O Pleno da Corporación Provincial, en sesión ordinaria realizada o día 27 de outubro de 2023, aceptou por unanimidade a delegación do Concello de Calvos de Randín na Deputación Provincial do exercicio das competencias de recadación en executiva de diversos tributos e ingresos de dereito público, de conformidade co establecido no artigo 7 do Real decreto lexislativo 2/2004, do 5 de marzo, polo que se aproba o texto refundido da Lei reguladora das facendas locais, e no artigo 106.3 da Lei 7/1985, do 2 de abril, reguladora das bases de réxime local, e publícase o citado acordo nos seguintes termos:

«Aceptar a delegación de competencias efectuada polo Concello de Calvos de Randín a favor da Deputación Provincial mediante o Acordo plenario do 27 de outubro de 2023 para a recadación executiva, así como a revisión dos actos ditados dos seguintes tributos e demais ingresos de dereito público:

– Imposto de bens inmobles –rústica e urbana–.

– Imposto sobre vehículos de tracción mecánica.

– Imposto sobre actividades económicas.

– Taxa do lixo.

– A recadación dos gastos derivados de execucións forzosas, ao abeiro do establecido nos artigos 99 e 100 da Lei 39/2015, do 1 de outubro, do procedemento administrativo común das administracións públicas, e no artigo 106.3 da Lei 7/1985, de bases de réxime local.

– Multas coercitivas.

Todo isto nas condicións xerais recollidas no acordo de delegación do Concello de Calvos de Randín. En todo caso, serán de aplicación as seguintes condicións xerais:

a) O contido da delegación abranguerá o exercicio de todas as facultades necesarias para a realización da recadación na vía executiva, e ditaranse todos os actos administrativos necesarios para a xestión dos ditos procedementos, incluída a emisión da providencia de constrinximento e resolución dos recursos administrativos contra os actos de recadación executiva.

b) Para o exercicio da competencia delegada, o Concello debería remitir as oportunas certificacións de descuberto do tributo ou ingreso de dereito público a que se refire.

c) A taxa que satisfará o Concello pola prestación do servizo de recadación en período executivo será o 100 % da recarga de constrinximento que debe pagar o debedor tributario, conforme o establecido no artigo 6, letra b), da Ordenanza fiscal reguladora da taxa pola prestación dos servizo de xestión, inspección e recadación da Deputación Provincial de Ourense. A Deputación deducirá da transferencia do importe recadado a cantidade correspondente á taxa liquidada, sen prexuízo da notificación da dita liquidación na forma prevista no artigo 9 da ordenanza fiscal.

d) A presente delegación estará vixente a partir do día seguinte ao da súa publicación no Boletín Oficial da provincia durante o prazo de catro anos, prorrogarase por períodos de 4 anos se ningunha das partes mostra expresamente a súa vontade en contra e comunicaráselle á outra cunha antelación non inferior a 6 meses á data sinalada ou á de calquera dos períodos de prórroga».

Ourense, 9 de novembro de 2023

Luis Menor Pérez
Presidente da Deputación Provincial de Ourense