Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada dos montes veciñais denominados Monte Carballosa, Armada, Rioseco, Lameiras, Chan Grande e Monte Pequeno da Comunidade de Montes Veciñais en Man Común de Oia, no concello de Vigo (expediente RE22004).
O 1.12.2023 o Servizo de Montes desta xefatura territorial emite o seguinte informe:
«Feitos:
Primeiro. O 30.8.2022 e número 2022/2152599 a Comunidade de Montes Veciñais en Man Común (en diante, CMVMC) de San Miguel de Oia (Vigo) solicita a revisión dos esbozos dos Montes Veciñais en Man Común (en diante, MVMC) Monte Carballosa, Armada, Rioseco, Lameiras, Chan Grande e Monte Pequeno. Consta no expediente:
– Memoria técnica da revisión do esbozo dos montes Monte Carballosa, Armada, Rioseco, Lameiras, Chan Grande e Monte Pequeno de agosto de 2022. Asinada pola enxeñeira técnica forestal colexiada número 908 do COETFG.
– Certificado do secretario coa conformidade do presidente da CMVMC de San Miguel de Oia do 22.11.2023 da aprobación en asemblea do 22.3.2023.
– Cartografía en formato dixital.
– Representación a favor de AFG, S.A.
Segundo a memoria técnica o esbozo do MVMC pola súa antigüidade non reúne as características de fiabilidade e precisión que exixen as novas técnicas topográficas. O monte correspóndese parcialmente co monte de utilidade pública núm. 538 e realizouse un levantamento topográfico (precisión centimétrica) en que se percorreu todo o perímetro con varios membros da xunta reitora da comunidade de montes, durante ese percorrido identificaronse os marcos de todo o perímetro e do encravado. A CMVMC de San Miguel de Oia na memoria asinada por técnico forestal competente achega documentación suficiente que acredita a proposta da revisión do esbozo.
Segundo. O obxecto da revisión do esbozo son os MVMC de Monte Carballosa, Armada, Rioseco, Lameiras, Chan Grande e Monte Pequeno co ID 3198. A superficie inicial clasificada é de 80 ha.
Segundo os datos do Sistema Rexistral Forestal non consta superficie de xestión pública, non constan actos de disposición que modifiquen a superficie inicial clasificada. A CMVMC de San Miguel de Oia posúe instrumento de xestión inscrito no Rexistro de montes ordenados de Galicia co número 360041.
A superficie e lindeiros segundo a proposta de revisión do esbozo achegada e o indicado na memoria técnica é a seguinte:
Monte: Monte Carballosa, Armada, Rioseco, Lameiras, Chan Grande e Monte Pequeno.
Superficie: 82,71 ha.
Perímetro: 7.349 m.
Linde norte: predios particulares de Pereiras, Devesa, Carballosa, Sela e Carpinteira.
Linde sur: monte veciñal en man común da parroquia de Saiáns.
Linde leste: monte veciñal en man común da parroquia de Coruxo.
Linde oeste: predios particulares deste.
Terceiro. O 30.11.2022, o Xurado de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de San Miguel de Oia (Vigo), expediente RE22004, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, axustándose e completándose con aqueles datos e documentos que se consideren necesarios, en particular os requiridos para a súa inmatriculación no rexistro da propiedade.
2. Para estes efectos, o xurado provincial de montes veciñais en man común, de oficio ou por instancia de parte, poderá solicitar á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no rexistro da propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, poñerase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase proceder á marcaxe dos montes veciñais, que en todo caso se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, poñerase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo dos montes Monte Carballosa, Armada, Rioseco, Lameiras, Chan Grande e Monte Pequeno proposta polo Servizo de Montes é a presentada pola CMVMC de San Miguel de Oia (Vigo)».
Vista a proposta de revisión presentada polo Servizo de Montes sobre a adaptación do esbozo dos montes veciñais denominados Monte Carballosa, Armada, Rioseco, Lameiras, Chan Grande e Monte Pequeno, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,
ACORDA:
Aprobar a revisión do esbozo dos montes veciñais denominados Monte Carballosa, Armada, Rioseco, Lameiras, Chan Grande e Monte Pequeno clasificado a prol da CMVMC de San Miguel de Oia (Vigo), segundo a proposta do Servizo de Montes e a planimetría elaborada por este.
Pontevedra, 19 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra