Unha vez examinada a solicitude de deslindamento formulada polos representantes do monte veciñal en man común (MVMC) Val do Dorno, Montemiau, Costa dos Marcos, Costa do Muíño Novo e Outeiro de Almorzo, pertencente á Comunidade de Montes Veciñais en Man Común (CMVMC) da parroquia de Toén, e os de Xestosa e Pena de Cabras, A Costa, Xenestévez, O Igrexario, Costa do Ribeiro, A Costa do Porto da Vila 1 e A Costa do Porto da Vila 2, pertencentes á CMVMC da parroquia de Xestosa, no concello de Toén, resultan os seguintes:

Feitos:

Primeiro. O 13.6.2023 a CMVMC da parroquia de Toén presentou un escrito (Rexel 2023/1746196) en que solicitan a aprobación dun deslindamento coa CMVMC da parroquia de Xestosa.

Coa solicitude achegouse a seguinte documentación:

– Acta de deslindamento.

– Certificacións de aprobación das respectivas asembleas xerais.

– Planos do deslindamento.

– Acta de conciliación levantada no Xulgado de Paz de Toén.

Segundo. O informe do Servizo de Montes da Xefatura Territorial de Ourense do 3 de xullo de 2023 fai constar que a documentación achegada corresponde ao deslindamento parcial do perímetro estremeiro entre o MVMC Val do Dorno, Montemiau, Costa dos Marcos, Costa do Muíño Novo e Outeiro de Almorzo, pertencente á CMVMC da parroquia de Toén, e os montes Xestosa e Pena de Cabras, A Costa, Xenestévez, O Igrexario, Costa do Ribeiro, A Costa do Porto da Vila 1 e A Costa do Porto da Vila 2, pertencentes á CMVMC da parroquia de Xestosa, desde o vértice 1 (o situado máis ao S) ata o vértice 3 (o situado máis ao N).

Logo de analizar os vértices e a súa localización, obsérvase que:

• O punto inicial da liña (vértice 1, Penedo do Piñeiral) coincide co punto final da liña de deslindamento da parroquia de Toén-Trellerma (vértice 5) e mais co punto inicial da liña parroquia de Xestosa-Moreiras e Trelle (vértice 1); estas últimas recoñecen e validan implicitamente a confluencia das catro citadas comunidades (Toén-Xestosa-Trellerma-Moreiras e Trelle) no punto en cuestión.

• O punto final da liña (vértice 3) coincide co punto final da liña de deslindamento parroquia de Toén-parroquia de Puga (vértice 10) e mais co punto inicial da liña parroquia de Xestosa-parroquia de Puga (vértice 1); estas últimas recoñecen e validan implicitamente a confluencia das tres citadas comunidades (Toén-Xestosa-Puga) no punto en cuestión.

• Entre os puntos con pares de coordenadas X: 584.663-Y: 4.682.373 (vértice 1, Penedo do Piñeiral) e X: 584.029-Y: 4.683.637 o deslindamento afecta o MVMC Xestosa, mentres que no tramo comprendido entre as coordenadas X: 583.915-Y: 4.683.870 e X: 583.786-Y: 4.684.191 (vértice 3) o deslindamento afecta o MVMC Pena de Cabras, A Costa, Xenestévez, O Igrexario, Costa do Ribeiro, A Costa do Porto da Vila 1 e A Costa do Porto da Vila 2. Pola contra, entre os puntos X: 584.029-Y: 4.683.637 e X: 583.915-Y: 4.683.870, situados entre os vértices 1 e 3 da liña avinzada, non hai veciñanza formal entre as comunidades conciliantes.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que lle propón ao Xurado Provincial a súa aprobación no tramo lindeiro dos MMVVMMCC Val do Dorno, Montemiau, Costa dos Marcos, Costa do Muíño Novo e Outeiro de Almorzo e Xestosa, comprendido entre os puntos con pares de coordenadas X: 584.663-Y: 4.682.373 (vértice 1, Penedo do Piñeiral) e X: 584.029-Y: 4.683.637, e mais no tramo lindeiro dos MMVVMMCC Val do Dorno, Montemiau, Costa dos Marcos, Costa do Muíño Novo e Outeiro de Almorzo e Pena de Cabras, A Costa, Xenestévez, O Igrexario, Costa do Ribeiro, A Costa do Porto da Vila 1 e A Costa do Porto da Vila 2, comprendido entre os puntos X: 583.915-Y: 4.683.870 e X: 583.786-Y: 4.684.191 (vértice 3).

Consideracións legais e técnicas:

Primeiro. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se deberá seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará a resolución correspondente, que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 3 de xullo de 2023, o Xurado Provincial de Montes Veciñais en Man Común acordou por unanimidade o día 14 de maio de 2024:

Aprobar o acto de conciliación acadado polas xuntas reitoras do MVMC Val do Dorno, Montemiau, Costa dos Marcos, Costa do Muíño Novo e Outeiro de Almorzo, pertencente á CMVMC da parroquia de Toén, e dos MMVVMMCC Xestosa e Pena de Cabras, A Costa, Xenestévez, O Igrexario, Costa do Riveiro, A Costa do Porto da Vila 1 e A Costa do Porto da Vila 2, pertencentes á CMVMC da parroquia de Xestosa, no concello de Toén.

Contra esta resolución, que pon fin á vía administrativa, poderase interpor recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 28 de maio de 2024

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense