Europeo e do Consello, do 4 de xullo de 2017, polo que se establece un marco para a etiquetaxe enerxética e se deroga a Directiva 2010/30/UE).

• A substitución de electrodomésticos incluídos no ámbito de aplicación da Directiva 2006/42/CE e deseñados principalmente para fins profesionais, por equipamentos novos e máis eficientes. Para xustificar a mellora da eficiencia naqueles equipamentos eximidos de dispoñer de etiqueta enerxética será necesario achegar a ficha técnica do fabricante que recolla os cocientes de consumo e eficiencia do equipamento.

• A substitución de armarios de conservación refrixerados profesionais existentes por equipamentos novos, con etiquetaxe de alta clase enerxética A ou superior, regulados no Regulamento delegado (UE) 2015/1094 da Comisión, do 5 de maio de 2015, en relación coa etiquetaxe enerxética dos armarios de conservación refrixerados profesionais.

Considérase unha única actuación o cambio de varios electrodomésticos.

Considéranse custos elixibles os derivados da compra, transporte e instalación do electrodoméstico novo, así como o custo da retirada do antigo.

Para aqueles equipamentos que dispoñan de etiquetaxe enerxética, para calcular o aforro de enerxía final obtido pola actuación para a que se solicita axuda, se o equipamento existente que se vai a substituír non dispón da citada etiqueta enerxética, supoñerase que ten un G; se o equipamento que se vai a substituír ten a etiqueta enerxética, o cálculo do aforro realizarase comparando o consumo enerxético anual que aparece en ambas as etiquetas.

No caso dos equipamentos industriais, o aforro de enerxía final farase con base nos datos de potencia e/ou consumo actuais e nos declarados polo fabricante do novo equipamento, utilizando en ambos os casos os mesmos períodos de funcionamento.

Para ser consideradas subvencionables, deberá verificarse:

a) A substitución realizarase por electrodomésticos de igual tipoloxía e características análogas con maior eficiencia enerxética.

b) No caso dos armarios de conservación refrixerados, os equipamentos subvencionados por esta tipoloxía de actuación deberán estar incluídos na base europea EPREL na súa correspondente ca-tegoría: https://eprel.ec.europa.eu/screen/home

c) Para acceder á subvención será necesario xustificar a entrega do electrodoméstico retirado a un xestor autorizado para o seu tratamento, primando o principio de proximidade.

d) En ningún caso o custo de adquisición poderá ser superior ao valor de mercado.

e) O custo elixible das actuacións debe ser igual ou superior a 5.000,00 €.

F. Sistemas de automatización e control.

1. Obxectivo. Reducir o consumo enerxético do edificio completo, local ou parte do edificio destinado a establecemento turístico, mediante a instalación e xestión dun sistema de automatización e control global das instalacións consumidoras e/ou produtoras de enerxía, así como outras actuacións nos equipamentos dos subsistemas de xeración, distribución, regulación e emisión.

2. Actuacións subvencionables. Serán actuacións subvencionables a instalación dun novo sistema de automatización e control global, a ampliación ou mellora dun existente, a condición de que se reduza o consumo enerxético do edificio completo, local ou parte do edificio, mantendo ou mellorando as condiciones de confort e salubridade establecidas pola normativa.

Entenderase por sistema de automatización e control de edificios completos, locais ou partes de edificios: sistema que inclúa todos os produtos, programas informáticos e servizos de enxeñaría que poidan apoiar o funcionamento eficiente enerxeticamente, económico e seguro das instalacións técnicas do edificio completo, local ou parte do edificio mediante controis automatizados e facilitando a xestión manual das ditas instalacións técnicas do edificio completo, local ou parte do edificio destinado a establecemento turístico.

Non se consideran sistemas de automatización e control global aqueles destinados á xestión dun único equipamento/sistema, sendo requisito imprescindible para que teñan esta consideración que integren un mínimo de 3 sistemas, como poden ser: climatización, xeración eléctrica, iluminación, antiincendios, seguridade, etc.

