Examinada a solicitude de deslindamento formulada polos representantes do monte veciñal en man común (MVMC) Franqueira de Abeledos, pertencente á Comunidade de Montes Veciñais en Man Común (CMVMC) de Abeledos, e mais o MVMC Franqueira de Marrubio e Serro, pertencente á CMVMC da parroquia de Marrubio, no concello de Montederramo, resultan os seguintes

Feitos:

Primeiro. O 29.9.2022, a CMVMC de Abeledos presentou un escrito (Rexel 2022/2399992), no cal solicitan a aprobación dun deslindamento coa CMVMC de Marrubio.

Coa solicitude achegou a seguinte documentación:

– Acta de deslindamento.

– Certificacións de aprobación das respectivas asembleas xerais.

– Memoria e planos.

– Acta de conciliación levantada no Xulgado de Paz de Avión.

Segundo. O informe do Servizo de Montes da Xefatura Territorial de Ourense do 21 de marzo de 2023 fai constar que a documentación achegada corresponde ao deslindamento do perímetro estremeiro entre o MVMC Franqueira de Abeledos, pertencente á CMVMC de Abeledos, e o MVMC Franqueira de Marrubio e Serro, pertencente á CMVMC da parroquia de Marrubio, desde o vértice 1a (o situado máis ao O) ata o vértice 5 (o situado máis ao L).

Logo de analizar os puntos e a súa localización, obsérvase que o vértice 1a, tal e como se recoñece nas propias actas e máis na memoria da avinza, constitúe un punto auxiliar que non deslinda propiamente senón que marca o comezo do MVMC Franqueira de Abeledos.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación entre os vértices 1 e 5 indicados na acta de conciliación.

Consideracións legais e técnicas:

Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 21 de marzo de 2023, o Xurado Provincial de Clasificación de Montes Veciñais en Man Común acordou por unanimidade o día 23 de outubro de 2023:

Aprobar o acto de conciliación acadado polas xuntas reitoras dos MVMC Franqueira de Abeledos, pertencente á CMVMC de Abeledos, e o MVMC Franqueira de Marrubio e Serro, pertencente á CMVMC da parroquia de Marrubio, no concello de Montederramo.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense, no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 22 de novembro de 2023

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense