Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao Acordo do Xurado Provincial de Clasificación de Montes Veciñais en Man Común de Pontevedra, do 2 de outubro de 2023, ao respecto da revisión do esbozo e elaboración da cartografía actualizada do monte veciñal denominado Traspielas da Comunidade de Montes Veciñais en Man Común de Traspielas, no concello de Fornelos de Montes (expediente RE22051).
O 18.9.2023, o Servizo de Montes desta xefatura territorial emite o seguinte informe:
«Feitos:
Primeiro. O 28.9.2022 e número de solicitude 2022/2380319, a Comunidade de Montes Veciñais en Man Común (en diante, CMVMC) de Traspielas solicita a revisión do esbozo do monte veciñal en man común (en diante, MVMC) de Traspielas (ID 2765). A dita solicitude deu lugar á apertura do expediente RE22051. Consta no expediente:
– Informe técnico da revisión parcial do esbozo do monte veciñal en man común de Traspielas de setembro de 2022. Asinada o 17.9.2023 pola enxeñeira forestal, núm. 482 do COETF de Galicia.
– Certificado do secretario coa conformidade do presidente da CMVMC de Traspielas do 8.9.2022 da aprobación en asemblea xeral do 26.6.2022
– Cartografía en formato dixital.
A revisión parcial do esbozo afecta tres tramos en que o monte veciñal limita coas propiedades particulares dos núcleos de poboación de Traspielas, San Amaro e Freaza, todos eles localizados na parroquia de Traspielas no termo municipal de Fornelos de Montes.
– Tramo I: inmediación do núcleo de poboación de Traspielas.
– Tramo II: inmediación do núcleo de poboación de San Amaro.
– Tramo III: inmediación do núcleo de poboación de Freaza.
O límite definido para cada un dos tres tramos acadouse polos traballos de levantamento topográfico, revisión da documentación histórica, cartográfica e xudicial existente.
Segundo. O obxecto da revisión parcial do esbozo é parte do perímetro do MVMC de Traspielas con Resolución do Xurado de MVMC de Pontevedra do 1.2.79 e unha superficie inicial de 969 ha. Proponse a modificación en tres tramos no perímetro cos propietarios particulares dos núcleos de poboación de Traspielas, San Amaro e Freaza.
Segundo os datos do Sistema rexistral forestal regulado no artigo 126 da Lei 7/2012, de montes de Galicia:
– Non consta contrato de xestión coa Consellería do Medio Rural.
– A CMVMC de Traspielas dispón dun documento de ordenación forestal inscrito no Rexistro de Montes Ordenados de Galicia co núm. 360235 e vixente ata 2029.
– O esbozo presentado da CMVMC de Traspielas respecta as liñas de deslindamento aprobadas polo Xurado de MVMC de Pontevedra:
– Edicto do 5 de decembro de 2014, polo que se aproba o deslindamento entre a CMVMC de Traspielas e a CMVMC de San Xurxo (DOG núm. 245, do 23 de decembro)
– Edicto do 19 de xullo de 2018, polo que se aproba o deslindamento entre a CMVMC de Traspielas e a CMVMC de Santa María de Salceda (DOG núm. 150, do 7 de agosto).
– Orde do 3 de maio de 2016, pola que se aproba o primeiro tramo do deslindamento parcial dos montes da CMVMC de Atios (DOG núm. 96, do 23 de maio) estremeiria co MVMC de Traspielas.
– Non constan actos de disposición que modifican o perímetro e superficie do MVMC.
Terceiro. A superficie e perímetro da revisión do esbozo proposto total é de 937,24 has e 4,17 km. Non se modifican os límites do MVMC de Traspielas.
Cuarto. O 30.11.2022, o Xurado Provincial do MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Traspielas (Fornelos de Montes), expediente RE22051, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia, na súa disposición transitoria décimo terceira, establece o procedemento de revisión de esbozos de montes veciñais en man común.
Segunda. A revisión do esbozo parcial do MVMC de Traspielas proposta polo Servizo de Montes é a achegada pola CMVMC de Traspielas (concello de Fornelos de Montes) e queda definida consonte os datos reflectidos no antecedente de feito terceiro e a cartografía que consta no dito expediente».
Vista a proposta de revisión presentada polo Servizo de Montes sobre a adaptación do esbozo do monte veciñal denominado Traspielas e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,
ACORDA:
Aprobar a revisión do esbozo parcial do monte veciñal denominado Traspielas clasificado a prol da CMVMC de Traspielas (Fornelos de Montes), segundo a proposta do Servizo de Montes e a planimetría elaborada por este.
Pontevedra, 29 de decembro de 2023
Antonio Crespo Iglesias
Presidente do Xurado Provincial de
Montes Veciñais en Man Común de Pontevedra