Estes sistemas de automatización e control de edificios completos, locais ou partes de edificios destinados a establecementos turísticos deberán ser capaces de:

a) Monitorizar, rexistrar, analizar e permitir a adaptación do consumo de enerxía de forma continua.

b) Permitir a comunicación con instalacións técnicas conectadas e outros aparellos que estean dentro do edificio completo, local ou parte do edificio destinado a establecemento turístico, así como garantir a interoperabilidade con instalacións técnicas do edificio completo, local ou parte do edificio destinado a establecemento turístico, de distintos tipos de tecnoloxías patentadas, dispositivos e fabricantes.

c) O custo elixible das actuacións debe ser igual ou superior a 20.000,00 €. Este custo inclúe gastos de deseño e implantación, equipamentos de medición, sistemas de transmisión de datos, actuadores, posta en marcha, formación ao persoal do establecemento etc. Non inclúe a adquisición de equipamentos de acceso en remoto para control do sistema, como ordenadores, móbiles ou tabletas.

Artigo 6. Gastos subvencionables

1. Considéranse custos elixibles aqueles que sexan necesarios para acadar os obxectivos perseguidos para cada unha das tipoloxías de actuación, conforme se determinen nas convocatorias autonómicas e, especificamente, os que se relacionan a seguir:

a) Os honorarios profesionais satisfeitos para a elaboración, polo/a técnico/a competente, dos certificados de eficiencia enerxética previstos no Real decreto 235/2013, do 5 de abril, cando estes sexan exixidos.

b) Os custos de xestión de solicitude da axuda.

c) Os custos da redacción dos proxectos técnicos relacionados coas tipoloxías de actuación obxecto de axuda.

d) Os custos da dirección facultativa das actuacións.

e) Os custos de execución das obras e/ou instalacións.

f) O investimento en equipamentos e materiais efectuado.

g) Os custos de redacción de informes e demais documentación requirida para a solicitude e xustificación destas axudas.

h) Os custos de xestión da xustificación da realización das actuacións.

i) O informe xustificativo que acredite a adecuada realización das actuacións obxecto da axuda, emitido por un organismo de control ou entidade de control.

j) Cando, por motivo da actuación, sexa necesario retirar aqueles produtos de construción que conteñan amianto, a retirada deberá realizarse conforme o establecido no Real decreto 396/2006, do 31 de marzo, polo que se establecen as disposicións mínimas de seguridade e saúde aplicables aos traballos con risco de exposición ao amianto, por unha empresa legalmente autorizada. A xestión dos residuos orixinados no proceso deberá realizarse conforme o establecido na Lei 22/2011, do 28 de xullo, de residuos e solos contaminados, e no Real decreto 105/2008, do 1 de febreiro, polo que se regula a produción e xestión dos residuos de construción e demolición.

k) Os custos para implantar as medidas correctoras que se adoptarán para cumprir os criterios da «Guía para o deseño e desenvolvemento de actuacións acordes co principio de non causar un prexuízo significativo ao ambiente», publicada polo Ministerio para a Transición Ecolóxica e o Reto Demográfico.

2. Os gastos subvencionables deberán estar realizados e pagados entre a data de presentación da solicitude de axuda e o 30 de abril de 2025.

3. Non serán subvencionables proxectos xa iniciados na data de presentación da solicitude de axuda. Considérase que o proxecto xa foi iniciado cando exista un primeiro compromiso en firme para a execución das obras ou para a adquisición dalgún dos elementos integrantes do proxecto, entendéndose por proxecto calquera dos investimentos comprendidos na solicitude da axuda. Neste sentido, considérase que existe compromiso en firme no caso da existencia dun contrato ou oferta asinados entre as partes, ou da existencia dun pedido, para calquera dos elementos subvencionables.

Para estes efectos, a compra dos terreos e determinados traballos preparatorios, como a obtención de permisos ou a realización de estudos previos de viabilidade, non se consideran inicio dos traballos.

A Axencia de Turismo de Galicia poderá realizar as comprobacións oportunas para verificar o cumprimento deste requisito.

4. Non serán subvencionables os gastos a que se refire o artigo 29.7 da Lei 9/2007, do 13 de xuño, como non subvencionables. Ademais, non se considerarán subvencionables os gastos englobados nos seguintes conceptos:

a) Taxas, impostos ou tributos.

b) Autorizacións administrativas, licenzas, permisos, custo de avais e/ou fianzas, ou multas.

c) Calquera gasto asociado a xestións, contratacións, consultas ou trámites administrativos, aínda sendo necesarios para a obtención de permisos ou licenzas.

d) Seguros subscritos polo/a solicitante.

