Examinada a solicitude de deslindamento formulada polos representantes do monte veciñal en man común (MVMC) Ferroedo, pertencente á Comunidade de Montes Veciñais en Man Común (CMVMC) de Santa Mariña do Monte, e mais o MVMC Cadaval e Couto da Pena Cabrón, pertencente á CMVMC de Santigoso, no concello do Barco de Valdeorras, resultan os seguintes
Feitos:
Primeiro. O 29.9.2022 a CMVMC de Santa Mariña do Monte presentou unha solicitude (Rexel núm. 2022/2391413) de deslindamento do MVMC Ferroedo co MVMC Cadaval e Couto da Pena Cabrón pertencente a Santigoso, ambos os dous no concello do Barco de Valdeorras.
Coa solicitude achegaron a seguinte documentación:
– Acta de deslindamento.
– Certificacións de aprobación das respectivas asembleas xerais.
– Memoria e planos.
– Arquivos xeográficos.
– Acta de conciliación levantada no Xulgado de Primeira Instancia do Barco de Valdeorras.
Segundo. O informe do Servizo de Montes da Xefatura Territorial de Ourense do 7 de marzo de 2023 fai constar que o perímetro obxecto de deslindamento inclúe o perímetro colindante entre estes dous MVMC.
A liña de deslindamento comeza no punto 1, na confluencia norte dos montes, nun cruzamento entre unha pista que vén de Santa Mariña e un cortalumes, e diríxese en dirección sur polo cortalumes ata o punto 2, onde empata con outro cortalumes, que o segue, primeiro en dirección oeste ata o punto 3 e, despois, en dirección suroeste ata o punto 7, sempre polo mesmo cortalumes, quedando este dentro dos límites do MVMC Ferroedo. No punto 7 conflúe o cortalumes cunha pista, continuando o deslindamento polo mesmo cortalumes ata o último punto, o 8, preto da confluencia municipal dos concellos do Barco de Valdeorras, Petín e A Veiga.
As diferenzas de superficies dos polígonos resultantes dos MVMC Ferrroedo e Cadaval e Couto de Pena Cabrón, respecto das superficies clasificadas despois do deslindamento, son inferiores ao 1 %.
O citado informe considera que a solicitude se axusta ao establecido no artigo 53 da Lei 7/2012, de 28 de xuño, de montes de Galicia, polo que propón ao Xurado Provincial a súa aprobación.
Consideracións legais e técnicas:
Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia recolle o procedemento a seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditara resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do 7 de marzo de 2023, o Xurado Provincial de Montes Veciñais en Man Común acordou por unanimidade o día 23 de outubro de 2023:
Aprobar o acto de conciliación acadado polas xuntas reitoras dos MVMC Ferroedo, pertencente á CMVMC de Santa Mariña do Monte, e mais o MVMC Cadaval e Couto da Pena Cabrón, pertencente á CMVMC de Santigoso, no concello do Barco de Valdeorras.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 14 de novembro de 2023
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense