Unha vez examinada a solicitude de deslinde formulada polos representantes do monte veciñal en man común (MVMC) Coto de Trellerma, pertencente á Comunidade de Montes Veciñais en Man Común (CMVMC) de Trellerma, e mais do de Acevedo, Porriño, Conchada, Bidueiros e Feal, pertencente á CMVMC da Parroquia de Moreiras e Trelle, no concello de Toén, resultan os seguintes:
Feitos:
Primeiro. O 13.6.2023 a CMVMC de Trellerma presentou un escrito (Rexel 2023/1749093) en que solicitan a aprobación dun deslindamento coa CMVMC de Moreiras e Trelle.
Coa solicitude achegouse a seguinte documentación:
– Acta de deslindamento.
– Certificacións de aprobación das respectivas asembleas xerais.
– Planos do deslindamento.
– Acta de conciliación levantada no Xulgado de Paz de Toén.
Segundo. O informe do Servizo de Montes da Xefatura Territorial de Ourense do 3 de xullo de 2023 fai constar que a documentación achegada corresponde ao deslindamento parcial do perímetro estremeiro entre o MVMC Coto de Trellerma, pertencente á CMVMC de Trellerma, e mais o predio ou monte Conchada, do MVMC Acevedo, Porriño, Conchada, Bidueiros e Feal, pertencente á CMVMC de Moreiras e Trelle, desde o vértice 1 (o situado máis ao N) ata a intersección, coa estrada provincial OU-0518 Moreiras-Trellerma, da recta que une o anterior co vértice 2 (o situado máis ao S).
Logo de analizar os vértices e a súa localización obsérvase que:
• O punto inicial da liña (vértice 1, Penedo do Vento) coincide co punto inicial da liña de deslindamento parroquia de Toén-Trellerma (vértice 1); esta última recoñece e valida implicitamente a confluencia das tres citadas comunidades (Trellerma-Moreiras e Trelle-Toén) no punto en cuestión.
• O punto final do deslindamento, determinado xenericamente (segundo a acta da avinza) pola intersección indicada anteriormente, situaríase no punto de coordenadas X: 586.585, Y: 4.682.779.
Consideracións legais e técnicas:
Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se deberá seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará a resolución correspondente, que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 3 de xullo de 2023, o Xurado Provincial de Montes Veciñais en Man Común acordou por unanimidade o día 14 de maio de 2024:
Aprobar o acto de conciliación acadado polas xuntas reitoras do MVMC Coto de Trellerma, pertencente á CMVMC de Trellerma, e o MVMC Acevedo, Porriño, Conchada, Bidueiros e Feal, pertencente á CMVMC de Moreiras e Trelle, no concello de Toén.
Contra esta resolución, que pon fin á vía administrativa, poderase interpor recurso potestativo de reposición ante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Ourense no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 29 de maio de 2024
Luis Jorge Álvarez Ferro
Presidente do Xurado Provincial de Clasificación de
Montes Veciñais en Man Común de Ourense