e) Gastos financeiros, reestruturacións de pasivo ou refinanciamentos, circulante e outros impostos ou taxas. Así mesmo, non serán subvencionables os gastos bancarios de calquera tipo de operación, así como aqueles que xeren autofacturación.

f) Os inmobles e artigos de exposición e de proba susceptibles de posterior venda ao público e a instalación de expositores de carácter temporal.

g) Custos asociados a sancións penais, así como gastos de procedementos xudiciais.

h) Calquera gasto de operación e mantemento das actuacións ou gastos propios da Administración.

i) Elementos de transporte.

j) Proxectos que non respecten plenamente as normas e prioridades da Unión Europea e nacionais en materia climática e medioambiental e o principio de «non causar un prexuízo significativo» no sentido do artigo 17 do Regulamento (UE) 2020/852 do Parlamento Europeo e do Consello, do 18 de xuño de 2020, relativo ao establecemento dun marco para facilitar os investimentos sustentables e polo que se modifica o Regulamento (UE) nº 2019/2088. En calquera caso, non serán financiables as actividades incluídas na lista de exclusión establecida na Decisión de execución do Consello para este investimento:

i. As actividades relacionadas cos combustibles fósiles, incluída a utilización ulterior destes. Exceptúanse os proxectos relacionados coa xeración de electricidade e/ou calor utilizando gas natural, así como coa infraestrutura de transporte e distribución conexa, que cumpran as condicións establecidas no anexo III da Guía técnica sobre a aplicación do principio de «non causar un prexuízo significativo» (DO C 58 do 18.2.2021, p. 1).

ii. As actividades no marco do réxime de comercio de dereitos de emisión da UE (RCDE) en relación coas cales se prevexa que as emisións de gases de efecto invernadoiro que van provocar non se situarán por debaixo dos parámetros de referencia pertinentes. Cando se prevexa que as emisións de gases de efecto invernadoiro provocadas pola actividade subvencionada non van ser significativamente inferiores aos parámetros de referencia pertinentes, deberá facilitarse unha explicación motivada respecto diso. Parámetros de referencia son os establecidos para a asignación gratuíta de dereitos de emisión en relación coas actividades que se inscriben no ámbito de aplicación do réxime de comercio de dereitos de emisión, segundo o establecido no Regulamento de execución (UE) nº 2021/447 da Comisión.

iii. As actividades relacionadas con vertedoiros de residuos.

iv. As actividades relacionadas con incineradoras. Esta exclusión non se aplica ás accións emprendidas en plantas dedicadas exclusivamente ao tratamento de residuos perigosos non reciclables, nin ás plantas existentes, cando as ditas accións teñan por obxecto aumentar a eficiencia enerxética, capturar os gases de escape para o seu almacenamento ou utilización, ou recuperar materiais das cinzas de incineración, sempre que tales accións comporten un aumento da capacidade de tratamento de residuos das plantas ou a unha prolongación da súa vida útil; estes pormenores deberán xustificarse documentalmente por cada planta.

v. As actividades relacionadas con plantas de tratamento mecánico-biolóxico. Esta exclusión non se aplica ás accións emprendidas respecto das plantas de tratamento mecánico-biolóxico existentes, cando as ditas accións teñan por obxecto aumentar a súa eficiencia enerxética ou o seu reacondicionamento para operacións de reciclaxe de residuos separados, como a compostaxe e a dixestión anaerobia de biorresiduos, sempre que tales accións non comporten un aumento da capacidade de tratamento de residuos das plantas ou a prolongación da súa vida útil; estes pormenores deberán xustificarse documentalmente por cada planta.

vi. As actividades en que a eliminación a longo prazo de residuos poida causar danos ao ambiente.

k) Os gastos de arrendamento de establecementos ou gastos correntes da actividade do beneficiario.

l) Actuacións relacionadas coa adaptación da actividade turística á COVID-19.

m) Os gastos correspondentes ás retribucións ordinarias do persoal fixo ou eventual laboral que teña unha relación laboral dependente das comunidades e cidades autónomas executoras.

n) Os gastos correntes para o funcionamento das entidades beneficiarias finais, incluíndo: arrendamentos, adquisición de material e subministración, ou gastos correntes en xeral.

