A Instrución 2/2020, do 26 de agosto, da Dirección Xeral de Enerxía e Minas, sobre a tramitación administrativa de modificacións de instalacións eléctricas de alta tensión de transporte, distribución ou instalacións de conexión de xeradores (DOG núm. 193, do 23 de setembro), estableceu que, dado que a normativa en relación coas modificacións de instalacións eléctricas de alta tensión é demasiado xenérica e non inclúe todos os casos, faise necesario especificar con máis detalle os tipos de actuacións concretas que desde o punto de vista técnico se poden considerar non substanciais ou non modificacións e evitar trámites innecesarios no procedemento.

O Real decreto lei 17/2022, do 20 de setembro, polo que se adoptan medidas urxentes no ámbito da enerxía, na aplicación do réxime retributivo ás instalacións de coxeración e se reduce temporalmente o tipo do imposto sobre o valor engadido aplicable ás entregas, importacións e adquisicións intracomunitarias de determinados combustibles, modificou o artigo 115 do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica a que se fai referencia na Instrución 2/2020.

Ditáronse catro instrucións coa finalidade de unificar criterios e simplificar a tramitación administrativa das modificacións de instalacións eléctricas de alta tensión.

No anexo da instrución relaciónanse unha serie de actuacións tipo nas cales se aclara cal sería a súa consideración para os efectos da súa tramitación administrativa. O punto 8 deste anexo establece que, no caso de liñas eléctricas de alta tensión aéreas, a instalación ou o cambio de regulador de tensión, interruptor telecontrolado, reconectador, seccionador, autoseccionador, SX e SXC, se consideran modificación non substancial (MNS), agás no caso de que se substitúa un elemento por outro de iguais características, caso en que se considerará non modificación (NM).

As ditas actuacións están relacionadas coa automatización e non implican unha modificación das características técnicas dos elementos esenciais, polo que cómpre modificar a Instrución 2/2020, do 26 de agosto de 2020, considerando as ditas actuacións como non modificación (NM).

A Comunidade Autónoma galega, de acordo co establecido no artigo 27.13 do seu Estatuto de autonomía, aprobado pola Lei orgánica 1/1981, do 6 de abril, ten atribuída a competencia exclusiva no relativo a instalacións de produción, distribución e transporte de enerxía eléctrica cando este transporte non saia do seu territorio e o seu aproveitamento non afecte outra comunidade autónoma, sen prexuízo do disposto no artigo 149.1.22 e 25 da Constitución.

A persoa titular da Dirección Xeral de Planificación Enerxética e Recursos Naturais é competente para ditar a presente instrución con fundamento no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación.

Polo exposto, modifícase a Instrución 2/2020, do 26 de agosto, da Dirección Xeral de Enerxía e Minas, sobre a tramitación administrativa de modificacións de instalacións eléctricas de alta tensión de transporte, distribución ou instalacións de conexión de xeradores:

1. Modifícase o segundo parágrafo do preámbulo:

O segundo parágrafo do preámbulo queda redactado como segue:

Recentemente publicouse o Real decreto lei 23/2020, do 23 de xuño, polo que se aproban medidas en materia de enerxía e noutros ámbitos para a reactivación económica, que modifica, entre outras cousas, o artigo 115 do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica. O dito artigo foi posteriormente modificado polo Real decreto lei 17/2022, do 20 de setembro, polo que se adoptan medidas urxentes no ámbito da enerxía, na aplicación do réxime retributivo ás instalacións de coxeración e se reduce temporalmente o tipo do imposto sobre o valor engadido aplicable ás entregas, importacións e adquisicións intracomunitarias de determinados combustibles. No seu número 3 regúlanse expresamente algunhas modificacións non substanciais:

«3. Para os efectos do establecido no artigo 53.2 da Lei 24/2013, do 26 de decembro, considéranse modificacións non substanciais, e deberán unicamente obter a autorización de explotación, logo de acreditación do cumprimento das condicións de seguridade das instalacións e do equipo asociado, as que cumpran as seguintes características:

a) Que non se encontren dentro do ámbito de aplicación da Lei 21/2013, do 9 de decembro, de avaliación ambiental.

