Mediante a Orde do 9 de febreiro de 2023 establecéronse os criterios e o procedemento para a distribución do fondo adicional ao Fondo de Cooperación Local, previsto no artigo 59.catro da Lei 6/2022, do 26 de decembro, de orzamentos xerais da Comunidade Autónoma de Galicia para 2023, destinado a concellos de Galicia con poboación inferior a 15.000 habitantes, publicada no Diario Oficial de Galicia número 34, do 17 de febreiro de 2023, co código de procedemento PR486B.

O 26 de maio de 2023, a directora xeral de Administración Local, por delegación do vicepresidente segundo e conselleiro de Presidencia, Xustiza e Deportes (na actualidade, vicepresidente primeiro e conselleiro), con base na disposición derradeira primeira da Orde do 9 de febreiro de 2023, resolveu o procedemento iniciado en virtude desta orde e asignou as achegas do fondo aos concellos beneficiarios polos importes sinalados na mesma resolución.

Pola súa banda, a Dirección Xeral de Planificación e Orzamentos procedeu a realizar os pagamentos anticipados das achegas polo importe correspondente ao 80 % da asignación destinada a cada concello, dentro de cada unha das 3 liñas de financiamento establecidas no artigo 1 da orde que corresponden ás legalmente establecidas en virtude do artigo 59.catro da citada Lei de orzamentos xerais para 2023.

No artigo 13.2 da Orde reguladora fíxase o 15 de novembro de 2023 como data límite para a realización dos investimentos e para a presentación da documentación xustificativa da aplicación dada aos fondos. Co fin de posibilitar a execución dos proxectos e o procedemento de xestión administrativa e orzamentaria que resulte de aplicación, preténdese ampliar ata o 30 de novembro o referido prazo de execución e xustificación dos proxectos financiados polo fondo adicional ao Fondo de Cooperación Local previsto no artigo 59.catro da citada Lei 6/2022, do 26 de decembro.

Esta ampliación do prazo está amparada no artigo 32 da Lei 39/2015, do 1 de outubro, do procedemento administrativo común das administracións públicas, segundo o cal a Administración, salvo precepto en contrario, poderá conceder, de oficio ou por petición dos interesados, unha ampliación dos prazos establecidos, que non exceda a metade destes, se as circunstancias o aconsellan e con isto non se prexudican dereitos de terceiro.

Con base en todo o anteriormente exposto, de conformidade coa Lei 39/2015, do 1 de outubro, do procedemento administrativo común das administracións públicas, coa Lei 6/2022, do 26 de decembro, de orzamentos xerais da Comunidade Autónoma de Galicia para 2023, co Decreto 117/2022, do 23 de xuño, polo que se establece a estrutura orgánica da Vicepresidencia Segunda e Consellería de Presidencia, Xustiza e Deportes en relación co previsto na disposición transitoria segunda do Decreto 79/2023, do 22 de xuño, polo que se fixa a estrutura orgánica das vicepresidencias e das consellerías da Xunta de Galicia, e co disposto na Orde do 9 de febreiro de 2023 pola que se establecen os criterios e o procedemento para a distribución do fondo adicional ao Fondo de Cooperación Local, previsto no artigo 59.catro da Lei 6/2022, do 26 de decembro, de orzamentos xerais da Comunidade Autónoma de Galicia para 2023, destinado a concellos de Galicia con poboación inferior a 15.000 habitantes,

DISPOÑO:

Artigo único

Modifícase o artigo 13.2 da Orde do 9 de febreiro de 2023, que queda redactado nos seguintes termos:

A data límite para a realización dos investimentos e a presentación da documentación xustificativa da aplicación dada aos fondos remata o 30 de novembro de 2023.

Disposición derradeira

Esta orde entrará en vigor o día da súa publicación no Diario Oficial de Galicia.

Santiago de Compostela, 30 de outubro de 2023

Diego Calvo Pouso
Vicepresidente primeiro e conselleiro de Presidencia, Xustiza e Deportes