5. Para estes efectos, consideraranse como custos de xestión de solicitude da axuda aqueles gastos que o/a solicitante ou destinatario/a último/a da axuda puidese satisfacer a unha empresa ou profesional por levar a cabo a xestión administrativa e documental da súa solicitude ante a Comunidade Autónoma, polo que tales gastos, para seren admitidos como custo elixible, deberán de encontrarse debidamente recollidos e detallados en documento ou oferta vinculante contractual formalizados co/coa empresario/a ou profesional correspondente, cuxa copia se presentará xunto co resto de documentación que debe acompañar a solicitude de axuda, xustificándose a realidade dos ditos gastos mediante a achega de factura independente onde consten debidamente especificados estes, ademais da documentación que puidese resultar exixible para xustificar o seu pagamento. En ningún caso se admitirá que tales gastos de xestión superen o 4 % do importe da axuda concedida, cun límite de 3.000,00 euros por expediente.

6. Igualmente, e para estes efectos, consideraranse como custos de xestión da xustificación da realización das actuacións obxecto de axuda aqueles gastos que o/a destinatario/a último/a da axuda puidese satisfacer a empresas ou profesionais por levar a cabo a xestión técnica, administrativa e documental da xustificación ante o órgano instrutor da realización das actuacións que conforman o proxecto.

O custo elixible máximo total admitido para sufragar os gastos derivados:

a) Da elaboración do informe que acredite a adecuada realización das actuacións emitido por un organismo ou entidade de control.

b) Da xestión da xustificación da realización das actuacións.

c) Da elaboración do informe do auditor sobre a conta xustificativa do proxecto.

Non poderá superar globalmente o 7 % do importe da axuda concedida, cun límite de 7.000,00 euros por expediente. A realización e facturación destes servizos poderá efectuarse durante o período concedido para presentar a documentación xustificativa.

7. De conformidade co establecido no artigo 29 da Lei 9/2007, do 13 de xuño, cando o importe do gasto subvencionable supere a contía prevista para o contrato menor no artigo 118 da Lei 9/2017, do 8 de novembro, de contratos do sector público, a persoa interesada deberá solicitar, como mínimo, tres ofertas de diferentes provedores, con carácter previo á contracción do compromiso para a prestación, salvo que, polas especiais características dos gastos subvencionables, non exista no mercado suficiente número de entidades que o presten, ou salvo que o gasto se realizase con anterioridade á solicitude da subvención. Os provedores non poderán estar asociados nin vinculados coa persoa solicitante ou cos seus órganos directivos ou xestores, entendéndose que existe vinculación entre empresas se responden ás definicións de «empresas asociadas» ou de «empresas vinculadas» establecidas nos puntos 2 e 3, respectivamente, do anexo I do Regulamento (UE) nº 651/2014.

8. En ningún caso o custo de adquisición dos investimentos subvencionables poderá ser superior ao valor de mercado. Así mesmo, deberán estar efectuados os pagamentos con anterioridade á finalización do período de xustificación establecido no artigo 25.

9. Así mesmo, de seren necesarias para levar a cabo a actuación para a cal se solicita a subvención, deberase contar coa autorización ou licenza urbanística ou sectorial, tanto municipal como por parte doutros organismos ou administracións públicas, en materia de dominio público hidráulico, patrimonio cultural ou estradas, entre outras.

Artigo 7. Compromiso de non causar dano significativo ao ambiente

1. As persoas beneficiarias das subvencións reguladas nesta resolución deberán garantir o pleno cumprimento do principio de «non causar prexuízo significativo» (principio «do no significant harm-DNSH») e a etiquetaxe climática e dixital, de acordo co previsto no Plan de recuperación, transformación e resiliencia, na Decisión de execución do Consello relativa á aprobación da avaliación do Plan de recuperación e resiliencia de España (Council Implementing Decision-CID), do 13 de xullo de 2021, e no Regulamento (UE) nº 2021/241 do Parlamento Europeo e do Consello, do 12 de febreiro de 2021, así como na súa normativa de desenvolvemento, en todas as fases do deseño e execución dos proxectos e de maneira individual para cada actuación.

2. As liñas de axudas contribúen a obxectivos climáticos en distintas áreas diferenciadas, para as cales se consideran distintos gastos subvencionables.

Así, as distintas actuacións financiables cumprirán co indicado na etiquetaxe climática establecida, cumprindo co seguinte peso ou porcentaxe das seguintes etiquetas climáticas segundo a tipoloxía de liña subvencionable:

A. Mellora da eficiencia enerxética da envolvente térmica.