Para os efectos previstos no artigo 53 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 2 de outubro de 2023, en relación co deslindamento parcial entre as comunidades de montes veciñais en man común do Viso (concello de Redondela) e Alxán de Abaixo (concello de Soutomaior), ao respecto da estrema común dos seus montes (expediente DC22131).
Feitos:
Primeiro. O 30.7.2022, o presidente da comunidade de montes veciñais en man común (en diante CMVMC) do Viso presentou no rexistro electrónico da Xunta de Galicia, co núm. de entrada 2022/1973674, solicitude de deslindamento entre a CMVMC do Viso (concello de Redondela) e a CMVMC de Alxán de Abaixo (concello de Soutomaior).
Os montes veciñais en man común (en diante MVMC) afectados por este deslindamento son:
– MVMC do Viso (ID monte: 3089) da CMVMC do Viso.
– MVMC de Peneda (ID monte: 3141) da CMVMC de Alxán de Abaixo.
Segundo. Consta no expediente a seguinte documentación do deslindamento consonte o artigo 53 da Lei 7/2012:
• Acta do apeo do deslindamento o 30.6.2022.
• Acta de conciliación nº 1/2022 entre as comunidades no Xulgado de Paz de Soutomaior o 17.6.2022.
• Certificados da aprobación do deslindamento nas asembleas de ambas as CMVMC: CMVMC do Viso o 22.8.2021 e CMVMC de Alxán de Abaixo o 16.1.2022.
• Memoria descritiva co plano de deslindamento e cartografía en formato dixital no Datum ETRS89/UTM zona 29N EPSG: 25829. Asinado o 9.6.2023 polo técnico colexiado núm. 482 do COETF de Galicia.
• Informes de validación gráfica catastral cos CSV: X8YW9BWN7S7K94HE e YSEKAK38XV4MQYGQ (para a comunicación da alteración catastral consonte o artigo 55.3 da Lei 7/2012), que polo principio de colaboración entre administracións deberá verificar a Xerencia Territorial do Catastro.
Terceiro. A liña de deslindamento proposta ten unha lonxitude de 243 metros e está composta polos seguintes puntos:
Punto P01- |
x: 533.746,26 |
y: 4.686.130,59 |
Punto P02- |
x: 533.785,99 |
y: 4.685.886,08 |
No traballo de gabinete establécense dous puntos secundarios para respectar o dominio público da estrada (puntos S01 e S02):
Punto S01- |
x: 533.760,19 |
y: 4.686.044,88 |
Punto S02- |
x: 533.760,94 |
y: 4.686.040,22 |
Revisada a cartografía das resolucións de clasificación de MVMC detéctase que existe estrema entre ambos os montes e considérase que non afecta terceiros propietarios.
O punto P01 é o punto no cal converxen a CMVMC do Viso, a CMVMC de Arcade de Arriba e a CMVMC de Alxán de Abaixo, e coincide co punto P3 do expediente DC22010 (deslindamento entre a CMVMC do Viso e a CMVMC de Arcade de Arriba).
O deslindamento está formado por 2 tramos:
Tramo 1: punto P01-punto S01.
Tramo 2: punto S02-punto P02.
A liña do deslindamento non respecta a liña do Instituto Xeográfico Nacional entre os concellos de Redondela e Soutomaior. O deslindamento establécese mediante acordo das comunidades implicadas nel.
A liña de deslindamento produce modificacións na cartografía dos esbozos de clasificación das seguintes comunidades:
– CMVMC do Viso: o expediente de revisión de esbozo RE22002 xa recolle o actual deslindamento.
– CMVMC de Alxán de Abaixo: achega uns pequenos axustes para pechar os puntos P01 e P02 do deslindamento co resto do esbozo do seu MVMC.
O Servizo de Montes considera que a solicitude se axusta ao establecido no artigo 53, polo que propón a aprobación do deslindamento segundo a liña presentada.
Consideracións legais e técnicas:
Primeira. A presente resolución dítase de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e consideracións legais e técnicas expostos, o Xurado, por unanimidade dos seus membros,
ACORDA:
Aprobar o deslindamento parcial realizado entre a CMVMC do Viso (concello de Redondela) e a CMVMC de Alxán de Abaixo (concello de Soutomaior), respecto da súa estrema común, nos termos indicados no feito terceiro.
Contra a presente resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ao da súa publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e cos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Pontevedra, 27 de decembro de 2023
Antonio Crespo Iglesias
Presidente do Xurado Provincial de Clasificación de Montes
Veciñais en Man Común de Pontevedra