Para os efectos previstos no artigo 53 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 2 de outubro de 2023, en relación co deslindamento parcial entre as comunidades de montes veciñais en man común do Viso (concello de Redondela) e Arcade de Arriba (concello de Soutomaior), ao respecto da estrema común dos seus montes (expediente DC22010).
Feitos:
Primeiro. O 3.8.2022, o presidente da comunidade de montes veciñais en man común (en diante, CMVMC) do Viso, presenta no Rexistro Electrónico da Xunta de Galicia co núm. de entrada 2022/2002963, solicitude de deslindamento entre a CMVMC do Viso (Redondela) e a CMVMC de Arcade de Arriba (Soutomaior).
Os montes veciñais en man común (en diante, MVMC) afectados por este deslindamento son:
– MVMC do Viso (ID Monte: 3089) da CMVMC do Viso.
– MVMC da Jolbada (ID Monte: 3139) da CMVMC de Arcade de Arriba.
Segundo. Consta no expediente a seguinte documentación do deslindamento consonte o artigo 53 da Lei 7/2012:
– Acta do apeo do deslindamento o 10.6.2019.
– Acta de conciliación (X53 conciliación 0000252/2021) entre as comunidades no Xulgado de Primeira Instancia e Instrución número 1 de Redondela o 17.9.2021.
– Certificados da aprobación do deslindamento nas asembleas xerais de ambas CMVMC: CMVMC do Viso o 21.7.2019 e a CMVMC de Arcade de Arriba o 26.12.2020.
– Memoria descritiva co plano de deslindamento e cartografía en formato dixital no Datum ETRS89/UTM zona 29N EPSG: 25829. Asinado o 3.8.2022 polo técnico colexiado núm. 482 do COETF de Galicia.
– Informe de validación gráfica catastral con CSV: AY19B2MPBCM7KF37 (para a comunicación da alteración catastral consonte o artigo 55.3 da Lei 7/2012), que polo principio de colaboración entre administracións deberá verificar a Xerencia Territorial de Catastro.
Terceiro. A liña de deslindamento proposta ten unha lonxitude de 267 metros, e está composta polos seguintes puntos:
Punto P1- x: 533569,06 y: 4686499,54
Punto P2- x: 533579,00 y: 4686486,00
Punto S1- x: 533625,64 y: 4686392,27
Punto P3- x: 533746,26 y: 4686130,59
No traballo de gabinete establécense tres puntos de deslindamento secundarios:
Punto S2- x: 533682,47 y: 4686268,96
Punto S3- x: 533684,27 y: 4686265,05
Punto S4- x: 533732,06 y: 4686161,37
Entre os puntos S2 e S3 prodúcese descontinuidade da liña de deslindamento para respectar o dominio público da estrada (o deslindamento realizarase coa Administración competente). Entre os puntos S4 e P3 prodúcese descontinuidade da liña de deslindamento para respectar a parcela catastral 36053A01401477 de titularidade particular.
Revisada a cartografía das resolucións de clasificación de ambos MVMC detéctase que existe colindancia entre ambos e considérase que non afecta a terceiros propietarios.
A liña de deslindamento invade o esbozo da CMVMC de Alxán de Abaixo en 59 m (ata o punto P3), neste tramo a colindancia queda xustificada polo expediente DC22131 (deslindamento entre a CMVMC do Viso e a CMVMC de Alxán de Abaixo).
O punto P3 é o punto no que converxen a CMVMC do Viso, a CMVMC de Arcade de Arriba e a CMVMC de Alxán de Abaixo e coincide co punto P01 do expediente DC22131.
O deslindamento está formado por 3 tramos:
Tramo 1: punto P1-punto P2
Tramo 2: punto S1-punto S2
Tramo 3: punto S3-punto S4
A liña do deslindamento non respecta a liña do Instituto Xeográfico Nacional entre os concellos de Redondela e Soutomaior. Este deslindamento establécese mediante acordo das comunidades implicadas no mesmo.
A liña de deslindamento produce modificacións na cartografía dos esbozos de clasificación das seguintes comunidades:
– CMVMC do Viso: o expediente de revisión de esbozo RE22002 xa recolle o actual deslindamento.
– CMVMC de Arcade de Arriba: achega uns pequenos axustes para pechar os puntos P1, P3 e S4 do deslindamento co resto do esbozo do seu MVMVC.
O Servizo de Montes considera que a solicitude se axusta ao establecido no artigo 53, polo que propón a aprobación do deslindamento segundo a liña presentada.
Consideracións legais e técnicas:
Primeira. A presente resolución dítase de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e consideracións legais e técnicas expostos, o Xurado por unanimidade dos seus membros,
ACORDA:
Aprobar o deslindamento parcial realizado entre a CMVMC do Viso (Redondela) e a CMVMC de Arcade de Arriba (Soutomaior) respecto da sua estrema común nos termos indicados no feito terceiro.
Contra a presente resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ao da súa publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas e cos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Pontevedra, 18 de decembro de 2023
Antonio Crespo Iglesias
Presidente do Xurado Provincial de Clasificación de Montes Veciñais
en Man Común de Pontevedra