b) Que non supoñan unha alteración das características técnicas básicas (potencia, capacidade de transformación ou de transporte, etc.) superior ao 10 por cento da potencia da instalación.

c) Que non supoñan alteracións da seguridade tanto da instalación principal como das súas instalacións auxiliares en servizo.

d) Que non se requira declaración, en concreto, de utilidade pública para realizar as modificacións previstas.

e) As modificacións de liñas que non provoquen cambios de servidume sobre o trazado.

f) As modificacións de liñas que, aínda provocando cambios de servidume sen modificación do trazado, se realizasen de mutuo acordo cos afectados, segundo o establecido no artigo 151 deste real decreto.

g) As modificacións de liñas que impliquen a substitución de apoios ou condutores por deterioración ou rotura, sempre que se manteñan as condicións do proxecto orixinal.

h) A modificación da configuración dunha subestación, sempre que non se produza variación no número de rúas nin no de posicións.

i) No caso de instalacións de transporte ou distribución que non impliquen cambios retributivos».

2. Engádese unha nova instrución:

«Quinta. Elementos de fiabilidade en liñas eléctricas de alta tensión aéreas

No caso de liñas eléctricas de alta tensión aéreas, instalación ou cambio por outro de distintas características de reguladores de tensión, interruptores telecontrolados, reconectadores, seccionadores, autoseccionadores SX e SXC (Orde 8 do anexo I), deberase achegar a seguinte documentación xunto coa comunicación:

a) Listaxe das actuacións, en que se faga constar para cada unha delas:

a. Identificación do número de expediente da instalación existente sobre a cal se realiza a actuación, denominación e nivel de tensión.

b. Localización concreta referenciada mediante coordenadas xeográficas, con indicación expresa do concello.

c. Orzamento.

b) Características técnicas xerais.

c) Normativa de aplicación.

d) Certificado do director de obra para cada actuación, en que se indique que esta cumpre co establecido regulamentariamente.

A comunicación e a memoria poderán ser únicas para un conxunto de actuacións.

3. Modifícase o anexo I e substitúese polo incluído nesta instrución.

Esta instrución modifica a Instrución 2/2020, do 26 de agosto, da Dirección Xeral de Enerxía e Minas, sobre a tramitación administrativa de modificacións de instalacións eléctricas de alta tensión de transporte, distribución ou instalacións de conexión de xeradores.

Esta instrución entrará en vigor o día seguinte ao da súa publicación no Diario Oficial de Galicia.

Santiago de Compostela, 2 de novembro de 2023

Pablo Fernández Vila
Director xeral de Planificación Enerxética e Recursos Naturais

ANEXO I

Actuacións detalladas

Orde	Tipo	Subtipo	Código	Actuación	Proposta	Aclaración
1	1. LAT aérea	11. Nova	1.1.1	Tendido 2º circuíto en liña simple circuíto preparada para dobre circuíto	MS/MNS	MNS: se a liña de dobre circuíto xa dispón de AAP e AAC
2	1. LAT aérea	12. Existente	1.2.1	Cambio de condutores	MNS/NM	NM: se non se cambia a sección
3	1. LAT aérea	12. Existente	1.2.2	Adecuación de posta a terra (PAT apoios e liñas de terra aéreas)	NM
4	1. LAT aérea	12. Existente	1.2.3	Adecuación, cambio ou recrecemento de apoios	MNS/NM	MNS: se hai cambio de tipoloxía construtiva dos apoios
5	1. LAT aérea	12. Existente	1.2.4	Cambio de crucetas e elementos auxiliares	NM
6	1. LAT aérea	12. Existente	1.2.5	Cambio de illamento	NM
7	1. LAT aérea	12. Existente	1.2.6	Instalación de fibra óptica	NM
8	1. LAT aérea	13. Elementos fiabilidade	1.3.1	Instalación/Cambio: regulador de tensión, interruptor telecontrolado, reconectador, seccionador, autoseccionador, SX e SXC	NM
9	2. LAT subterránea	21. Nova	2.1.1	Tendido 2º e 3º circuíto en liña simple circuíto preparada para dobre/triplo circuíto	MS/MNS	MNS: se a liña de dobre/triplo circuíto xa dispón de AAP e AAC
10	2. LAT subterránea	21. Nova	2.1.2	Tendido circuíto subterráneo en gabia/canalización/galería existente	MS/MNS	MNS: se a canalización xa dispón de AAP e AAC
11	2. LAT subterránea	22. Existente	2.2.1	Instalación de fibra óptica	NM
12	2. LAT subterránea	22. Existente	2.2.2	Adecuación posta á terra (pantallas cables subterráneos-cámaras de empalmes)	NM
13	3. CT	32. Existente	3.2.1	Cambio de trafo sen modificación de potencia	NM
14	3. CT	32. Existente	3.2.2	Cambio de trafo con diminución de potencia	MNS
15	3. CT	32. Existente	3.2.3	Cambio de trafo con aumento de potencia	MS/MNS	MNS: se a nova potencia xa dispón de AAP e AAC
16	3. CT	32. Existente	3.2.4	Instalación de máquinas adicionais	MS/MNS	MNS: se xa dispoñen de AAP e AAC
17	3. CT	32. Existente	3.2.5	Cambio de plataforma en CT/CR/CS	MNS/NM	NM: se non hai cambio das características da plataforma
18	3. CT	32. Existente	3.2.6	Ampliación/Cambio de celas	MNS/NM	NM: se o cambio das celas é a substitución por outras de iguais características
19	3. CT	32. Existente	3.2.7	Ampliación/Cambio de cadros de baixa tensión	NM
20	3. CT	32. Existente	3.2.8	Melloras diversas	NM
21	4. SE	42. Existente	4.2.1	Nova posición con interruptor	MS
22	4. SE	42. Existente	4.2.2	Instalación/Cambio de interruptor en posición existente	MNS/NM	NM: se o cambio de interruptor é substitución por outro de iguais características
23	4. SE	42. Existente	4.2.3	Instalación/Cambio doutros elementos en posición existente	MNS/NM	NM: substitución por outro de iguais características
24	4. SE	42. Existente	4.2.4	Equipamento de posición de reserva	MS/MNS	MNS: se a posición de reserva xa dispón de AAP e AAC
25	4. SE	42. Existente	4.2.5	Instalación/Adecuación de batería de condensadores	MNS/NM	NM: se é adecuación
26	4. SE	42. Existente	4.2.6	Adecuación/Cambio de proteccións	NM
27	4. SE	42. Existente	4.2.7	Adecuación en subestación de obra civil ou outros elementos comúns	NM
28	4. SE	43. Trafo	4.3.1	Instalación dun novo trafo	MS/MNS/NM	MNS: se xa dispón de AAP e AAC. NM: se se trata dunha substitución de trafo sen cambio de potencia
29	4. SE	43. Trafo	4.3.2	Obra civil para trafo sen equipar (bancada baleira)	NM
30	4. SE	43. Trafo	4.3.3	Adecuación de trafo	NM
31	4. SE	44. Equipamentos móbiles	4.4.1	Novo trafo móbil	MS	Autorización de implantación
32	4. SE	44. Equipamentos móbiles	4.4.2	Nova posición móbil	MS	Autorización de implantación
33	5. Redes, xestión, despachos, control e IBO	51. Smart Grids	5.1.1	Redes intelixentes	NM
34	5. Redes, xestión, despachos, control e IBO	52. Telexestión, xestión dixitalizada e tradicional	5.2.1	Xestión (telexestión, xestión dixitalizada e tradicional)	NM
35	5. Redes, xestión, despachos, control e IBO	53. Despachos de manobra e centros control dixitalizado	5.3.1	Despachos de manobra e centros de control	NM
36	5. Redes, xestión, despachos, control e IBO	54. IBO	5.4.1	IBO	NM