A Consellería de Cultura, Educación, Formación Profesional e Universidades (actualmente Consellería de Educación, Ciencia, Universidades e Formación Profesional), por medio da Orde do 24 de outubro de 2023 (DOG núm. 211, do 7 de novembro), estableceu as bases reguladoras e convocou, en réxime de concorrencia competitiva, as axudas para a acreditación, estrutura, mellora e apoio aos centros de investigación do Sistema universitario de Galicia, cofinanciadas no marco do programa operativo Feder Galicia 2021-2027.

O artigo 6 desta orde, Conceptos subvencionables, no seu punto 10 establece, para a anualidade 2023, un gasto subvencionable con cargo a fondos propios dunha cantidade máxima de 1.000,00 € por cada un dos centros de investigación que reúna os requisitos mínimos de acceso a esta convocatoria en concepto de gastos incorridos na preparación e presentación das propostas.

O día 15.1.2024 publicouse a resolución pola que se aproban as listas definitivas das solicitude admitidas e excluídas da Orde do 24 de outubro de 2023, en función de que estas solicitudes reunisen os requisitos mínimos de acceso establecidos na orde da convocatoria e de que a documentación estivese completa e fose presentada dentro do prazo de admisión de solicitudes.

A Universidade de Santiago de Compostela (USC) presentou dentro do prazo a documentación xustificativa para que se realizase o libramento de fondos correspondentes a esta anualidade.

A competencia para resolver estas axudas correspóndelle á persoa titular da Consellería de Educación, Ciencia, Universidades e Formación Profesional, de acordo co establecido no artigo 13 da orde de convocatoria, polo que, segundo o establecido nese artigo e atendendo a proposta de concesión dos importes da axuda para o 2023 elevada polo órgano instrutor, a través da Secretaría Xeral de Universidades, esta consellería

RESOLVE:

Primeiro. Conceder á USC a axuda para a anualidade 2023 na contía sinalada no anexo I.

Segundo. A axuda imputaranse ao capítulo VII dos orzamentos da Consellería de Educación, Ciencia, Universidades e Formación Profesional, na aplicación 10.03.561B.744.0, no marco do Plan de financiamento universitario para o período 2022-2026, coa seguinte desagregación:

Núm. expediente	Centro	Acrónimo	Universidade	Importe 2023
ED431G 2023/02	Centro de Investigación en Medicina Molecular e Enfermidades Crónicas	Cimus	USC	496,87 €
ED431G 2023/03	Centro Singular de Investigación en Química Biolóxica e Materiais Moleculares	Ciqus	USC	496,87 €
ED431G 2023/04	Centro Singular de Investigación en Tecnoloxías Intelixentes	Citius	USC	496,87 €
ED431G 2023/05	Instituto Galego de Físicas de Altas Enerxías	IGFAE	USC	496,87 €
ED431G 2023/12	Centro de Investigación Interdisciplinar en Tecnoloxías Ambientais	Cretus	USC	634,37 €
ED431G 2023/17	Centro de Investigación en Tecnoloxías, Enerxía e Procesos Industriais	Cispac	USC	634,37 €
Total				3.256,22 €

Terceiro. Contra esta resolución, que esgota a vía administrativa, as persoas interesadas poderán interpoñer recurso potestativo de reposición ante a persoa titular da Consellería de Educación, Ciencia, Universidades e Formación Profesional, no prazo dun mes a partir do día seguinte ao da publicación da resolución no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou directamente recurso contencioso-administrativo no prazo de dous meses, ante a Sala do Contencioso-Administrativo do Tribunal Superior de Xustiza de Galicia, de conformidade cos artigos 19 e 46 da Lei 29/1998, do 13 de xullo, da xurisdición contencioso-administrativa.

Santiago de Compostela, 19 de abril de 2024

O conselleiro de Educación, Ciencia, Universidades e Formación Profesional
P.D. (Orde do 29.7.2022)
Manuel Vila López
Secretario xeral técnico da Consellería de Cultura,
Educación, Formación Profesional e Universidades