Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada dos montes veciñais denominados Setados, Cachadiña e Aspra da Comunidade de Montes Veciñais en Man Común de Setados, no concello das Neves (expediente RE22011).
O 6.12.2023 o Servizo de Montes desta xefatura territorial emite o seguinte informe:
Feitos:
Primeiro. O 30.8.2022 e número 2022/2150420 a Comunidade de Montes Veciñais en Man Común (en diante, CMVMC) de Setados solicita a revisión do esbozo dos montes de Setados (Resolución de clasificación do 5.12.1980), Cachadiña e Aspra (Resolución de clasificación do 29.11.00). A dita solicitude deu lugar á apertura do expediente RE22011. Consta no expediente:
– Memoria técnica da revisión do esbozo dos montes Setados, Cachadiña e Aspra, de agosto de 2022. Asinada polo enxeñeiro forestal núm. 883 do COETF de Galicia e modificada en decembro de 2023.
– Certificado do secretario coa conformidade do presidente da CMVMC de Setados de 22.11.2023 da aprobación en asemblea do 19.11.2023.
– Cartografía en formato dixital.
Segundo a memoria técnica levouse a cabo un levantamento topográfico das parcelas con GPS de precisión centimétrica en que se percorreu todo o perímetro con varios membros da xunta reitora, durante o percorrido detectaron marcos de todo o perímetro e encravados, a maior parte do perímetro está delimitado por muros que o separan das propiedades privadas. Xustifican a necesidade da revisión do esbozo por conter moitas deficiencias respecto a delimitación real do monte.
Segundo. O obxecto da revisión do esbozo son os seguintes MVMC:
– Setados. Clasificación do 5.12.1980 e unha superficie de 30,00 ha.
– Cachadiña. Clasificación do 29.11.2000 e unha superficie de 3,50 ha.
– Aspra. Clasificación do 29.11.2000 e unha superficie de 1,80 ha.
Segundo os datos do Sistema Rexistral Forestal non consta superficie de xestión pública e dispón dun documento simple de xestión inscrito no Rexistro de montes ordenados de Galicia co núm. 360279. Así mesmo, non constan actos de disposición que modifican o perímetro e superficie do MVMC.
Terceiro. A superficie e perímetro da revisión do esbozo desagregada por montes:
– Cachadiña. Superficie de 2,47 ha e perímetro 944 m.
– Aspra. Superficie de 1,76 ha e perímetro de 755 m.
– Setados. Composto polos montes Medáns, Daquel Cabo e Carreiroute. A superficie de 17,76 ha e un perímetro de 4.050 m.
Coa proposta de revisión do esbozo achegada e o indicado na memoria técnica queda definido do seguinte xeito:
ID MONTE 2619:
Monte: Setados.
Superficie: 17,76 ha.
Linde norte: montes de Santiago de Ribarteme.
Linde sur: río Miño.
Linde leste: montes de Vide.
Linde oeste: montes das Neves.
ID MONTE 2923:
Monte: Cachadiña.
Superficie: 2,47 ha.
Linde norte: camiño que vai de Pedrouzán a Carboeira e muro de pedra granítica que pecha coas propiedades particulares.
Linde sur: camiño de Pedrouzas a Castro e antigos de pedra que están sobre o terreo que delimitan coas propiedades particulares.
Linde leste: con propiedades particulares e os lindes están ben definidos por muros de pedra.
Linde oeste: con propiedades particulares e os lindes están ben definidos por muros de pedra.
Monte: Aspra.
Superficie: 1,76 ha.
Linde norte: camiño de acceso a propiedades e muro de pedra granítica que pecha coas propiedades particulares.
Linde sur: río Termes.
Linde leste: río Termes.
Linde oeste: muro de pedra que delimita as propiedades particulares.
Cuarto. O 30.11.2022, o Xurado provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Setados (As Neves), expediente RE22011, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño de 2012, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, axustándose e completándose con aqueles datos e documentos que se consideren necesarios, en particular os requiridos para a súa inmatriculación no rexistro da propiedade.
2. Para estes efectos, o xurado provincial de montes veciñais en man común, de oficio ou por instancia de parte, poderá solicitar á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no rexistro da propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, poñerase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase proceder á marcaxe dos montes veciñais que, en todo caso, se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, poñerase fin ao procedemento, dentro do perímetro cuestionado, sen máis trámites. Este acordo de finalización e arquivo parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo dos montes Setados, Cachadiña e Aspra, proposta polo Servizo de Montes é a presentada pola CMVMC de Setados e queda definido consonte os datos reflectidos no feito terceiro, e a documentación achegada.
Vista a proposta de revisión presentada polo Servizo de Montes sobre a adaptación do esbozo dos montes veciñais denominados Setados, Cachadiña e Aspra e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo dos montes veciñais denominados Setados, Cachadiña e Aspra, clasificados a prol da CMVMC de Setados (As Neves), segundo a proposta do Servizo de Montes e a planimetría elaborada por este.
Pontevedra, 22 de abril de 2024
Antonio Crespo Iglesias
Presidente do Xurado Provincial de Clasificación de
Montes Veciñais en Man Común de Pontevedra