Visto o expediente para outorgamento da autorización administrativa previa e de construción para a instalación eléctrica que a seguir se describe:

Solicitante: Sociedade Galega do Medio Ambiente, S.A. (Sogama).

Domicilio social: lugar de Morzós, 10, San Román, As Encrobas, 15187 Cerceda (A Coruña).

Denominación: LSAT 20 kV Riotorto e CT para dar subministración á planta de Sogama en Riotorto V.1.

Situación: concello de Riotorto.

Características técnicas principais:

– Reforma da LAT aérea 20 kV Riotorto, consistente na substitución do apoio existente 218736 por un apoio novo tipo C-2000/14 (P1A), no cal se instala un paso aéreo a soterrado, un seccionador e un antiescalo.

– Liña soterrada de alta tensión a 20 kV Riotorto, con orixe no apio proxectado P1A e final no CT proxectado, cunha lonxitude de 2.130 metros, en condutor HEPRZ1-150 mm.

– Centro de transformación prefabricado proxectado, cunha potencia máxima admisible de 1.000 kVA e unha potencia inicial de 100 kVA, no cal se instala unha cela de liña e unha cela de protección de transformador, relación de transformación 20.000/400-230 V.

Finalidade da instalación: mellora das instalacións.

Orzamento: 419.433,40 euros.

Documentación que se xunta:

– Separata para o Concello de Riotorto.

– Separata para a Confederación Hidrográfica del Cantábrico.

– Separata para Axencia Galega de Infraestruturas.

Esta xefatura territorial, de acordo coas competencias que resultan do Decreto 116/2022, do 23 de xuño, polo que se establece a estrutura orgánica da consellería, o Decreto 49/2023, do 19 de maio, polo que se modifica o Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación, e tendo en conta o Decreto 9/2017, do 12 de xaneiro, sobre órganos competentes para autorización de instalacións eléctricas na Comunidade Autónoma de Galicia,

RESOLVE:

En relación coa instalación de alta tensión, conceder a autorización administrativa previa e de construción ás ditas instalacións, sen prexuízo de terceiros e con independencia das autorizacións que sexan necesarias para a execución da obra por parte doutros órganos da Administración, condicionada ao cumprimento das seguintes condicións:

Primeira. As instalacións deberán axustarse na súa execución ao disposto no citado proxecto de execución, e a dirección de obra deberá levala a cabo un técnico competente.

Segunda. A peticionaria asegurará o mantemento e vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade.

Terceira. En todo momento deberán cumprirse as normativas e directrices vixentes que sexan de aplicación, en particular canto establecen a Lei 24/2013, do 26 de decembro, do sector eléctrico, o Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias, e o Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias.

O prazo de posta en marcha das instalacións que se autorizan será de doce meses, contados a partir da data da última autorización administrativa necesaria para a súa execución.

Contra esta resolución poderase interpor recurso de alzada ante o conselleiro de Economía, Industria e Innovación no prazo dun mes, a partir do día seguinte ao da notificación ou publicación desta resolución; tamén se poderá interpor calquera outro recurso que se considere pertinente en dereito.

Lugo, 6 de marzo de 2024

Gustavo José Casasola de Cabo
Xefe territorial de Lugo