Examinada a solicitude de deslindamento formulada polos representantes do monte veciñal en man común (MVMC) Pradorramisquedo, pertencente á Comunidade de Montes Veciñais en Man Común (CMVMC) de Pradorramisquedo, e mais Os Chaos, pertencente á CMVMC de Cepedelo, no concello de Viana do Bolo, resultan os seguintes
Feitos:
Primeiro. O 29.9.2022 a CMVMC de Pradorramisquedo presentou un escrito (REXEL 2022/2392316) en que solicita a aprobación dun deslindamento coa CMVMC de Cepedelo.
Coa solicitude achegou a seguinte documentación:
– Acta de eslindamento.
– Certificacións de aprobación das respectivas asembleas xerais.
– Memoria e planos.
– Solicitude de conciliación presentada no Xulgado de Paz de Viana do Bolo.
Segundo. O 25.10.2022, a dita comunidade presentou un novo escrito (REXEL 2022/2603586) co cal achegaba a seguinte documentación:
– Acta de conciliación levantada no Xulgado de Paz de Viana do Bolo.
Terceiro. O informe do Servizo de Montes da Xefatura Territorial de Ourense do 30 de xaneiro de 2023 fai constar que a documentación achegada corresponde ao deslindamento do perímetro estremeiro entre os MVMC Pradorramisquedo e Cabezo Grande, pertencentes á CMMC de Pradorramisquedo, e o MVMC Os Chaos, pertencente á CMVMC de Cepedelo, desde o vértice 0 (o situado máis ao N) ata o vértice 3 (o situado máis ao S).
Logo de analizar os puntos e a súa localización, obsérvase que o vértice 0 coincide co vértice 22 do deslindamento Pradorramisquedo-Penouta (actualmente en trámite e obxecto de informe favorable en data coetánea á deste informe), e é un punto común ás comunidades de Penouta, de Pradorramisquedo e de Cepedelo malia non ter sido acordado de forma expresa por elas ao mesmo tempo; porén, o feito de que o punto fose obxecto de acordos bilaterais entre as tres comunidades comporta, de xeito implícito, o consentimento global sobre este.
O vértice en cuestión, ao estar situado no perímetro dos montes afectados, non pode ter a consideración de punto auxiliar tal e como se define na memoria técnica do deslindamento, senón que é un punto formal deste, polo menos mentres as comunidades de Penouta e Cepedelo non alcancen unha hipotética avinza entre elas a que fai mención a memoria.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación entre os vértices 0 e 3 indicados na acta de conciliación.
Consideracións legais e técnicas:
Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, dite resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 27 de xaneiro de 2023, o Xurado Provincial de Montes Veciñais en Man Común acordou por unanimidade o día 17 de abril de 2023:
Aprobar o acto de conciliación acadado polas xuntas reitoras dos MVMC Pradorramisquedo, pertencente á CMVMC de Pradorramisquedo, e mais o MVMC Os Chaos, pertencente á CMVMC de Cepedelo, no concello de Viana do Bolo.
Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 16 de outubro de 2023
Luis Jorge Álvarez Ferro
Presidente do Xurado Provincial de Clasificación de Montes Veciñais
en Man Común de Ourense