Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada do Monte Veciñal denominado Monte Gulpilleira da Comunidade de Montes Veciñais en Man Común de Santa María do Porriño, no concello do Porriño (expediente RE22005).
O 15.12.2023 o Servizo de Montes desta xefatura territorial emite o seguinte informe:
«Feitos:
Primeiro. O 1.9.2022 e número 2022/2176351 a Comunidade de Montes Veciñais en Man Común (en diante, CMVMC ) de Santa María do Porriño solicita a revisión do esbozo do monte Monte Gulpilleira. Consta no expediente:
– Memoria técnica da revisión do esbozo do monte Monte Gulpilleira de maio de 2023. Asinada pola enxeñeira técnica forestal colexiada número 908 do COETFG e modificado en decembro de 2023.
– Certificado do secretario coa conformidade do presidente da CMVMC de Santa María do Porriño do 15.12.2023 da aprobación en asemblea do 23.4.2023.
– Cartografía en formato dixital ETRS 89 UTM ZONE 29N.
Segundo a memoria técnica o Monte Gulpilleira correspóndese co monte de utilidade pública núm. 496 deslindado e amolloado. Téñense en conta as sentenzas, permutas e expropiacións que modificaron o perímetro inicial clasificado e no ano 2004 realízase o levantamento topográfico de todo o perímetro.
A CMVMC de Santa Mariña do Porriño na memoria asinada por técnico forestal competente achega documentación suficiente que acredita a proposta da revisión do esbozo.
Segundo. O obxecto da revisión do esbozo é o MVMC de Monte Gulpilleira clasificado o 13.1.1987 e co ID de monte 3198. A superficie inicial clasificada é de 45 ha que se incrementou pola existencia de sentenzas xudiciais que recoñecen a superficie da residencia sanitaria e da feira do gando como MVMC e as permutas P06/2000 e P17/2001.
A superficie e lindeiros segundo a proposta de revisión do esbozo achegada e o indicado na memoria técnica quedaría do seguinte xeito:
Monte: Monte Gulpilleira ten unha superficie: de 55,65 ha e perímetro: 8.645 m distribuído en dous cotos redondos:
– Monte Gulpilleira parcela Norte.
Superficie: 54,83 ha.
Norte: Concello de Mos.
Sur: camiño público e propiedades particulares.
Este: Antonio Boente Fernández e outras propiedades particulares.
Oeste: Josefa Álvarez Godoy e outras propiedades particulares.
– Monte Gulpilleira parcela Sur.
Superficie: 0,82 ha.
Norte: Isabel Rodríguez Loureiro, Ministerio de Transportes, Mobilidade Urbana e Axenda Urbana.
Sur: Jesús Novas Barros,Flora García Lago.
Leste: Ministerio de Transportes, Mobilidade Urbana e Axenda Urbana.
Oeste: camiño público.
Terceiro. O 30.11.2022, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Santa María do Porriño (O Porriño), expediente RE22005, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, axustándose e completándose con aqueles datos e documentos que se consideren necesarios, en particular os requiridos para a súa inmatriculación no rexistro da propiedade.
2. Para estes efectos, o xurado provincial de montes veciñais en man común, de oficio ou por instancia de parte, poderá solicitar á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no rexistro da propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, poñerase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase proceder á marcaxe dos montes veciñais, que en todo caso se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, poñerase fin ao procedemento, dentro do perímetro cuestionado, sen máis trámites. Este acordo de finalización e arquivo parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo do monte Monte Gulpilleira proposta polo Servizo de Montes é a presentada pola CMVMC de Santa María do Porriño e queda definido consonte os datos reflectidos no feito segundo, e a documentación achegada».
Vista a proposta de revisión presentada polo Servizo de Montes sobre a adaptación do esbozo do monte veciñal denominado Monte Gulpilleira e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,
ACORDA:
Aprobar a revisión do esbozo do monte veciñal denominado Monte Gulpilleira clasificado a prol da CMVMC de Santa María do Porriño (O Porriño), segundo a proposta do Servizo de Montes e a planimetría elaborada por este.
Pontevedra, 19 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra