O Decreto 196/2012, do 27 de setembro, crea a Axencia de Turismo de Galicia, entidade co obxectivo básico de impulsar, coordinar e xestionar a política autonómica en materia de turismo. Entre o seu obxecto encóntrase o impulso á innovación, investigación, formación e cualificación das empresas e profesionais do sector turístico. Dentro da Axencia de Turismo de Galicia está o Centro Superior de Hostalaría de Galicia (CSHG), que entre as súas funcións ten o desenvolvemento da docencia e a investigación conforme as exixencias metodolóxicas e substantivas propias de toda institución do ámbito universitario.
Mediante a Orde do 4 de xullo de 2014 (DOG núm. 128, do 8 de xullo) fixáronse os prezos privados correspondentes aos estudos conducentes á obtención das titulacións impartidas polo Centro Superior de Hostalaría de Galicia.
A citada orde foi modificada pola Orde do 6 de setembro de 2016 (DOG núm. 187, do 30 de setembro) no que respecta á denominación da titulación Certificado de Elaboración e Xestión en Cociña, que pasa a denominarse Diploma de Gastronomía e Xestión en Cociña.
Así mesmo, a Orde do 22 de agosto de 2017 (DOG núm. 168, do 5 de setembro) e a Orde do 3 de outubro de 2019 (DOG núm. 199, do 18 de outubro) modifican o seu artigo 3 e a segunda delas tamén fixa os prezos privados para o alumnado que obteña unha bolsa ou axuda ao estudo.
A Orde do 2 de novembro de 2022 (DOG núm. 214, do 10 de novembro) modifica a Orde do 4 de xullo de 2014, xa que no curso 2022/23 o CSHG comezou a impartir o grao en Xestión de Empresas Hostaleiras, ao tempo que se actualizaron os conceptos de reserva de praza e anticipo de matrícula e se actualizaron os conceptos que incluía a matrícula ordinaria.
Faise preciso realizar unha nova modificación da Orde do 4 de xullo de 2014, toda vez que se vai reducir o importe da matrícula tanto do Diploma Superior en Xestión Hoteleira como no grao en Xestión de Empresas Hostaleiras, ao tempo que se prevé o importe de matrícula e conceptos, que incluirá esta, para a nova titulación que se vai impartir no CSHG, o Curso Superior de Xefe de Cociña e Pastelaría.
Elimínanse os prezos previstos para a titulación xa extinguida do Diploma de Gastronomía e Xestión en Cociña.
Modifícanse os importes dos prezos das bolsas e actualízase o contido dos conceptos que inclúe a matrícula ordinaria tanto do Diploma Superior en Xestión Hoteleira como no grao en Xestión de Empresas Hostaleiras.
A presente orde consta dun único artigo, no cal se modifica o anexo.
Na súa virtude, vista a proposta formulada pola Axencia de Turismo de Galicia e logo do informe favorable da Consellería de Facenda e Administración Pública, esta consellería
DISPÓN:
Artigo único. Modificación da Orde do 4 de xullo de 2014 pola que se fixan os prezos privados correspondentes aos estudos conducentes á obtención das titulacións do Centro Superior de Hostalaría de Galicia
O anexo da Orde do 4 de xullo de 2014 pola que se fixan os prezos privados correspondentes aos estudos conducentes á obtención das titulacións do Centro Superior de Hostalaría de Galicia queda redactado como segue:
ANEXO
Prezos privados dos estudos
1. Prezos de matrícula ordinaria por titulación:
|
Diploma Superior en Xestión Hoteleira: – Alumnado beneficiario dunha bolsa tipo I: redución dun 80 % do importe da matrícula. – Alumnado beneficiario dunha bolsa tipo II: redución dun 50 % do importe da matrícula. |
4.000,00 € |
|
