Examinada a solicitude de deslindamento formulada polos representantes do monte veciñal en man común (MVMC) de Cerdeira, pertencente á Comunidade de Montes Veciñais en Man Común (CMVMC) de Cerdeira, cos MVMC Sonelle, pertencente á CMVMC de Sonelle, o de Espiñeiros, pertencente á CMVMC de Espiñeiros, e o MVMC Nogueiroa, pertencente á CMVMC de Nogueiroa, nos concellos do Irixo e Boborás, resultan os seguintes
Feitos:
Primeiro. O 30.9.2022, a CMVMC de Cerdeira presentou un escrito (Rexel 2022/2414046), no cal solicita a aprobación dun deslindamento coa CMVMC de Sonelle.
Coa solicitude achegou a seguinte documentación:
– Acta de deslindamento.
– Certificacións de aprobación das respectivas asembleas xerais.
– Memoria e planos.
Segundo. Ese mesmo día, a dita comunidade presentou outro escrito (Rexel 2022/2413637) relativo a un segundo deslindamento, neste caso, coa CMVMC de Espiñeiros, e xunta a documentación seguinte:
– Acta de deslindamento.
– Certificacións de aprobación das respectivas asembleas xerais.
– Memoria e planos.
Terceiro. Ademais, a referida comunidade presentou ese día outro escrito máis (Rexel 2022/2414119) relativo a un terceiro deslindamento, neste caso, coa CMVMC de Nogueiroa, e xunta a seguinte documentación:
– Acta de deslindamento.
– Certificacións de aprobación das respectivas asembleas xerais.
– Memoria e planos.
Cuarto. Finalmente, a mesma comunidade presentou o 29.11.2022 (Rexel 2022/2936651 e 2022/2936839) e o 9.12.2022 (Rexel 2022/30223916), novos escritos cos que achegou as correspondentes actas de conciliación levantadas o 25.11.2022 no Xulgado de Paz do Irixo (no caso das avinzas Cerdeira-Nogueiroa e Cerdeira-Espiñeiros) e mais o 9.12.2022 no Xulgado de Paz de Boborás (no caso de Cerdeira-Sonelle).
Quinto. O informe do Servizo de Montes da Xefatura Territorial de Ourense do 15 de marzo de 2023 fai constar que a documentación achegada corresponde, dun lado, ao deslindamento do perímetro estremeiro entre o MVMC de Cerdeira pertencente á CMVMC de Cerdeira (no Irixo), e mais o MVMC Sonelle pertencente á CMVMC de Sonelle (en Boborás), desde o vértice 1 (o situado máis ao L) ata o vértice 17 (o situado máis ao O); doutro lado, revísase a estrema entre o propio MVMC de Cerdeira e mais o MVMC de Espiñeiros pertencente á CMVMC de Espiñeiros (no Irixo), desde o vértice 1 (o situado máis ao N) ata o vértice 23 (o situado máis ao S); e, finalmente, revísase a estrema entre o dito MVMC de Cerdeira e mais o MVMC Charco e Redondo pertencente á CMVMC de Nogueiroa (no Irixo), desde o vértice 1 (o situado máis ao N) ata o vértice 23 (o situado máis ao S).
O vértice 1 da avinza Cerdeira-Nogueiroa sitúase, segundo a información cartográfica que consta no Rexistro de MVMC, en terreos do MVMC de Cebral pertencente á comunidade homónima, tal e como se recoñece na propia memoria do deslindamento, onde vén identificado como o piquete (núm. 1) que define o límite de Cerdeira con Nogueiroa-Cebral. En consecuencia, o dito punto debe ter a consideración de punto auxiliar que define a dirección da liña no tramo inicial anterior ao vértice 2.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación conforme o literal dos puntos conciliados no caso das avinzas Cerdeira-Sonelle e Cerdeira-Espiñeiros, e entre os vértices 2 e 23 no caso da avinza Cerdeira-Nogueiroa, en que o vértice 1 tería a consideración de punto auxiliar.
Consideracións legais e técnicas:
Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 15 de marzo de 2023, o Xurado Provincial de Clasificación de Montes Veciñais en Man Común acordou por unanimidade o día 23 de outubro de 2023:
Aprobar o acto de conciliación acadado polas xuntas reitoras dos MVMC de Cerdeira, pertencente á CMVMC de Cerdeira, cos MVMC Sonelle, pertencente á CMVMC de Sonelle, o de Espiñeiros, pertencente á CMVMC de Espiñeiros, e o MVMC Nogueiroa, pertencente á CMVMC de Nogueiroa, nos concellos do Irixo e Boborás.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense, no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 22 de novembro de 2023
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense