Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada do monte veciñal denominado Soutelo, da Comunidade de Montes Veciñais en Man Común de Soutelo, no concello de Salceda de Caselas (expediente RE22010).
O 1.12.2023 o Servizo de Montes desta xefatura territorial emite o seguinte informe:
Feitos:
Primeiro. O 5.9.2022 e número 2022/191093 a Comunidade de Montes Veciñais en Man Común (en diante, CMVMC) de Soutelo (Salceda de Caselas) solicita a revisión do esbozo do monte Soutelo. A dita solicitude deu lugar á apertura do expediente RE22010. Consta no expediente:
– Memoria técnica da revisión do esbozo dos montes Pedra Queimada, Borraliños, Buraca e Coto e Chamorro, de agosto de 2022. Asinada pola enxeñeira forestal núm. 908 do COETFG e modificada o 25.5.23.
– Certificado do secretario coa conformidade do presidente da CMVMC de Soutelo de 22.11.23 da aprobación en asemblea do 19.3.23.
– Cartografía en formato dixital.
Segundo a memoria técnica, levouse a cabo un levantamento topográfico das parcelas con GPS de precisión centimétrica en que se percorreu todo o perímetro con varios membros da xunta reitora, durante o percorrido detectaron marcos de todo o perímetro e encravados, a maior parte do perímetro está delimitado por muros que o separan das propiedades privadas. Xustifican a necesidade da revisión do esbozo por conter moitas deficiencias respecto a delimitación real do monte.
O Monte de Soutelo ten dúas parcelas:
– Parcela núm. 1: Pedra Queimada, Borraliños, Buraca e Coto. Monte que coincide co monte de utilidade pública núm. 507 deslindado por Orde ministerial o 22 de agosto de 1960, e o amolloamento foi aprobado por Orde ministerial o 2 de outubro de 1962.
– Parcela núm. 2: Chamorro. Non existe un deslindamento previo. Ben que o uso continuado desta parcela pola CM de Soutelo permite determinar os seus límites que coinciden con pistas, camiños ou restos de muros doutras propiedades.
Consta no Servizo de Montes o expediente RE22023 de revisión de esbozo da CMVMC de Budiño, que se axusta ao límite coa CMVMC de Soutelo.
Consta no Servizo de Montes o expediente RE22036 de revisión de esbozo da CMVMC de Parderrubias, que se axusta ao límite coa CMVMC de Soutelo.
Segundo. O obxecto da revisión do esbozo é o MVMC denominado Soutelo co ID 3110. A superficie inicial clasificada segundo Resolución do 5.12.1980 é de 98 ha.
Segundo os datos do Sistema Rexistral Forestal non consta superficie de xestión pública e dispón dun instrumento de ordenación inscrito no Rexistro de montes ordenados de Galicia co núm. 360043-02. Así mesmo, constan os seguintes actos de disposición que modifican o perímetro e superficie do MVMC:
– PO-29-PER/77. Argimiro Gándara Fernández/Mª Lidia Martínez Lameiro.
– PO-10-PER/10. Dolores Fernández Castiñeira.
– PO-08-PER/11. Manuel Estévez Muñoz.
Terceiro. A superficie total da revisión do esbozo achegada é de 82,23 ha e un perímetro revisado con propietarios particulares de 18.804 m, segundo a proposta de revisión do esbozo achegada e o indicado na memoria técnica queda definido do seguinte xeito:
Monte: Monte Pedra Queimada, Borraliños, Buraca e Coto.
Superficie: 76,56 ha.
Perímetro: 17.434 m.
Linde norte: montes das parroquias de Budiño e Parderrubias.
Linde sur: propiedades particulares da parroquia de Soutelo.
Linde leste: montes e propiedades particulares das parroquias de Parderrubias e Entenza.
Linde oeste: propiedades particulares da parroquia de Soutelo.
Monte: monte Chamorro.
Superficie: 5,67 ha.
Perímetro: 1.370 m.
Linde norte: propiedades particulares da parroquia de Soutelo.
Linde sur: propiedades particulares da parroquia de Soutelo.
Linde leste: propiedades particulares da parroquia de Soutelo.
Linde oeste: propiedades particulares da parroquia de Soutelo.
Cuarto. O 30.11.2022, o Xurado provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Soutelo (Salceda de Caselas), expediente RE22010, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño de 2012, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, axustándose e completándose con aqueles datos e documentos que se consideren necesarios, en particular os requiridos para a súa inmatriculación no rexistro da propiedade.
2. Para estes efectos, o xurado provincial de montes veciñais en man común, de oficio ou por instancia de parte, poderá solicitar á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no rexistro da propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, poñerase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase proceder á marcaxe dos montes veciñais, que en todo caso se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, poñerase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo do monte Soutelo proposta polo Servizo de Montes é a presentada pola CMVMC de Soutelo e queda definido consonte os datos reflectidos no feito terceiro, e a documentación achegada.
Vista a proposta de revisión presentada polo Servizo de Montes sobre a adaptación do esbozo do monte veciñal denominado Soutelo e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo do monte veciñal denominado Soutelo clasificado a prol da CMVMC de Soutelo (Salceda de Caselas), segundo a proposta do Servizo de Montes e a planimetría elaborada por este.
Pontevedra, 22 de abril de 2024
Antonio Crespo Iglesias
Presidente do Xurado Provincial de Clasificación de
Montes Veciñais en Man Común de Pontevedra