Grao a tempo completo en Xestión de Empresas Hostaleiras: – Alumnado beneficiario dunha bolsa tipo I: redución dun 80 % do importe da matrícula. – Alumnado beneficiario dunha bolsa tipo II: redución dun 50 % do importe da matrícula. – Alumnado beneficiario dunha bolsa de excelencia académica: redución dun 80 % do importe da matrícula. – Alumnado beneficiario dunha bolsa para persoas galegas residentes no exterior: redución dun 80 % do importe da matrícula. |
4.000,00 € |
|
Grao a tempo parcial en Xestión de Empresas Hostaleiras: – Alumnado beneficiario dunha bolsa tipo I: redución dun 80 % do importe da matrícula. – Alumnado beneficiario dunha bolsa tipo II: redución dun 50 % do importe da matrícula. – Alumnado beneficiario dunha bolsa de excelencia académica: redución dun 80 % do importe da matrícula. – Alumnado beneficiario dunha bolsa para persoas galegas residentes no exterior: redución dun 80 % do importe da matrícula. |
2.000,00 € |
|
Curso Superior de Xefe de Cociña e Pastelaría: – Alumnado beneficiario dunha bolsa tipo I: redución dun 80 % do importe da matrícula. – Alumnado beneficiario dunha bolsa tipo II: redución dun 50 % do importe da matrícula. – Alumnado beneficiario dunha bolsa de excelencia académica: redución dun 80 % do importe da matrícula. – Alumnado beneficiario dunha bolsa para persoas galegas residentes no exterior: redución dun 80 % do importe da matrícula. |
4.000,00 € |
2. Prezos anticipo de matrícula e outros:
|
Diploma Superior en Xestión Hoteleira: – Anticipo de matrícula. – Dereitos de matrícula por materia. – Dereitos de exame en 3ª convocatoria e extraordinaria. |
411,28 € 246,77 € 246,77 € |
|
Grao en Xestión de Empresas Hostaleiras: – Anticipo de matrícula. – Dereitos de matrícula por materia. |
411,28 € 40,00 € por crédito ECTS |
|
Curso Superior de Xefe de Cociña e Pastelaría: – Anticipo de matrícula. |
411,28 € |
3. Conceptos que inclúe a matrícula ordinaria:
Diploma Superior en Xestión Hoteleira:
– Dereitos de matrícula.
– Docencia: sesións teóricas e prácticas, sesións de titoría.
– Dereitos de exame de 1ª e 2ª convocatoria.
– Excursións de interese docente organizadas polo CSHG.
– Seguro de accidentes (válido por un ano natural).
– Almorzo e xantar, de luns a venres, durante o período docente, de acordo co calendario académico en curso.
– Alta de socio, como alumno/a, no Club de Antigos Alumnos.
– Uso de instalacións deportivas do CSHG: pistas de tenis, fútbol sala, ximnasio.
Grao en Xestión de Empresas Hostaleiras:
– Dereitos de matrícula no CSHG.
– Apertura de expediente e servizos xerais no CSHG.
– Docencia: sesións teóricas e prácticas, sesións de titoría.
– Dereitos de exame de 1ª convocatoria (dúas oportunidades por curso académico).
– Uniformes de prácticas.
– Lote de utensilios de traballo (para cociña e servizos).
– Excursións de interese docente organizadas polo CSHG.
– Almorzo e xantar, de luns a venres, durante o período docente, de acordo co calendario académico en curso.
– Alta de socio, como alumno/a, no Club de Antigos Alumnos.
– Uso de instalacións deportivas do CSHG.
Curso Superior de Xefe de Cociña e Pastelaría:
– Dereitos de matrícula.
– Apertura de expediente e servizos xerais.
– Docencia: sesións teóricas e prácticas, sesións de titoría.
– Uniformes de prácticas.
– Lote de utensilios de traballo.
– Excursións de interese docente organizadas polo CSHG.
– Almorzo e xantar, de luns a venres, durante o período docente, de acordo co calendario académico en curso.
– Seguro de accidentes.
– Alta de socio, como alumno/a, no Club de Antigos Alumnos.
– Uso de instalacións deportivas do CSHG.
Disposición derradeira única. Entrada en vigor
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 29 de maio de 2024
Diego Calvo Pouso
Conselleiro de Presidencia, Xustiza e Deportes