Mediante a antedita Orde do 28 de decembro de 2023 (DOG núm. 22, do 31 de xaneiro de 2024) establecéronse as bases reguladoras e a convocatoria para o ano 2024 de concesión, en réxime de concorrencia competitiva, de axudas a proxectos colectivos para a modernización e mellora dos equipamentos e das infraestruturas dos portos pesqueiros, dos lugares de desembarque, das lonxas e dos ancoradoiros, cofinanciada polo Fondo Europeo Marítimo, de Pesca e de Acuicultura (FEMPA).
A devandita orde, no seu artigo 3.3 establece que o importe consignado poderá ser ampliado en función das dispoñibilidades orzamentarias, sen que iso dea lugar á apertura dun novo prazo de presentación de solicitudes, agás indicación expresa en contrario na orde que se publique para o efecto.
Unha vez revisados os expedientes presentados ao abeiro da devandita orde, comprobouse que o importe total solicitado destas axudas superaba o crédito da convocatoria para o 2024, o que faría imposible atender a demanda da totalidade das solicitudes presentadas.
Dado que existen dispoñibilidades orzamentarias por remanentes de convocatorias anteriores financiadas con créditos do mesmo programa, considérase conveniente ampliar os importes dos créditos iniciais e acadar así un uso máis eficiente dos fondos públicos mediante un maior grao de execución orzamentaria.
Por todo isto, e facendo uso das facultades que me confire o artigo 34 da Lei 1/1983, do 22 de febreiro, reguladora das normas da Xunta e da súa Presidencia,
DISPOÑO:
Artigo único. Ampliación de crédito
1. Amplíase con cargo á aplicación 15.03.514A.781.0 e código de proxecto 2023 178, na anualidade de 2024, o crédito máximo destinado a financiar as axudas para proxectos colectivos para a modernización e mellora dos equipamentos e das infraestruturas dos portos pesqueiros, dos lugares de desembarque, das lonxas e dos ancoradoiros, cofinanciada polo Fondo Europeo Marítimo, de Pesca e de Acuicultura (FEMPA), no importe de 3.370.000 €.
2. O novo importe total máximo, sumando o importe inicial publicado e a presente ampliación, queda fixado no cadro seguinte:
Ano 2024 |
Ano 2025 |
Total |
8.170.000 € |
3.500.000 € |
11.670.000 € |
O importe está cofinanciado nun 70 % polo FEMPA (prioridade 1. Fomentar a pesca sostible e a recuperación e conservación dos recursos biolóxicos acuáticos, obxectivo específico 1.1: reforzar as actividades pesqueiras que sexan económica, social e ambientalmente sostibles, medida 1.1.12 portos pesqueiros, lugares de desembarque, lonxas e ancoradoiros) e nun 30 % pola Comunidade Autónoma.
3. A publicación desta orde non supón a apertura dun novo prazo de presentación de solicitudes.
Disposición derradeira única
A presente orde entrará en vigor o día hábil seguinte ao da súa publicación no Diario Oficial de Galicia.
Santiago de Compostela, 17 de abril de 2024
Alfonso Villares Bermúdez
Conselleiro do Mar