Decreto da Alcaldía:
Iniciado o correspondente expediente de execución subsidiaria de xestión da biomasa e/ou de retirada de especies arbóreas na parcela catastral 1 do polígono 164 do Catastro de rústica deste municipio, por incumprimento das obrigas establecidas na Lei 3/2007, do 9 de abril, de prevención e defensa contra os incendios forestais de Galicia.
Considerando que con data do 20 de decembro de 2023 se lle notificou ao titular catastral da dita parcela a obriga de realizar os traballos de limpeza e roza, todo iso de conformidade co disposto no artigo 22.4 da dita Lei 3/2007, do 9 de abril.
Considerando que, malia o prazo transcorrido, actualmente continúan a incumprirse esas obrigas legais de xestión da biomasa e/ou de retirada de especies arbóreas.
Considerando que o artigo 22.4 da Lei 3/2007, do 9 de abril, de prevención e defensa contra os incendios forestais de Galicia, posibilita este concello para a execución subsidiaria en caso de incumprimento dos traballos de xestión da biomasa e cuxos custos se repercutirán ás persoas responsables.
Considerando que o artigo 22.6 da Lei 3/2007, do 9 abril, de prevención e defensa contra os incendios forestais de Galicia, establece a obriga das persoas responsables de facilitar os necesarios accesos ás entidades responsables dos traballos de xestión da biomasa, que non requirirán de ningunha autorización para a execución subsidiaria da xestión da biomasa nas redes de faixas de xestión.
Por este anuncio, de conformidade co establecido no artigo 21 da Lei 7/1985, do 2 de abril, reguladora das bases do réxime local, e no artigo 22.4 da Lei 3/2007, do 9 de abril, de prevención e defensa contra os incendios forestais de Galicia, en uso das facultades conferidas pola normativa vixente,
RESOLVO:
Primeiro. Aprobar a execución subsidiaria por parte do Concello de Begonte da xestión da biomasa e/ou retirada de especies arbóreas da parcela 1 do polígono 164 do Catastro de rústica deste municipio, cuxos titulares catastrais son os herdeiros de Jesús Suárez Cruz, por incumprimento das obrigas previstas na Lei 3/2007, do 9 de abril, de prevención e defensa contra os incendios forestais de Galicia.
Segundo. Encomendarlle os traballos de execución subsidiaria –dada a carencia de medios municipais propios– á empresa Lavado Engrase O Galego, con CIF B27174192; as persoas responsables deberán facilitar os necesarios accesos, sen que se requira ningunha autorización ao respecto.
Terceiro. As especies arbóreas retiradas serán obxecto do seu comiso e o seu destino será o seu alleamento nos termos previstos na dita Lei 3/2007, e os importes obtidos pola venda destinaranse a sufragar os gastos derivados desta execución subsidiaria.
Cuarto. Efectuar a oportuna liquidación dos custos dos traballos de execución subsidiaria e do valor das especies arbóreas retiradas.
Quinto. Notificarlles esta resolución aos interesados, coa indicación dos recursos que legalmente procedan.
Recursos. Contra este acordo, que pon fin á vía administrativa, pode interpoñerse alternativamente o recurso potestativo de reposición, no prazo dun mes contado desde o día seguinte ao da recepción desta notificación, ante o mesmo órgano que adoptou o acordo, ou directamente o recurso contencioso-administrativo, ante o Xulgado do Contencioso-Administrativo de Lugo, no prazo de dous meses contados desde o día seguinte ao da recepción desta notificación, sen que se poidan simultanear ambos os dous.
De se interpoñer o recurso potestativo de reposición, non se poderá interpoñer o recurso contencioso-administrativo ata a súa resolución expresa ou ata a súa desestimación por silencio, de conformidade co previsto nos artigos 123 e 124 da Lei 39/2015, do 1 de outubro, do procedemento administrativo común das administracións públicas.
Begonte, 1 de febreiro de 2024
José Ulla Rocha
Alcalde